الاسبوع الثالث لدورة الرقي بمدبرة منزل مثالية

ماريا205 · 2013-10-07, 14:11

يوم الاحد

السلام عليكم ورحمة الله تعالى

استيقضت قبل اذان الفجر تسحرت مع الاستغفار والتسبيح والصلاة على النبي كي اذن صليت والحمد لله التلاوة قريت صفحتين. الصلاة في وقتها.

لميت البيت وغسلت ماعن لفطور اطلعت على البرنامج وقررت نوجد شخشوخة العيد عجنتها وخليتها ترتاح. نضت نقيت الدوش والتوالات الغداء كان باقيلي.غرفة الجلوس هي نفسها الهول حطيت قدامي 2 بسينات وحدة تاع الصابون ووحدة للتشلال واسفنجة وبديت بالبلافو ولي gورج مسحتهم وزدت لي ليستر حكيت الحيوط وشللتهم وزدت الطاقة والبلاكار وزدت 2 بيبان تاع لي شمبر اللي كاينين في الهول نظفتهم وبالماءهذاك فوتو على كامل الدار ونشفت كلش هذاك هو وقت الغداء تغدينا غسلت لماعن بعد الضهرصليت وقيلت شوي طيبت الشخشوخة كان باقيلي من الطارطة شربو بيها الحليب درت فطوري بعد العشاء فتت الشخشوخة وفي اكياس الى الكونجلاتور.
عادي فرش اسنان وماكياج خفيف وتعطير

راني مع المراجعة اليومية لاولادي ومرة على مرة يشاركوني في ترتيب غرض او اعداد المائدة ............

ماريا205 · 2013-10-07, 14:11

يوم الاثنين
السلام عليكم ورحمة الله تعالى

بعد ما تسحرت اديت صلاتي حاضر مع الاستغفار والتسبيح والصلاة على النبي . باقي الصلوات في وقتها والحمد لله الحفظ بديت سورة العلق مع بنتي . قراءة سورة الاخلاص 10 مرات والفاتحة 10 قبل النوم الاستغفار طول النهار.

فرغت الببلوتاك من لماعن غسلتهم شللتهم ويقطرو ونظفتها من فوق ومن داخل نصبت الغداء ونشفت الدار على خفيف كانت نقية بعد الغداء غسلت لماعن صليت الضهر ورجعت لماعن لبلاصتهم
ريحت شوي كنت تعبانة بعد ما شربو الحليب وجدت فطوري بعد الغشاء ريحت عند الميكرو والى النوم
عادي فرش اسنان وماكياج خفيف وتعطير

مراجعة الرياضيات والفرنسية وعملتلهم املاء لتحسين الخط
وراني نوضهم الصباح على 6 باش يحفضو.

ماريا205 · 2013-10-07, 14:12

الثلاثاء
السلام عليكم ورحمة الله تعالى

استيقضت على 4 و45 تسحرت مع الاستغفار والتسبيح والصلاة على النبي كي اذن صليت والحمد لله التلاوة في الحزب 12+الصلاة في وقتها+الدعاء طول اليوم.

لميت البيت وغسلت ماعن لفطور نقيت الدوش والتوالات كنت تعبانة شوي نظفت الدار على خفيف وبما نو ما عنديش البونكات في غرفة الجلوس فيها الطابي والمطارح غلافاتهم نظاف تهنيت. نصبت الغداء رتبت بلاكارات الكوزينة غسلت القش بعد الضهر خرجت درت دورة نشوف قش العيد رجعت ميتة بالعياء درت فطوري .
عادي فرش اسنان كحل للعينين
وتعطير

المراجعة اليومية لاولادي لا اغفل مع ايقاضهم على6 صباحا للحفظ حيث يكون الذهن صافي ومرتاح

ماريا205 · 2013-10-07, 14:13

الاربعاء
السلام عليكم ورحمة الله تعالى

استيقضت قبل اذان الفجرتسحرت وقريت في المصحف حتى وصل وقت الصلاة صليت مع الاستغفار والتسبيح والصلاة على النبي +الدعاء طول اليوم رانا في ايام مباركة.

بعد الفطور غسلت ماعن لفطورلميت البيت نقيت الدوش والتوالات نصبت الغداء رحت لغرفتي مسحت البافو ومسحت الخزانة من فوق وعاودت رتبتها نظفت بيبانها ومسحت المرايا +لي تابل دو نوي +لا كوافوز+ طابلة المكرو +باب الغرفة سيقت كامل الدار ونشفتها لبست بنتي هذاك هو 9و15 طفيت على الغداء وخرجت شريتلهم القش بعد الغداء غسلت لماعن صليت الضهر والى القيلولة بعدها نقيت الغرس للمقروط وعملتلهم طمينة للحليب وجدت فطوري بعد الافطار غسلت لماعن وصليت العشاء فرزت القش الخزانة لميت اللي يترقع والباقي طبقتو بعدها جيت نكتب تطبيقي ما قدرتش رقدت بعد ما قريت سورة الملك والاخلاص 10مرات.
عادي فرش اسنان كحل للعينين
وتعطير

المراجعة اليومية +درتلهم في الميكرو تعلم لالفابي واناشيد بالفرنسية.

