الى التلمسانيات وحصوصا المغنويات

fatiha hana · 2014-06-04, 21:21

زرت الصيف الماضي مدينة مغنية لقيتهم يبيعوا توابل مرحية حرت في البنة كل اكلة مخصصين لها توابلها مخلطة وواجدة مثلا توابل خاصة بالبطاطا المقلية توابل خاصة بلحم الحلوة توابل خاصة بالسلطة توابل الحريرة توابل الطاجين والله اصناف من خلطات لا تحصى فلدا ارجوا من الاخوات اللي تعرف سر تركيبة كل صنف تقولنا انا شريت من كل موع شوية روعة ما تبخلوش علينا باش نوجدوهم قبل رمضان

fatiha hana · 2014-06-05, 17:21

واش حتى وحدة ما تعرف واش يديروا في هدا التوابل

fati13 · 2014-06-05, 17:35

شوفي ختي توابل نتاع لحريرة يجيو يهبلوااا وبنتهم رووووووووعة

fati13 · 2014-06-05, 17:41

كاين توابل كاين الفلفل الاسود القرفة المطحونة وكاين سكنجبير والكمون والكروية وكاين عود الاصفر

fatiha hana · 2014-06-05, 18:58

واش احتي هدي خاصة بالحريرة وحدها

fati13 · 2014-06-06, 11:04

واه اختي هدوا خاصة غير بالحريرة

fatimazahra09 · 2014-06-06, 11:45

حريرة تلمسان يحطو توابل فيها في الاول وحتى في التالي ... وما تصلح غير بالخميرة نتاعها لي تبات وهي لي تمد ذوق خاص بيها ما تصيبيه في حتى حريرة اخرى
وديري هاد LE LEVAIN بليلة من قبل :تحطي مقدار 2 م ك فرينة و قرصة ملح و على راس المغيرفة خميرة الخبز ... تبليها بشوية نتاع الماء وتحركي مليح و تغطيها وتخليها خارج الثلاجة الغد من داك رايحا تستعمليها في التدويرة يعني بعد ما تصفي الخضرة ...
وهدي طريقة تحظيرالحريرة :نحطو لحم و لا دجاج لعندك + ربطة قسبر وعود كرافس مربوطين بالخيط + 1 مك طماطم مصبرة + 2 حبات طماطم + 1 جزر + 1 بصلة كبيرة + م ص سمن + 2 مك زيت ... نقطع الخضر بشكل كبير ما يهمش
نحطو التوابل لي هما شوية خرقوم ( كركم )+ ملح + فلفل أسود + كروية + سكنجبير + زعفران + 1/2 عود قرفة + 2 م ك زيت ... وديري كلش فوق النار خليه تتقلى مليح مليح ... مرقي بالماء لي يلزم و غطي و خليه طيب من بعد لي طيب انحيو اللحم نصفوها في كسكاس ونعصرو مليح مليح هاديك الخضر بمقدار كاس كبير نتاع الماء و كي تغلي الحريرة فوق النارتزيدي 1 م ك طماطم مصبرة +ربطة قسبر + 2 م ك نتاع الشربة المقطفة ... لي يخدموها بالفرينة وقطرات خل ويلموها بالماء ويعجنوها مليح مليح و يبداو يبرمو خيوط صغر بين صباعتيهم ويعاودو هاداك الخيط يقيموه على شحال ويبرمو بين الاصابع ويحطوها تنشف في الهواء ... المهم و تزيدي هاديك الخميرة لي تكوني حليتيها بشوية صغيرة نتاع الماء في الصفاية باش ما ديرلكش الكويرات ...خلي كلش يطيب مع التحريك وعلى نار هادية بالطبع مدة 15 د على الاقل ... من بعد وجدي راس الحانوت ولي هو :
1/2 م ص قرفة +1/2 م ص خرقوم + 1/2 مص فلفل اسود +1 م ك كروية + 1/2 م ص سكنجبير+و نخلطوهم مع 2 م ك ماء ولا ثلاثة و نحطو اللحم لي كنا قطعناه طراف صغييرين ... نرجعوه و نديرو راس الحانوت و نحركو غلية واحدة ونطفيو و نحيو هادك القسبر ربطة ونعصروه و نغطيو باش ما ديرلناش الحريرة الفرارة نتاعها .... وكي تقدميها تبغي تزينيها بشوية نتاع القسبر مقطع وتدري عليها شوية كروية ...
انشاء الله نكون فدتك ... وما تستغربيش لمكان الاقامة ......... عندي عروق تلمسانية ...
جداتي الله يرحمها برحمتو تلمسانية ندرومية الاصل حفصية ... سلام
وهادو الروابط بالاك تصيبي فيهم راسك
https://www.vitaminedz.com/ar/Tlemcen...rticles/1.html
https://www.vitaminech.com/recherche_...064j3075110j16

souso30 · 2014-06-06, 19:31

Khti ana maghnawiya tawabil dyalna njibohom men maroc swalahom yhablo

mariz · 2014-06-07, 07:13

السلام عليكم
اختي كي تحطيلها levain ما تحماضش.
رح جرب طريقة التوابل لانو خلاصولي كنت من سنة لسنة نروح للجزائر مي هاد المرة صارلي سنتين ما رحت ،حتى محتارة كيفاش نعمل الحريرة بدون الدشيشة لانو مش موجودة في السعودية

fatimazahra09 · 2014-06-07, 15:37

اقتباس:

المشاركة الأصلية كتبت بواسطة mariz

السلام عليكم
اختي كي تحطيلها levain ما تحماضش.
رح جرب طريقة التوابل لانو خلاصولي كنت من سنة لسنة نروح للجزائر مي هاد المرة صارلي سنتين ما رحت ،حتى محتارة كيفاش نعمل الحريرة بدون الدشيشة لانو مش موجودة في السعودية

لالا ماتحماضش ... ولا عندك مشكل في التيشة تقدري تعوضيها ب2م ك المقطفة ولا ب2 م ك روز او 2 م ك عدس و لا حتى تسهل عليك حطي شربة فارميسال ولا لسان الطير ......
الله يعاونك في غربتك ويقدرك في عملك و يخليك مطيعة لدين الله انشاء الله ... رمضان كريم لكل عائلتك
سلام حبيبتي

:m h31: