حدث في أيام الجامعــــــة..........

morad81 · 2012-10-03, 14:49

السلام عليكم :

يكثر الحديث عن الجامعة والجامعيين ومستواهم هذا على المستوى العام للمجتمع ....ويدور الحوار بين الجامعيين حول الظروف التي اجتازها طوال مدة الدراسة.

كما أن الشغل الشاغل للطلبة هو الإنتقال و التخرج في الوقت المحدد.

فكل منا صادف مشاكل خاصة مع الأساتذة . وما يقال عنهم في قضية النقاط بالمعارف و......و..... و....

فهل صادفت مشكلة مع استاذ ؟.....وهل شاهدت تصرفات استاذ في مجال النقاط مع أحد الطلبة أو الطالبات ؟

هي مواقف قد يتعرض لها الطالب أو الطالبة ...فلكم المجال لسرد تجربتكم .......تحياتي

ننتظر تجاربكم

مريم الصابرة · 2012-10-03, 15:48

السلام عليكم اخي
انا درست مدة سنتين فالجامعة لكن الحمد لله ما صاوش مشاكل مع أي استاذ فقط كان كاين أستاذ حاطني في راسو العام الاول لكن لما فقتلةو وليت نتحاشاه وما نعطيلوش الفرصة وايضا لما نلقى نقاطي ناقصين ناقش هذي طبيعة فيا لكن شفت تمييز بزاف فالنقاط خاصة للبنات الي محط إعجاب الأستاذة راك عارف هذا المجال شكرا على الموضوع.

اسلام انس · 2012-10-03, 16:02

السلام اخي مراد وصلت للحــــــــــــــين..........نقاط الاساتذة راهي كيما عقليات الطكسيار لي كتبت عليهم اختي مـــــريم

في موضوع ناس وعقليات...............الاستاذ ليا عجبتها الفتاة بلع ليها العام اما الشاب فيبقى احيانا رهينة الحفظ

حضنية28 · 2012-10-03, 16:04

السلام عليكم انا صراحة الاساتذة معايا كانو ملاح الى حد الان الا استاذ واحد كان يتعامل بالمعريفة والمحسوبية كان يجي يقرينا ويعطينا ملخصات انا نكتبهم في كراسي المهم كي قربت الامتحانات قالنا اشريو البوليكوب راهافيهم الدروس كامل ضهر بلييتعامل مع مكتبة باه تمشي السلعة يتسمى اللي حضر واللي محضرش كيف كيف في الامتحانات درنا الموديل نتاعو وصراحة انا جاوبت ولكن معطانيش حقي خلاص لانني مشريتش البوليكوب نتاوعو واللي كانو ميحضروش داو خير مني ولكن الحمدلله طلعت عامي بالفور وتهنيت

مريم الصابرة · 2012-10-03, 16:06

اقتباس:

المشاركة الأصلية كتبت بواسطة بن عمير 22

السلام اخي مراد وصلت للحــــــــــــــين..........نقاط الاساتذة راهي كيما عقليات الطكسيار لي كتبت عليهم اختي مـــــريم

في موضوع ناس وعقليات...............الاستاذ ليا عجبتها الفتاة بلع ليها العام اما الشاب فيبقى احيانا رهينة الحفظ

السلام عليكم اخي بن عمير راك حاب تخدم طاكسي
وي خويا هذي هي اللي تعجبو تدي النقاط واللي لالا يجيبها عقابها حتى كان تعجبو وما تقبلش ثاني يحطها في راسو راك عارف جو الجامعة لكن الوضع الاعوام هذو واد تازم بزاف وراني نسمع بحكايات الأساتذة والطالبات ربي يهدينا والله ونجيب ولادي فالجامعة ونعاود كل عاوم ولا نسمح لاستاذ على جال نقطة يكون له دور في حياتي من غير كونو استاذ واجبي إحترامو وبرك شكرا

عميروش الحر · 2012-10-03, 16:38

انا الحمد لله الاساتذة ما مداسرهم ما نعرفهم ما يعرفوني كاين لي يعطيني حقي وكاين طبعا لي ينقص وكاين لي يزيد .. مخليها لربي وخلاص .. ولكن في حياتي ما نتوسل استاذ نقولو زيدلي نقاط كيما يديرو الطلبة الاخرين ...

خولة لبابة · 2012-10-03, 16:55

مازال ما بديت القراية في الجامعة...........الله يسلكها على خير......ان شاء الله.....

