خبيزات محشيين بالجاج *les naans*

*سماح 94* · 2012-12-13, 13:59

السلام عليكن اخواتي ان شاء الله لاباس
درنا البارح انا وامي هاذ الخبيزات وقلت لازم نطلعهم لانهم رووووووووووعة وبنان بزااف وخفاف وتغيير هم عبارة عن عجينة محشية بالجاج لكن لي يزيدهم بنة اننا نطيبوهم في الطاجين ماشي في الفور هوما المفروض يطيبو في المقلة او حاجة ثقيلة فوق النار لكن حنا نطيبوهم في طاجين التريسيتي المهم يتغطاو كي يعودو يطيبو
العجينة تجي رقيقة وتبان كيما عجينة الكسرة لكن راهي خفيييييييييييفة بزاف ومليحة واذا حبيتوهم مفشفشين ومنفوخين طيبوهم في الفور عادي يجي شكلهم مختلف
العجينة فيها 350 غ فرينة + م ك خميرة المطلوع +علبة ياوورت طبيعي +2 م ك زيت + نص م ص خميرة القاطو + 1 مص سكر + ملح ماء دافي
ذوبي الخميرة والسكر في شوي ماء وخليهم يطلعو وخلطي مبعد باقي المقادير عادي ولمي العجينة بالماء اعجنيها شوي و ديريها 4 كريات وخليها ترتاح

الحشو .. نقصو طرف جاج مكعبات ونقليهم في الزبدة مع شوي ملح
ثم نرحيه في الميكسور ونخلطلو دبشة ومعدنوس ملح فلفل وكمون ونص علبة ياوورت طبيعي

بعد ما ترتاح العجينة ساعة ونص نقسم كل كرية على 2 ونحللها ==راهي طرية وما تتحللش بسهولة = نديرو سرفيطة او نررشو شوي فرينة ثم ندهنوها بطبقة مليحة من الفرماج من الاحسن شاف ذوق زيتون

ثم نقفلها ونطيبها في المقلة ونغطيها اثناء الطياب
رايحين يتنفخو كي يعودو يطيبو ثم يهبطو وحدهم

وتقدم ساااااخنة مع اي حاجة تحبوو

ان شاء الله تعجبكم وتجربوها راهي رووووووووعة وخفيفة رغم ان العجينة رقيقة وادا حبيتو طيبوها في الفور
ملاحظة ..بعد ما تطيب تدهن بالزبدة
.................................................و بصحتكم..................سلاااااااااااااااااااام... .......................