ماريا205 · 2013-10-07, 14:14

الخميس
السلام عليكم ورحمة الله تعالى

استيقضت قبل اذان الفجر تسحرت مع الاستغفار والتسبيح والصلاة على النبي كي اذن صليت والحمد لله التلاوة في الحزب 16+الصلاة في وقتها+الدعاء طول اليوم.

لميت البيت ونقيت الدوش والتوالات غسلت الطاقة تاع غرفة النوم حكيت الحيطان وسيقتها وبدلت الديكور سيقت كامل الدار الغداء كان باقيلي .في المساء وجدت فطوري
دوش عادي فرش اسنان كحل للعينين
وتعطير

مراجعة خفيفة خليتهم يخرجو قدام الباب يلعبو ويريحو يعني فترة راحة

ماريا205 · 2013-10-07, 15:30

الجمعة

السلام عليكم ورحمة الله تعالى

الصلاة+الاستغفار +التسبيح +الصلاة على النبي +الدعاء طول اليوم.

لميت البيت ونقيت الدوش والتوالات نصبت الغداء طبقت القش وفرزت اللي يترقع بجهة واللي يتحدد حددتو لمعت زجاج نافذة الهول والنافذة الاولى تاع الصالة رحيت الغرس ونكهتو للمقروط وجدت العشاء بعدو غسلت لماعن وزدت نقيت لماعن تاع الماء بعدها بسست دقيق المقروط والى النوم
دوش عادي فرش اسنان ماكياج خفيف وتعطير

مراجعة مواد الحفظ صبيحة الجمعة وعودتهم يحسو بمسؤوليتهم تجاه غرفتهم يرتبوها ويحافظو عليها نظيفة

ماريا205 · 2013-10-07, 15:31

السبت

السلام عليكم ورحمة الله تعالى

استيقضت على 5 مع الاستغفار والتسبيح والصلاة على النبي كي اذن صليت +الدعاء طول اليوم.

بعد صلاة الصبح خدمت المقروطكملتو ناضو لولاد فطرتهم رتبو غرفتهم غسلت لماعن سيقت الدار وخرجت للسوق شريت سلات الخضر اللي تدخل للثلاجةكي رجعت تغدينا غسلت لماعن ريحت شوي نظفت الطاقة الثانية تاع الصالة ولبستلها الريدو نحيت غلافت مطارح الصوف الدخلاني باش يتغسلو وجدت العشاء خفيف
دوش سخون مع صابون دزايرروعة
يخلي لا بو ناعمة +ترطيب+ماكياج

مراجعةنص اللغة والفرنسية والرياضيات وقراءة اية الكرسي قبل النوم

omelhabib · 2013-10-07, 22:35

السلام عليكم كيف حالك أخت ماريا اتمنى للجميع التوفيق في هذه الدورة حتى أنا بدا حماسي يزيد معكم المهم أجيبك على سؤال طرحتيه بالنسبة لصعوبة الحفظ لإبنتك إجعليها تكتب الدرس المراد حفظه3مرات أوأكثر يسهل عليها الحفظ هذه طريقة سهلة لحفظ القرآن أيضا يكتب الثمن أو الصفحة 10 مرات أو أكثر يحفظ ويثبت أكثروا التكبير وفعل الخيرات

ماريا205 · 2013-10-10, 15:34

اقتباس:

المشاركة الأصلية كتبت بواسطة omelhabib

السلام عليكم كيف حالك أخت ماريا اتمنى للجميع التوفيق في هذه الدورة حتى أنا بدا حماسي يزيد معكم المهم أجيبك على سؤال طرحتيه بالنسبة لصعوبة الحفظ لإبنتك إجعليها تكتب الدرس المراد حفظه3مرات أوأكثر يسهل عليها الحفظ هذه طريقة سهلة لحفظ القرآن أيضا يكتب الثمن أو الصفحة 10 مرات أو أكثر يحفظ ويثبت أكثروا التكبير وفعل الخيرات

وعليكم السلام اختي نحمد ربي وانت كيف حالك يالله شدي الهمة وانظمي لينا في الدورة
مشكورة على الافادة المشكلة في الدرس الطويل ما تحبش تعاود تكتبو

سمراء الدنيا · 2013-10-10, 16:46

باسم الله ما شاء الله و لا قوة الا بالله ........واش هاذ النشاط يا ماريا ربي يبارك و يزيد هاذيك براكة الصيام ربي يقويك و يثبت حسناتك
+4 للجانب التنظيفي
+4 للجانب التربوي
+4 للجانب الجمالي
و الجانب الديني قد ما نعطيك نقط ما يفوكش حقك ) و الاجرالاكبر عند الله )
+4 للجانب الديني .....+5 للحفظ .....+5 للصيام .........+1 للدعاء في الايام المباركة