نحتاجك ادخلى عاونينى تعييييييييييييييشي

حياتي نبع امل · 2012-10-01, 10:20

ارجوكم ما تبخلوش عليا ولو بابسط الافكار او الطرق هاد المشكل راه يواجه اعز وحدة عندى اللى هى اختى عندها زوجها انانى يحب روحو وماليه لدرجة مايخليهاش حتى تكلم اهلها بالهاتف اصلا نحاهولها ما عندهاش او ما يخليهاش تزورهم لازم تحلال كبير وادا كانت عندهم سبة فرح او اى شيء لازم تروح وتولى ماتباتش يعنى جامى تتلاقى بالعايلة الكبيرة والشابة يقولها ما تلبسي ما تماكييى ما تمشطى اقعدى هكداك اما فى عرس اماليه تروح للحفافة تلبس يبعثها قبل الفرح وبعد الفرح باه تعاونهم ومازال الخير للقدام لى تكملة فى الموضوع

آلاء النايلية · 2012-10-01, 10:26

هذا ملقاش لي يوقفو عند حدو لازملو جماعه تاع رجال كبار من أهل الطفلة باش يعرف بللي مش وحدها و عندها على من تسند ظهرها و يهدرو معاه و يخوفوه

آلاء النايلية · 2012-10-01, 10:26

ربي يجيبلها لي فيه الخير و يهنيها

أم احمد3 · 2012-10-01, 10:34

مريض من الشك والغيرة لذا يجب ان يذهب للطبيب
بقوة شخص ما

it's me · 2012-10-01, 10:51

kima gatlek alaa hada lazmou darba s'hiha w maliha win rahom?? rabi yfarej 3liha

مريم الصابرة · 2012-10-01, 10:57

السلام عليكم اختي
هذا مريض موسوس ولازم توقفو عند حدو لازم يدخلو اهلها باباها خاوتها تروح عندهم وتخليه ولازم يدخلو الأطراف لفك الخلاف هذا ويعرف باللي عندها اهلها مسيكنة كاين بزاف حقارين ما يعرفوش قيمة المرا صح ما تروحش لدارهم كل يوم على الأقل مرة فالفال وفالمناسبات تعاون اهلها هذي جامي شفتها الله يهديه مسيكنة يا اختي إنت اهلك لازم يعرفو ويحكو معاه موفقة ربي يهديه.

sali-sali · 2012-10-01, 10:59

لازم تحكي لباباها و خوتها و هوما يهدرو معاه كيفاش هدي والديها و عايلتها يحرمها منهم حتى تقعد تحاول فيه هدا راه مريض وباينة هي تخاف منه بزاف
كاين احترام و طاعة الرجل مكاش خوف منه

قاتلة الصهاينة · 2012-10-01, 12:55

اوااااه حرام عليه هذا ميخافش ربي؟؟
ربي يهديه

حياتي نبع امل · 2012-10-01, 14:09

لكل من ردت عليا الله يحفضكم بالنسبة لتدخل الاهل تدخلو مرة ومن هداك النهار قالها داركم مانقبلهمش يدخلو لداري ومسكينة اتخيلو كى زيدت المرة الاولى اهلها راحو ليها للسبيطار شافوها من تم ماشافوهاش حتى راحت رافدة وليدها مولا شهرين وهو ما يروحش لنسابو لا اعياد ولا مناسبات وهى ماشى تخافو اولا تخاف ربي فيه تانيا على جال اولادها عندها 2 طفل وطفلة وهو مع العايلة تاعو فى دارو يعنى لاباس بيه يحب ولادو معيشهم كيما يحب الخاطر وحتى هي يخرجها تحوس عايشة لاباس بالصح المشكل هدا ماخلاهاش تحس بالحياة اللى راهى عايشتها اتخيلو كاين بزاف ناس قالولها كيفاش ماتعيطيش لماماك وهى ماتعيطلكش هدا ظلم قالولها ديرى تليفون بلا ما يعرف قالتلهم نقدر ندير ولوكان يطلع للسما مايعرفش بللى عندى تليفون بالصح نخاف من ربي اي خطوة جى ديرها لازم توزنها مسكينة والله الناس يصبرو ينالو وهى ماكان والو بابا وماما راهم مراض على جالها ماما فى الليل ماترقدش تبقى غير تخمم عليها وهو حسبي الله ونعم الوكيل

