مساعدة عاجلة لوجه الله قبل 23 ديسمبر

[Hamdi Capello]

السلام عليكم جميعا

والله القصة عاجلة و أتمنى لي يقدر يساعدني مدابيه

على كل حال عندي صديق قريب مني لدرجة كبيرة أكثر من أخ قريب يتزوج لكن عندو مشاكل يومية مع الزوجة لي مع العلم هو عاقد عليها وقاري فاتحة الكتاب وقريبا يكلمو العقد بزواج وعرس يعني
المشكل خاوتي أن زوجتو هاذي كثيرة المشاكل ويعني لما يتصل بيها أو يحدثها تتحدث معه ببرودة وأكثر من هذا هي ثقيلة معه وتكثر المشاكل يعني تشارشي المشاكل مع العلم خاوتي هو إنسان محترم ونعرفو مليح عاقل وخاطيه وفي حياتو ماعرف حتى طفلة و أول وحدة هي هاذي لي راح يتزوج بيها مع العلم هي العكس تماما لكن كيما نقولو وقت الصغر وهو مالمهاش على كل حال المشكل هذا راه قاتلو بزاف أنا شخصيا نصحتوا باش يتخذ موقف شجاع ويهني روحوا ولي فيه الخير عند ربي يبان لكن هو يحبها من قلبو ومايشوفش غيرها في الدنيا هاذي مع العلم أن ماشي عيب الحب الله أعلم

هو يريد نصيحة كيف يأدب زوجتوا هاذي ويجعلها تعرف قيمتو الحقيقية ويندمها على شي لي دير فيه يعني طريقة ناجحة قبل العرس

أسمحولي إذا طولت لكن العبد قلبو معمر كي يشوف خوه يتعذب !
أرجوكم أشيروا علي
السلام عليكم

الجديد في القصة خاوتي أن بعد النصائح المقدمة للصديق بعد مشاورته لناس كبيرة وناس فاهمة ورغم أن الكثيرين طلبوا من التريث وتأجيل العرس حتى يبان راس القضية من رجليها
قالي بالحرف الواحد : مانقدرش نجرح الطفلة وخي عندها شهرين تحضير للعرس من عند ربي مانقدرش نقيسها
صراحة راني زدت دخت في الأمر هذا ولكل من يقول شفنا القضية من جانب واحد أنا نقولكم لومان جيت مانعرفش صاحبي نقولكم ربما كاين كلام آخر لكن صراحة والله عمري ماشفتوا دار شر في واحد

[عطر الدنيا]

السلام عليكم
اخويا العزيز انا قبل ما نزوج بقيت عام عاقده و المشاكل هادي تعرضنالها الكل و المرا في الوقت هاذا تحب تدلل وتتعزز على زوج المستقبل هاذا هو ماكان ماكان
انا زوجي الحبيب كان كي يحب يادبني كان مايعيطليش و ساعات يظرب بالسمانه ما نسمعش صوتو لوين نهبل ساعات كي نعود مكثرتها معاه نعيطلو انا وساعات يعيطلي هو بعد ما يشفى عليا مانزيدش نعاودها هههه
نظن راهي الرساله وصلت

[z.abdo]

حاجة ساهلة كما قالت الأخت التي سبقتني

يمتنع الكلام لمدة طويلة حتى تعرف قيمتو بمانك قلت انه إنسان طيب ولم تحترمه ........والله اعلم اخي

[أم احمد3]

شوف الطلاق ابغظ الحلال وكعاد مادخلتش دارو
ادير كما قالولك الا مكانش حل الفراق قبل الدخلة افضل من بعدوه

[knives55]

هذي بديتتها هكذ

شوف قول الصاحب ولا ما تقلوش جيبوا يقراء ردود

شوف اخي المرأة لمتحترمش رجلها مهيش مراة نهايا

ولن تصلح زوجة ولا ام ولا هم يحزنون

ومهما عملتها و مشيت معها مسقم تبقاء دئما معوجا

لان دئما وابدا أمها تعمر فيها به تتحكم فيك

وانا من نصيحتي

خطيك منها طلقها ولا افسخ العقد

راك مراح تربح والوا

ونعرف انسان من عائلتنا

مراتوا هكذا

دئما المشاكل دئما تتكبر و تشرشي لبلاء

يعني تصور في بعض احيان تروح دار ببها بلا علم رجلها

أخي دنيا معمرا بنات

أدي لتشوفها تصلح و خليك من تتباع الزين

الجمال لن يدوم لاي مراة لكن القيم وأخلاق هي من تدوم

وهذي نصيحت خوك اذ راك حاب لهنا في حياتك

أجبد عليها نهائيا وشكرا

[it's me]