سعاذ · 2012-10-03, 18:11

السلام عليكم
الحمد الله انا قريت في الجامعة ماشاء الله الاساتذة تاعها معروفين على مستوى الوطن صح نقطة مانجيو نديوها بسيف كيما نقولوا مايديها غير لي يستهلها و جامي كان هناك تميز بين لبنات و ذكور.مشكلتي انا في الاختصاص تاعي انوا موديل لي ناس مايديوش فيهم انا كنت ماجوري بصح لي موديل لي ناس كانوا يعوضو بيهم انا تقريبا ندي اسوء العلامات
حجا لي مازلت تحرق في قلبي حتى الان انوا خطرى نرمالموا و الله اعلم استاذ غلطلي سيري كامل و انا نجري باش نشوف ورقة تاعي بصح ماشفتهاش صح في سيري 2 ديت اكبر علامة بصح بقات تحرق في قلبي علامة الاولى
و تاني كان عندنا استاذ لماجور لي يدي عندوا 5 و انا و صحباتي كنا ناوين نكسروا القاعدة مالهيتك سرنا ليل كامل و حنيا نقراو و نحلوا في التمارين و ذي المرة اولي لي مانرقدش غير ساعة و كي افيشلنا نقاط خيتكم دات 0.5 و من هذي العلامة و تجربة حلفت مانزيدش نسهر
و تاني انوا دخلنا نقراوفي 750 شخص من مختلف الولايات بصح كي تخرجنا كنا 150 شخص
دمتم في رعاية الله و حفظه

الواثق · 2012-10-03, 18:23

بالنسبة لي لم اتعرض لاي استاذ سوى استاذ واحد في مادة الفيزياء الحرارية .........اخذت الاختبار الاول 2 من 20 فقلت الرترباج اكيد ولاني غير معتاد بالرترباج درت القلب قلت الاختبار الثاني نخدم ونشفا خرجت الكتب حتى باللغة الروسية وقديمة وقريت المادة حتى اصحابي يقولولي راهو جاء الترمو ديناميك تاعنا .........المهم فوتت الاختبار وخرجت فرحان وصدمت بعدها بالنتيجة 1.5 من 20 وقال لي الاستاذ راك حافظ الحل ؟؟؟؟.............فتخاصمت معه وهو استاذ معروف بتعنته وطرده للطلبة وقال لي حاسبني عند ربي الدنيا راك ماتقدرليش .......فقلت له الحساب عند الله اكيد ووكلت عليه ربي خرجت منهارا يومها ولكن بعدها بيومين ظهرت نتائج العمل المخبري وتحصلت على اعلى علامة وخرجت ذلك المقياس ب 5 من 20 وخرجت من النقطة الاقصائية ................كما ان هذا الاستاذ وضعني في حصة اعمال مخبرية لوحدي واختار بنتين ليعملا معي شغل زكارة والله المستعان

وكانت استاذة علم النفس تحب مناقشتي كثيرا واذا تغيبت تسأل عني وفي الاختبار بدون مراجعة نلقا 15 16 من 20 بالرغم اني نقدتها في كل مواضيعيها لكنها كانت طيبة وتحب الاراء الدينية اغلب زملائي يدو عندها تحت العشرة

والله هناك الكثير من الاساتذة روعة ..........وتذكرت استاذ مخبر الالكترونيك كاين اي واحد يغضبه يرمي المقاومات والوشائع في الطالب هههه وهو قبايلي الفرنسية والعربية والقبايلة جاملهم كامل ويهدر بيهم وارواح انت وفهمو

ذكريات رائعة

soriaalg · 2012-10-03, 19:03

السلام عليكم للاسف هذي هي الجامعة اتذكر ايام الامتحان كنت نرقد على 12 ونوض على 2 صباحا كنت نرقد زوج سوايع برك ولما نستيقظ انزل لأتوظأ اجد بعض البنات مازالو يقصرو ويحكو ويلعبو كنت نستغرب ولما يجي وقت النتائج الحمد لله ننجح وكل سنواتي ب 2 كونترول وهم رغم استهتارهم لكنهم ينجحون كانت ديرلي علامة استفهام كبيرة في راسي
بالنسبة لاساتذة لي قراوني نعم فيهم هذا الصنف لكن الحمد لله ربي فكني منهم انجح بجهدي ولم احتاج يوما لهم حتى لي ما يعطينيش حقي يمدلي 10

