الحمد لله جبت ريفورم و هاكم قصتي بالتفصيل ...

[منير265]

يوم عادي مثل بقية الأيام كنت مع الفيس بوك و نقصر مع خويا الصغير
على الساعة 11.00 قلت مع روحي لازم روح للأمن و ندير ديكلاراسيو دو باغد على لاكرت ديدونتيتي تاعي لثم رحت و رجعوني قالولي ارجع على 14.00 تفتح الادارة رجعت للدار و تغديت و صليت الظهر و حوست على فوطو كوبي على لاكارت لي تودرتلي و خرجت مباشرة للأمن الوطني عندنا
وجهوني صحاب الاستقبال الى المكلف بهذا الأمر و بعد ما أخذ كل المعلومات عني لمحت بعض النضرات الغريبة في عينيه و ابتسامات كذلك في محياه و حتى طريقة الكلام بقي يسأل عن أحوال الجو و يقولي ياك ماراكش مقلق ... بدأ يدخلني الشك و لكن جامي جات في بالي لارمي
عاود بعثني هذا الانسان لقاعة الاستقبال تحت الحراسة و لم أنتبه لهذا و بعد دقائق معدودة عيطولي رحتلهم لقيت كل الموظفين هناك حتى محافظ الشرطة بنفسة و مباشرة سألوني عن وضعيتي اتجاه الخدمة الوطنية لثم فهمت واش راه صاري
تغيرت ملامح وجهي مباشرة و تقلقت بعض الشيء و أردت الاتصال بأبي و أخي و لكنهم رفضو ذلك و نحاولي البورتابل بحجة أنه ممنوع بعثو للدرك الوطني في ذلك الوقت و كذلك للناحية العسكرية الاولى رابور بلي حكمو عاصي
خرجوني من عند مقر الأمن الوطني و ركوبوني في سيارتهم
رفدوني و داوني للدرك الوطني و الدرك قالولهم لازم تدوه للسبيطار قبل هذا
عاودو داوني للسبيطار و رجعوني تحت نظرات الناس المحتاااااااااااااارة جدا
عندما رجعوني للدرك وجدت معاملة أخرى راااااااااائعة من شباب في القمة و متفهم للغاية
و لكن الامر الذي حيرني هي الاجراءات التعسفية مثل تصوار لي مباشرة و عن جنب
و كذلك رفع البصمات حسيت روحي قاتل و الله و بقاو يسقسو فيا و يكتبو في بيفي تاعي
و بعدها علمت أني سأنام في السجن فجعت و لم أتقبل الأمر في بداية الأمر
و لكن المعاملة اللبقة الرائعة من الدركي الذي كلف بحراستي جعلتني أرضى و أدخل ... الله يوفقو و يحفظو
جابولي العشاء .... وحدة موز و وحدة تفاح و 2 ياوورت
قصرت معاهم شوية و ضحكنا و حكينا روعة حتى جائني النعاس بشكل عادي جدا
صباحا بعد استقاضي مع الفجر صليت و قصرت شوية مع الدركي لي كان في البرمانوس
حتى انتهت مدة البارمانونس تاعو على الساعة 7.00 و كل ذلك الوقت كان يعس فيا
فقط
جائني وحدوخر ماجابليش فطور الصباح ربي يغفرلو ههههه ممكن يكون نسا
المهم جابولي جوندارم من منطقة اخرى رفدوني مع أخ كيفي
و تبقى معاملة الدرك الوطني في القمة ماشاء الله
رغم أنهم دارولي لي مينوت و يقولولي اسمحلنا هذا في اطار تنضيمي و انا باقي غير نضحك على روحي و مش مصدق واش راه يصرالي
داوني للبليدة بالضبط للمحكمة العسكرية
المهم الجيش بصفة عامة عندهم معاملة خشنة بعض الشيء نضرات ثاقبة و لهجة غليظة في الكلام و لكن عادي جدا
بقيت في قاعة الانتضار حتى عيطولي و رحتلهم و بقي يسقسي فيا و انا نجاوب و هو يكتب و عندما سقساني علاش ماجوزتش العامين تاوعك جيت ندافع على نفسي قالي النقيب ماتكثرش علينا الهدرة يرحم باباك قتلو اوكي هاك فيش فاميليار و كنت راح ندير كفالة عن العائلة و ماكفانيش الوقت
مدلي بعض الوثائق امضيت عليهم و رجعت
تعرفت على اخوة هناك
و لاحظت أن شخصين متزوجين يا اخي تشوكت
كنا 5 افراد قاعدين مع بعضنا و عيطولنا في 5 مدو الريفورم ل4 منا و الخامس داوه قدام عينينا و كااااااااااامل غاضنا بالبزاف
بالتوفيق للجميع

[abdeldjalil147]