السلام عليكم
اولا نسقسيك شحال عندهم و هوما مخطوبين ؟؟؟ لانو حوايج كيما هادو ماي حتى ضرك ب يتهدرو و علا عقد عليها كي عاد ماهيش محترماتو
ثانيا انا نقولك بلي صاحبك هذا ماتعرفوش 100/100 لانو طريقة تعاملو معاك و طريقتو مع زوجتو تختلف تماما ممكن ماعرفتش الوجه الثاني اللي علاجالو راهي ديرلو هكا
ثالثا هاذي الحاجة ماشي انت اللي تقررها هاذي حياتو و هو اللي لازم يقرر
نظن مادام قادر على الزواج يعني قادر يتحمل مسؤولية قرار هو صاحبه
بالتوفيق

[sali-sali]

البنات يحبو يددلو و يعزو رواحهم على لي يحبوه


قوله ينصحها و يناقشها ادا ماحبتش هو يحاول يبدل عقليته معاها ومايساعفهاش بزاف
ولا مايحكيش معاه لمدة معينة يلقاها هيا تجري وراه

[sarl02]

الانسحاب فورا وخيرها في غيرها ...والله راح اتعييه بعد الزواج كثر وهذا وراح اشوف منها العجب .....وهذا موقفي لو كنت في مكانه والله لن ازيد معاها دقيقة وحدة لا حب ولا هم يحزنون ....لا شيء يمكن ان يراعى على حساب كرامة الانسان .

[أم رقية نسرين]

الأفضل أنو مايستعجلش في الطلاق لأنو ماهيش حاجة ساهلة

قولو ما يزيدش يتصل بيها لمدة و راح يشوف النتيجة بإذن الله لأنو ربما هو راهو يبينلها تعلقو بيها على هديك راهي تدلل عليه

ربي يجيب لي فيه الخير و يصلح بيناتهم

[adlan18]

أنا أعتقد أن العيب الأول راهو في صاحبك يبان لين بزاف يشبح روحو شوية

[b030771]

الباب الي يجيلك منه الريخ سدو استريح قبل ان تقع راس في الفاس

[nibrasse76]

اسمحلي صاحبك هذا ضعيف شخصية وخطيبته وصلت لهذه القناعة معاه ...ولهذا لن تتوقف على طلب التنازلات منه ...والاستهانة به ...الواحد يتزوج ليستريح من رحلة تعب طويلة وييشعر بالاستقرار ..وليس ليلعب لعبة القط والفأر تاع الذرية الخاسرة والعقول القاصرة .

[المتيقنة بالله سارة]

رانا نسمعوا من طرف واحد لي هو صديق الزوج وما نقدروش نحكموا على انسانة منعرفوهاش......وزيد لوكان جات المشاكل بالحجم لي ذكرتها كون هنى روحي بيديه.......يعني خلاصو في يدو...............وحقيقة لا احبذ تدخلك بينهما...وأرجوا ان تتقبل رأيي

[hfhgffgvf]

هو راه عارف مليح علاش راهي تعاملو هكا عاود سقسيه و انا ننصحك ما تحاولش تدخل لانو في المستقبل و خصوصا ادا اخد قرارو من نصايحك رايح يلومك ادا ما نجحش الزواج او العكس المهم الحاجة الوحيدة الي تقولهالو انو لازم يخمم مليح في اي قرار يتاخدو و بالنسبة لمشكلتو ممكن كيما نصحوك بعض الاعضاء الكرام يقطع عليها التيليفون مدة من الزمن و يشوف كيفاش تكون ردة الفعل تاعها

[لميس اميرة]

بزاف قتيات في فترة الخطوبة و قبل العرس يكونو مشوشين و مضطربين لأقصى درجة


يا درا هاد الراجل لي رايحة لعندو كيفاش رح يكون كيفاش راح يعاملني

و الكثير من البنات الخوف يتملكهم أي فعل من الرجل يكون ردها و رد فعلها شبه هجومي و كأنها بذلك تحاول دافع على نفسها أو تخفف من رهبتها

كما انو كثير من البات يكونوا عصبيات و حساسات لأقصى درجة قبل الخطوبة و لما يتملكهم الخوف لا اراديا يخلقو مشاكل و حتى ممكن تلقاهم يفكروا في فسخ الخطوبة كنوع من الراحة

و أنا يا أخي لا أظن ان هاد الفتاة لا تحترم زوجها ’ أظنه سوء تعبير منك فقك ’ فليس كل اختلاف في وجهات النظر بين رجل وخطيبته قلة احترام و الله اعلم