الحطاب سهام · 2012-10-01, 14:34

شوفي يا اختي ياك اختك راهي عايشا حياة جميلة خلاص !!!!!!نعرف بنات تزوجو بعاد على دار ماليهم ومايشوفوش دارهم حتى ب 3 سنين وصابرين .بصح يا اختي قولي الصراحة .شا صرا باه زوج اختك ولا اخذ موقف من داركم هكا؟؟؟ راكي تقولي انو يخرجها ويحوس بيها يسما هذا ماشي غيار لحد المرض ؟؟؟؟طولوا بالكم ياك المهم اختكم راهي لاباس؟؟؟؟وانتم خلاص ديرو في بالكم راهي تزوجت بعيد وخلوها تعيش طرونكيل ياك راه مهنيها هذا المهم .وصبروا ميمتكم وفهموها بلي اختكم راهي في عنق راجل خلاص لازم تصبر عليها وذكا الحمد لله غير اختك تصبر برك ذكا يكبروا اولادها ودخل انتارنات وتولي تهدر معاكم بالكام ..صدقيني ...كاين رجال في السنوات الاولى نتاع الزواج يحب يستعرض عضلاته وخاصة امام اهله ومع الوقت ذكا يبرد وتولوا تشبعو من اختكم وتشبع بيكم
خلو اختكم تدير الدار واتمنولها ربي يهنيها وتنتلا في اولادها وفي دارها وخلاص مكتوبها جا هكا ترضى بيه وتصبر وصدقيني كي يكبرو اولادها ذكا هما يولو يجيبوها حتى لعندك ....

حياتي نبع امل · 2012-10-01, 15:07

اختى سهام شكرا على مرورك رانى معاك فى مسالة انو المهم راهى مهنية معاهوخاصة ادا ماشى على جالها على خاطر الدرارى بالصح نحطو العقل بجهة والهبال بجهة ماجيش لدارهم اذاحب كل 10 سنين هو حر بالصح انها ما تكلمش ماماها بالهاتف ماشى نورمااااااااااااااال شكون تقدر تصبر على ماماها ما تشوفهاش او ماتسمعهاش بالشهور والله ماراهى ساهلة وزوجها قتلكم خدا موقف من دارنا على خاطر راحو ليه وقالولو الطفلة ادا ماراكش حابها ماشى بهاد الطريقة امساك بمعروف او تسريح باحسان بالصح تانى مانقبلوش تعيشها فى الظلم خاطر كان دايرها كيما الخديمة على دارهم كى تكون مريضة وراقدة يقولها نوضى تخدمى وكان يقوللها نحب كى نوض الصباح مانلقاكش قدامى لازم تكونى توجدى فى كاش حاجة مع قهوة الصباح قبل الفجر باش كى ينوضو باباه او يماه يصلو الفجر يلقاو القهوة واجدة مع كاش حاجة وهاد الشى كان ماعندهاش اسبوع مللى تزوجت وكانت تدخل لغرفة خواتاتو وهوما يتفرجو تخمللهم فراشهم وتنظفلهم الغرفة وتمسحها وهوما كامل كبار قد الزواج ودارهم الله يبارك كبيرة مللى تنوض وهى غير مع الشغل بزااااااااااااااف

الحطاب سهام · 2012-10-01, 16:25

اقتباس:

المشاركة الأصلية كتبت بواسطة حيهتى كلها امل

اختى سهام شكرا على مرورك رانى معاك فى مسالة انو المهم راهى مهنية معاهوخاصة ادا ماشى على جالها على خاطر الدرارى بالصح نحطو العقل بجهة والهبال بجهة ماجيش لدارهم اذاحب كل 10 سنين هو حر بالصح انها ما تكلمش ماماها بالهاتف ماشى نورمااااااااااااااال شكون تقدر تصبر على ماماها ما تشوفهاش او ماتسمعهاش بالشهور والله ماراهى ساهلة وزوجها قتلكم خدا موقف من دارنا على خاطر راحو ليه وقالولو الطفلة ادا ماراكش حابها ماشى بهاد الطريقة امساك بمعروف او تسريح باحسان بالصح تانى مانقبلوش تعيشها فى الظلم خاطر كان دايرها كيما الخديمة على دارهم كى تكون مريضة وراقدة يقولها نوضى تخدمى وكان يقوللها نحب كى نوض الصباح مانلقاكش قدامى لازم تكونى توجدى فى كاش حاجة مع قهوة الصباح قبل الفجر باش كى ينوضو باباه او يماه يصلو الفجر يلقاو القهوة واجدة مع كاش حاجة وهاد الشى كان ماعندهاش اسبوع مللى تزوجت وكانت تدخل لغرفة خواتاتو وهوما يتفرجو تخمللهم فراشهم وتنظفلهم الغرفة وتمسحها وهوما كامل كبار قد الزواج ودارهم الله يبارك كبيرة مللى تنوض وهى غير مع الشغل بزااااااااااااااف

يا لعزيزة والله هذا حال معظم الزوجات ...شفتي راكم هدرتو معاه زاد ضيق عليها ...تتحمل وتصبر وصدقيني والله غير ذكا تكبر ويكبرو اولادها وكلشي يتبدل .صدقيني الاعوام الاولى نتاع الزواج دائما صعيبة وبعد ذلك يتبدل الحل تماما .والله تصبر برك وكل وحدا راهي عندها جبل فوق راسها ...لازم حنا لبنات نصبرو ونتحملوا والا وحدا فينا ما تدير الدار.صبروا اختكم برك وكل عمل تقوم بيه في البت تؤجر عليه وان شاء الله ذكا يتزوجو اخواته وتولي هي ساس الدار .دائما الاعوام الاولى نتاع الزواج جايا هكا وصدقيني كي يكبروا اولادها راهي المراة تحس بالقوة وكتافها حاميين وتولي عادي تجي لعندكم

بنت الرّحّل · 2012-10-01, 17:14

ما شاء الأخت سهام لم تقصر

هناك بعض المشاكل لا حل لها سوى الصبر وطلب الفرج من الله

لأنه أي موقف غير موزون يؤدي إلى عواقب وخيمة

هذه النوعية من الأزواج مخيفة جدا ...

لكن ماذا تفعل المرأة حين يكون نصيبها كذلك هل تدمر حياة أطفالها من أجل أن تذهب عند أهلها أو تكلم أمها

ربي يعوض عليها

منذ أيام أخبرتني أختي عن جارة لها اشتكت لها عن سوء المعاملة الذي يعاملها بها زوجها المسكينة هددها بالطلاق وهي أصلا رأت كيف تطلقت أمها وعاشت عيشة سيئة
حتى أختي قالت لي بأنها تعرفها جيدا وأبدا لم تشتك هذه أول مرة وأرادت مساعدتها

في الحقيقة ما شاء زوج شقيقتي هادئ ورزين حقيقة وقلت لها لا يوجد إلا زوجك يحاول يذكره بالله وبحقوق الزوجة
وما شاء الله مثّل الدور على أكمل وجه دون أن يعرف جاره بأن زوجته هي التي اشتكت منه

كل يوم يخرج معه ويفتح الموضوع معه بالتلميج .. واتفق مع صديق آخر يتظاهر أمامه بنفس المشاكل التي تعاني منها زوجته
والثالث يقول له أنت ما شاء الله زوجتك فيها صفات حسنة ليس مثلي ...( قدح فيي زوجته ولو سمعته تعطيه حقه

)

صديقني في ظرف ثلاثة شهور فقط اتصلت بشقيقتي وشكرتها كثيرا على المساعدة التي قدمتها لها وأخبرتها أن هناك تغيرا ملحوظا في معاملته معها

أسأل الله أن ييسر لأختك الخير ويهدي زوجها

حياتي نبع امل · 2012-10-01, 17:23

سهومتى بارك الله فيك
بنت الرحل بوركت اخيتى على مرورك العطر
مشكور كل من ساعدنى بنصيحة او وجهة نظر او حتى الاحساس بالمشكلة

حياتي نبع امل · 2012-10-01, 17:27

ما بقالى غير نقول كل من يشوف هاد المشكلة ويقراها نطلب منو طلب انو يرفد يديه او يديها وادعو رب البرية انو يهديه ويفرج عليها ويعوضها هى وكل المغبونات يارب ان شاء الله