حصريا ارز ودجاج محمر على الطريقة الخليجية من مطبخي بالتفصيل

ninafret · 2012-09-03, 10:47

السلام عليكم هده الارز بالشاعرية ودجاج على الفحم فقط انا عملتو في الفرن هده الطريقة تعلمتها لما كنت في السعودية وراهالي واحد عندو مطعم في المدينة المنورة اسمو مطعم القارات دقتو عندو وعجبني بزاف
انشاء الله يعجبكم
دركا راني نحط الصور ولي عودة نحط المكونات والشرح بالتفصيل
الوصفة والطريقة نزولا عند زغبتكن اخواتي
الطريقة
تشوحي الدجاج على نار قاوية جدا في مقلات فيها شوية زيت حتى يكتسب اللون الدهبي وهكدا يحافظ على العصارة اللي فيه
تخلطي كل التوابل اللي هي كسبر+راس الحانوت+كمون +زعفران+بودرة الكاري ادا موجودة+بابريكا حلوة او حارة حسب الرغبة+ملعقة كبيرة عسل+ملح+فلفل اسود+2ورقات رند+شوية روز ميري او اكليل الجبل+ثوم مدقوقة تدهني بيهم مليح الدجاج المشوح مع هداك الزيت وتحطيه ميرتاحو ساعة او اكثر وادا ماعندكش الوقت دخليهم مباشرة الفرنفي صينية فيها شوية ماء او مرق دجاج نصف كاس تقريبا على220درجة مع التقليب من وقت لاخر حتى يتحمرو
في هدا الوقت تكوني غسلتي كمية من الارز في شوية ماء ثم انقعيها في الماء ربع ساعة مع تغيير الماء كل 5د تم خليه يقطر مليح حتى يشيح
في مقلات حطي مغرف كبيرة زيت وزيديلها كمية من الدويدة او الشاعرية وحمريها على النار وخليها على جنب
في طنجرة ديري مغرف زبدة+مغرف زيت وحطي الروز وقلبي حتى يولي شفاف زيديلو بصلة مرحية مع 2سنات ثوم وخلطي وزيدي الشاعرية ومرقي بالماء والمعيار المعتمد عندي دائما هو كاس ونصف ماء لكل كاس ارز زيدي الزعفران والتوابل حسب الرغبة انا درت زعفران وكاري وورقة رند وشوية ملح فقط لان الرور يتملح كي يطيب والشيء المميز هو نصف عود صغير قرفة +حبة قرنفل انا كي دقتو في السعودية وجدت بنة غريبة لكنها شهية حتى عرفت السر اللي هو القرفة والقرنفل هما يسموهم الدارسين
المهم كي يغلي الخليط مع التحريك المستمر غطي الطنجرة ونقصي النار وخليه من 10 الى 12 دقيقة وكي تنزعي الغطاء شوفي ادا طابت الحبات خليها تبرد شوية وزيدي الملح حسب الرغبة وخلطي بالفرشيطة حتى ماتتكسرش الحبات وفي وقت التقديم اسقيهم بالصلصة اللي نزلت من الدجاج وادا لقيتيها خاثرة بزاف زيديلها شوية مرق دجاج وغليها شوية
انا زينت الطبق بوردة من الطماطم وشوية من السيبولات اوالثوم المعمر