عوامات من عند أم محمد تاج تفضلو يالحباب

أم محمد تاج · 2013-02-22, 13:17

سلام حبوباتي هذا وين كملت العوامات على طريقتي على خاطر رايحة عند عجوزتي وقبل قلت نعتهم للبنات الحبوبات بالاك يستفادو على خاطر طريقة سهلة واقتصادية جدا جدا هام ليكم الصور مع الشرح:

حبوباتي في بول خبطي بيضة مع مغرف صغيرة سكر ونص مغرف صغيرة ملح وزاست حبة قارص خبطي مليح وضيفيلهم نص كاس حليب دافي وخبطي
ثم ضيفي نص كأس فرينة و3 مغارف صغار خميرة الكسرة ومقدار مغرف ونص سينوج وخبطي

وخبطي ملح ثم ضيفي مقدار كأس دقيق مع نص كأس حليب بالتناوب يعني مرة لوحي الدقيق ومرة الحليب حتان تكملي وتتحصلي على هاذ القوام ثم حطيها تخمار حتان يتضاعف حجمها تقريبا 45 دقيقة قدام الشوفاج

ثم حطيها في جيب حلواني وأثقبيه ثقبة صغيرة باه تقدري تتحكمي فيها ثم أقليه في زيت سخون وغزير وكي تكوني طيبي فيه لوحي عليه الزيت باه تتنفخ ويجي مثقوب من الداخل لازملك مهارة وخفة في هاذ العملية ومن جهة حطي العسل يسخن وكي طيب أول دفعة حطيها في العسل وخليها داخل الكاسرونة حتان طيبي الدفعة الثانية باه تنحي الدفعة الأولى باه يتشرب العسل خير وخير ثم حطيه في صحن التقديم وذرذري عليه الجلجلانية أو أي نوع من المكسرات

وهاذ الصحن رايحة نديه عند عجوزتي ربي يخليهالي نشالله قولو نشالله وهيا باي ونشالله نكون وفيت وشكرا لصبركن حبوباتي باااااااااي

بوعنينبة · 2013-02-22, 13:23

يعطيك الصحة

oum anas 69 · 2013-02-22, 13:24

ما شاء الله رائعة اختي ام محمد تاج شكرا على الترحيب بارك الله فيك

zhor1970 · 2013-02-22, 13:40

يعطيك الصحة حبيبتي وبصحة عجوزتك+

ام باديس · 2013-02-22, 13:56

يعطيك الصحة هايلة مع علمي ان الوصفة اصلها الحقيقي سورية

أم محمد تاج · 2013-02-22, 14:01

اقتباس:

المشاركة الأصلية كتبت بواسطة ام باديس

يعطيك الصحة هايلة مع علمي ان الوصفة اصلها الحقيقي سورية

الله يسلمك حبيبتي ونعم الوصفة الأصلية سورية حتى أصحاب الخليج يديروها بصح بطريقة مختلفة وأنا أستعملت طريقتي المختصرة ههههههه على خاطر هي في الأصل تتعجن وثم نجريوها هاذي هي وشكرا لك حبيبتي