مبروك عليك خويا العزيز
فقط اردت ان اسالك ، هل تحصلت على بطاقة الاعفاء من الخدمة الوطنية في نفس اليوم الذي قادوك الى المحكمة ؟
و هل كان السبب في تقديم البطاقة العائلية ،أعتقد بانك متزوج
و بالنسبة لـ 4 شباب الذين تم اطلاق سبيلهم هل قدموا ملفاة دافعوا عن انفسهم بها ؟
و لماذا لم يتم لطلاق الشخص الخامس ان كانت لديك معلومات ا و ممكن استنتجتم الاسباب
شكرا اخي الكريم

[منير265]

أوك
مدولي ورقة فيها واش لازم نجيبلهم دوسي بلي أنا الكبير و أنا لست متزوج لحد الان
الملف فيه : فيش فاميليار و شهادات المدرسية لأخوة لي يقراو و شهادة عمل و كفالة
و بعد مانحط هذا الملف راح يمدولي ورقة وحدخرا و ملفي لا يقبل حتى تقوم فرقة الدرك الوطني في بلدتنا بلونكات ثاني يعني اذا قبل الدوسي بعد حوالي 3 أو 4 أشهر باش نجيبها
بالنسبة للذي أطلق صراحهم و الذي لم يطلق صراحهم يا أخي كي توصل ثم سلك راسك و من الأحسن يكون عندك الدليل كيما قولو الثقة في الوثيقة يا يمدولك واش لازم جيب كي تكون الكبير في الدار يا يمدولك أنفلوب و يبعثوك للطبيب الشرعي باش يتأكد من صحة كلامك
و لي حكموه تسبب بالمرض و لم يقتنعو
و لي متزوجين خليتهم ثم الله أعلم المصير تاعهم و كاين حتى انسان شوية كبير في السن ربي يعينهم ان شاء الله
النصيحة لي نمدهالك اذا كنت عاصي الاستخارة و روح ليهم أحسن من كي يحكموك هوما و هذو اليامات راها مزيرة الحالة شوية

[abdeldjalil147]

الله يبارك فيك اخي الكريم ،شكرا على التوضيح
المهم يا اخي انا في نفس الوضعية التي كنت عليها انت و هي نفس الوضعية التي يعاني منها معظم شبابنا
المهم .... انا الان عاص الخدمة الوطنية ،يعني رايح انفوت على المحكمة العسكرية
و راني نخدم في ملف كفالة عائلية لانني المعيل الوحيد للعائلة الكريمة ، وانا الابن الاكبر و لدي اخوة يدرسون
بقي لي شهادة كشف الراتب فقط
انت وقتاش صرات معاك هذه القصة ، علما يانني سامر بنفس المحكمة يعني الناحية العسكرية الاولى البليدة
انا من ولاية شلف
و هل دخلت عند الوكيل العسكري ام لا ؟
ارجوا ان لا اكون قد ازعجتك بكثرة الاسئلة

[منير265]

عادي جدا أخي
أنا وضعت كل هذا للتوضيح فقط
صراتلي نهار الخميس لي فاتت فقط هههههههههههههه
ماجزتش على وكيل الجمهورية و أنصحك باش تروووووح و تدي معاك الاثبات و ماتخاف ماوالو الاستخارة و اتكل على الله و هو الموفق
و روح وحدك خير من لي يحموك لي جوندارم ولا البوليس أوكي

[abdeldjalil147]

اوكي ان شاء الله
انا في انتظار شهادة كشف الراتب فقط و الملف واجد ان شاء الله
لكن المشكل انا ممن انهو دراستهم الجامعية ، و حنا الجامعيين صعيبة علينا شوية
!!!!

[منير265]

أنا عندي تقني سامي في الهندسة المعمارية ؟؟
مالفرق ؟؟
ههههههه
أنت جرب على ربي و كثر الدعاء و الاستغفار و الصلاة في وقتها و لي فيها خير ربي يسهلها ان شاء الله

[منير265]

هي المشكل كي راك عاصي صافي الخدمة الوطنية تابعاتك تابعاتك و تعطلك بزااااااااااف عن بزاف أمورات مثل العمل و الديبلاصمو و الباصبور و ماتقدر تروح جوندارم ولا بوليس ؟؟ بزاااف أمور
انت روح باش تتهنى و عندما تدخل لثم دير في بالك راح تتحرر منها يابالريفورم و ان شاء الله فيها يا جوزهم و هذا فيها شك صغييييير و بما أنك الكبير في الدار الشك الكبيييييييير يردوك

[abdeldjalil147]

الله يبارك فيك اخي الكريم
عندك الحق في كل كلامك .......

[منير265]

تمت إضافتك أخي و ان شاء الله معرفة خير و بالتوفيق لك و للجميع

[ft.fatah]

مبروك عليك و الحمد لله على سلامتك
اردت ان اسالك ، عندما سألوك لماذا لم تذهب للخدمة الوطنية ، هل كانت معك الفيش فاميليار ؟

[منير265]

سي نورمال ديتها معايا جابهالي خويا كي كنت عند لي جوندارم