عاداتنا في كل من المولد النبوي الشريف و كذلك الناير

لميس حواء · 2014-01-17, 19:33

السلام عليكم أخواتي اليوم جبتلكم البعض من عاداتنا في كل المولد النبوي الشريف و كذلك الناير الذي يصادف 12 جانفي من كل عام عاداتنا في كلتى المناسبتين تتشابه

في المولد النبوي نديرو تقنتة صباح المولد

نديرو بركوكس للغذاء (للأسف ما صورتوش) و نديرو التريد لي يحب يسقيه بالمرق و لي ما يحبش كيما عائلتي نحطوه مع الشاي

في الناير نديرو بركوكس – التريد و أيضا السفنج (هذا العام ما درناش ما لحقناش مع تقارب المناسبتين) و الاختلاف هو طبق بالبيض اسمه الخامر أو كاين لي يسميه المعقودة

و نديرو للأطفال خبيزات صغار و نزينزهم بالمكسرات و الحلوى على حساب واش كاين

بلإضافة للمكسرات و التمر و التين المجفف

آسفة لأني ما صورش كلش التحضيرات (نصور بالبرتابل نتاع أخي أحيانا موجود في البيت و أحيانا لا) و كذلك اظطررت نمسح بعض الأجزاء من الصور لأنو في كل هذه التحضيرات كانت كاينة فوضى

نتمنى تعجبكم الجولة في منطقتي و إلى موضوع آخر

user2010 · 2014-01-17, 20:21

شكرا حبيبتي يعطيك الصحةوكل عام وانت و كل الاهل بخير و ماشاء الله على الرقاق نتاعك

بسمه العمر · 2014-01-17, 21:38

ينعاد عليكم بالخير واليمني والبركات
ومشكوره ع المجهود

ام اريام · 2014-01-17, 21:45

يعطيك الصحة اختي والرقاق حنا نسميوه المفرمسة .

x ام رحاب x · 2014-01-17, 22:02

الله يعطيك الف صحة على الرقاق عجبتيني كيفاش درتيه

لميس حواء · 2014-01-18, 11:03

اقتباس:

المشاركة الأصلية كتبت بواسطة user2010

شكرا حبيبتي يعطيك الصحةوكل عام وانت و كل الاهل بخير و ماشاء الله على الرقاق نتاعك

مشكورة أختي و كل عام و انت و كل المسلمين بخير و عافية وبالنسبة للرقاق (التريد كيما نقولو احنا) هو لأمي ما نعرفش نديرو مليح

اقتباس:

المشاركة الأصلية كتبت بواسطة بسمه العمر

ينعاد عليكم بالخير واليمني والبركات
ومشكوره ع المجهود

شكرررررررررا أختي و ينعاد علينا و عليكم بكل الخيرات

اقتباس:

المشاركة الأصلية كتبت بواسطة ام اريام

يعطيك الصحة اختي والرقاق حنا نسميوه المفرمسة .

مشكورة جدا أختي (كنت نحوس دايما على التريد في الانترنت و كاش طرق و عفسات جداد و ما نلقاش و نقول ما كاش لي يدير التريد غير احنا و لا واش أتاري عندو أسماء أخرى شكرا أختي على المعلومة غادي نحوس عليه باسم المفرمسة)

اقتباس:

المشاركة الأصلية كتبت بواسطة x ام رحاب x

الله يعطيك الف صحة على الرقاق عجبتيني كيفاش درتيه

الله يحفظك أختي هذه الطريقة نتاع ناس زمان اليوم سمعت بلي يديروه فوق الطاجين نتاع الخبز (مقلوب) و أيضا في الكوكوط (ينحولها يديها و يقلبوها فوق الطابونة ) بصراحة جربنا كل الطرق لكن يجي التريد يابس تبقى الطريقة القديمة هي الأفضل

جلالي بلخير · 2014-01-18, 17:48

ماشاءالله بصحتكم انشاء الله لعقوبة للعام الجاي.
طبق بالبيض اسمه الخامر أو كاين لي يسميه المعقودة
ممكن الطريقة من فضلك

لميس حواء · 2014-01-18, 18:24

اقتباس:

المشاركة الأصلية كتبت بواسطة جلالي بلخير

ماشاءالله بصحتكم انشاء الله لعقوبة للعام الجاي.
طبق بالبيض اسمه الخامر أو كاين لي يسميه المعقودة
ممكن الطريقة من فظلك

بارك الله فيك ينعاد علينا و عليكم بالخير و البركات
بالنسبة لطبق البيض ناس زمان كانو يديرو بيض (عدد كبير ) - شوية فرينة حوالي ملعقة - شوية زيت - خمارة نتاع الخبز - كمشة زبيب
يضربو البيض مليح و يزيدو كامل المكونات و يخلوه يخمر و من بعد يديروه في حاجة ثقيلة و يديروه على النار و يلا كان امكانية يديرو نار من الفوق (جمر في سينية ) أنا الصراحة هذه الطريقة عمري ما جربتها و حتى أمي ما جربتهاش نجيو لطريقتنا (نتاع الفنينات )
نأخذ 10 بيض + 1 خمارة نتاع حلوى + نصف فنجان صغير زيت نخلط المقادير جيدا (لازم نخلطو حتى تدخل الخمارة مليح في البيض ) ندهن مول أو سينية بشوية زيت نفرغ خليط البيض و ندخلها الفرن و شهية طيبة