الدراســــــــة في الجـــــــــامعة كبر عليها اربعـــــا

ملاحظة للاخ الواثق ههههه فكرتني في الترمو ديناميك + نقاطك تدل على انك قراي لانو ديت قاعدة في راسي وخاصة بالنسبة للشعب العلمية لي ما داتش اصفار في الجامعة مش قرااااااااااي

soso sirin · 2012-10-03, 19:04

في الجامعة كاين شيوخة بزاف مايصلحوش و ولات عندهم النقطة تبزنيس و طريق يوصلهم للشي الي باغيينو.كاين ناس كنت معاهم و الله الباب تاع لونفي مايعرفوه وين جاي و كي نلقاهم مخرجين العام نتشوكا.انا الشيخ في حياتي ماتبعتوش و لا قتلو زيدني نص نقطة .انا قريت دويا على هكا كان لازم نجيب عامي نيشان باه نقدر نكمل ليسونس .وحد المصيبة قراتني انجليزية من زهري المليح ماحملتنيش ماعلاباليش علاه من نهار الاول كرهتني انا الصح ماقيمتهاش لانو علابالي قادرة نسلك راسي معنتها تبغيني تكرهني هذاك شغلها.في الافيشاج تالي لالة افيشاتلي 8 في الاختبار و انا خدمت مليح قعدت نحوس عليها نهار كامل و ماصبتهاش جراتني كيما الهم شقيت حتى للشيوخة الي قراوني و وصيتهم عليها غدوة منذاك تلاقيتها قتلها باغية نشوف ورقتني لالة واش تقولي ماتشوفيهاش هاذيك نقطتك قتلها من حقي نشوفها قاتلي امالا فوتي قدامي و بالزعاف تقول راهي تصرف عليا قلت ماعليش كي جابتهالي تحسب راهي تخرج البترول من حاسي مسعود قاتلي شوفتيها قتلها مديلي نموذج التصحيح باه نقدر نقارن قاتلي انا مانمدولكش قتلها و هاذي كيفاه قاتلي راهي قدامك الادارة و روحي تشتكي شفت فيها قتلها نقلك حاجة انا مانشتكيش لعبد لانو ماعندو مايديرلي مي روحي انتي سلكيها مع مول العبد ان شاء الله .قتلها و اذا بعينك على النقطة انا مانحتاجهاش لانو عامي راه خارج و الحمد الله و خارج بمعدل مليح.كرهتها ذيك الشيخة و الله مانسمحلها.اما الشيوخة الي قراوني والله الحمد الله الا كاين الي باين نيشان.وحد النهار كي هبلونا قتلهم كون غير روبو يولي يصحينا وراقينا على الاقل هنا نضمنو حقنا نيشان و بلا حاجات وخدخرى .

شيء من رجاء ! · 2012-10-03, 19:10

وعليكم السلام ورحمة الله وبركاته
ذكرتنا بالذي مضى .. كانت أياما جميلة وكانت مشاغباتنا كبيرة ..
الحمد لله لم أتعرض لظلم من أي أستاذ سواء في نقطة أو معاملة ، لكني كنت مشاغبة كثيرة النقاش ، كان أحدهم يقول لي أنت مصيبة " أقول مصيبة من محقة أو من بلية ، يقول الاثنين " ، فإن شاء الله يكونوا هم راضين عني

الزير سالم · 2012-10-03, 19:29

الله يرحم ايام الثمانينات والتسعينات

mangood · 2012-10-03, 19:41

كي هبلونا قتلهم كون غير روبو يولي يصحينا وراقينا على الاقل هنا نضمنو حقنا نيشان و بلا حاجات وخدخرى .

الحمد لله حنا رانا يصحولنا بلوجيسيال نخلصو الكونترول ساعتين نلقاو لافيشاج تحط ههههه بصح مايرحمكش يمدلك ب0,07 هههه نورمال
انا مزالني نقاسي ادعولي نكمل ونتهنا

منهاج · 2012-10-03, 21:06

السلام عليكم

الله كانت ايام ايم الجامعة ليتها تعود ،كنت طالب مجتهدة في اكثر المقاييس وفيه مقياسين ندي فيهم نقاط

ضعيفة والنقاط الجيدة تغطي على الضعيفة والاساتذة خاطيني وخاطيهم لانوهم كي يشوفوك تحاول فيهم يجروك