كعكة عيد ميلاد ابي... ضروري تدخلو....

[samsoon city16]

السلام عليكم
اليوم راح تدخلو مطبخ سمسون pour la premiére fois
احم أحم و بالتفاصيل المملة
وصفة ساهلة درتها في عيد ميلاد والدي
الععكة ماشي جينواز كيما اعتدنا في الباتيسري
هادي وصفة mousse au chocolat
سمعتها صديقة ليا في البهجة FM
وانا درت منها 2 طبقات و زينتها بـــــــكريم شنتيي و...و...

تفضلو سيداتي اوانسي سادتي
مع المقادير الموضحة في الصور:

8 بيضات

4 كيسان سكر

3كيسان حليب

2 كيسان زيت

8 مغارف بودرة كاكاو

4 خميرة نوارة

500غ فرينة

extrait تاع البندق

للتزيين شوية تاع شنتيي بودرة أنا شريت قيس 80دج .... مكسرات ... شكلاطة مبشورة... كيما حبيتي...

هادو المقادير تاع 2 mousse au chocolat
راني مدوبليا المقادير لي حبت ديرها وحدها تقسم كلش على 2

درك نجوزو سيداتي للطريقة تفضلوا مشكورين :

أو حاجة نشعلو الفور ديالنا يسخن

نقسمو بطبيعة الحال المقلدير تاعنا على 2 لأنو رتح نديرة طبقتين

نخلطو كلش بارد الحليب، السكر ، الزيت، وحطوه غير يدفا باش يمتزج

و نضيفو الكاكاو و نحركو

غير يرفد الغلية نحيوه من النار و نحركوه حتى يبرد

نحيو منو كاس من بعد نستعملوه باش نشمخو لاموس

نضيفو ملعقة كبيرة لكستري تاع البندق للنكهة

و الآن نبداو نضيفو البيض (4) واحدة بواحدة و نضربو مليييييح هاد الشي لي يخليها تطلع مليح

و درك نضيفو الفرينة (250غ) بعد ما ننخلوها باش يدخلها الهواء

ثم الخميرة (2)

و نتحصلو على:

ندهمو الصينية مليييييح بالزبدة

و نحطو ها داخل الفرن مدة 30د و عينك ميزانك حتى تتنفخ لكن ما تفتحيش عليها باش ما تحبطش طفي الفرن و خليها

كي تبرد تدريجيا اقلبيها:

و تتحصلي على:

من بعد تسقيها بهاداك الكاس لي نحيتيه من قبل:

قلنا أنو العملية نطبقوها مرتين لنتحصل على:

و الآن سيدتي كيما راكي تشاهدي ا وقت التزيين:
نحظر كريم شنتيي تاعي نضربها مع حليب بارد:

نطلي الطبقة الاولى و نضع فوقها الثانية

و نبدا نزين

انا ما عنديش هاديك la poche patissière ألور خدمتها بساشي حليب تقبتو و حطيت la douille

وضعت الشكلاطة مبشورة على الجوانب

رشة كاكاو و شوييييييييييييية بيستاش و مبروش الليمون

و كتبت لكن غلطت (bon anniversaire ) ماعليش خطأ من دفاع سعدان ...حليش و بوقرة كانو غايبين

و أشعلت الشمعة في الوسط

و تفضلو شهية طيبة
خفيفة و سهلة :

واش رايكم