مشكلتي

[مشكلتي]

السلام عليكم
شوفوا والله غير راني مخنوقة،أنا بنت عمري 21 سنة نخدم ونرجع للدار بعد الخدمة،في هاذ اليامات عاد واحد يديرونجيني مع الطريق،يقارع لي قدام الدار كل ماننزل من البيص نلقاه قدامي ويبدا يهدر،أنا والله مانردلو بالصح راه يوصل حتى للدار ووالله عدت نحشم،ماتتخيلونيش لابسة القصير ولا الضيق والله والو حجاب ومهبطة راسي من لي نخرج من الدار حتى نرجع بالصح هو تقول يسالهالي مانعرف علاه يدير هكذاك،خبروني رحم باباكم كيفاش ندير معاه؟؟وماتقولوليش قولي لباباك ولا ليماك راني نموت بالحشمة قبل ماينطقها لساني،حاجة واحدة اخرى مين يومين خطبني شخص لاباس عليه بالصح شرطلي الخدمة،أنا مانعرفوش بابا قال لماما باه تعرف رايي،صليت الاستخارة وناوية نقول ايه وراهي جايتني ثقيلة باه نعاود نفتح الموضوع مع ماما بالصح من ناحية الخدمة راني خايفة يرفض وأنا غير العام لي فات بديت الخدمة والصح مانيش ناوية نبطلها،ومن جهة أخرىباغية نتخطب ونتزوج
والله راني حايرة وزيد كل ما نتفكر هذاك الطفل لي بعاكسني مع الطريق والناس لي يقيسولي معاني في الطريق تغيضني عمري والله كل ما يقيسلي واحد كلمة في الطريق نبغي نبكي
نتوما واش رايكم؟؟

[nasser26]

خبري عليه خوك و لا باباك

والا الشرطة ======= يحك عام حبس باش مايزيدش يعاود

[حزن بحر]

ربي يبعدو عليك ان شاء الله
ماتزيديش تروحي وحدك للدار

[سطايفية بكل فخر]

خبري امك ومتقوليليش نحشم منها لانو الام صديقة لبنتها
تبانلك برك صعيبة مي قوليلها لانو كاش ميقدر ربي ويتبلاك ولا يقلهم هي لي تحوس عليا يكونو اهلك علابالهم ويحاسبوه ويوقفوه عند حدو
+
بالنسبة للزواج اختي ادا كان الشخص كافي روحو وكافيك وعلاش تشقاي فالخدمة برا اقعي ربي ولادك احسن
وزيد حتى لمتزوجات ويتبلاوهم فالطريق
=
صلي صلاة الاستخارة واحكي في هدا الموضوع ايضا مع يماك
حشمتك ماهيش رايحة توصلك لاي بلاصة واصلا وعلاش تحشمي من امك هي سترك وغطاك ولي تعرف صلاحك وتنصحك احسن من اي شخص
ومهما حنا ابدينا راينا امك تعرفك احسن منا
بالتوفيق ربي يحفظك ويحميك

[achwak.1993]

يا أختي لازم توقفيه عند حدو
لازم تقوليلو واش تحتاج عندي و تفهمي الغرض تاعو
و إذا كان ناويلك الشر لازم تخبري باباك أو تواجهيه أنت عادي قوليلو خطيني ولا نباصيك
بالنسبة للزواج هو أفضل حل ليك

[sengra]

سلام
و الله غاصني موضوعك ياسر
وش بيهم شباب اليوم رغم أني من نفس الفئة
هل ترضونها لاخواتكم او أمهاتكم أو حتى زوجاتكم في الطريق؟
احتي في رأي تصارحيه و تقوليلو راني مخطوبة او مرتبطة باش يبعد عليك اذا كان في قلبه ذرة رجوالة
و بالتوفيق

[بصيص امل]

اشتكي عليه عند الشرطة

[عميروش الحر]

ياو قولي لباباك ولا واحد من خاوتك اذا عندك يحكموه يعطولو طريحة تع كلاب .... هاذ الامور ما يحشموش بيها الناس
و هاد الراجل اذا كان وليد فاميلية و متخلق واذا قادر يكفيك ننصحك حبسي الخدمة بيتك اولى والا اذا صممتي على الخدمة قوليلو انا نقبل وانما شرطي الوحيد اني نبقى نخدم و اتفاهمو على الامور
وربي يسهل اما عن هاذ الشخص لوكان جيت جاركم تما وشفتو يدور بيك نعطيلو طريحة ما ينساهاش طول حياتو (اخخخخخخخخخخ يقلقوني هاد البنيادم)

[ايمان نور الجزائر]

السلام عليكم
اختي العزيزة لا يجب السكوت عن مضايقة شخص لكي لربما ينوي لكي شرا عظيما
حطيه الان عند حدو وما تتحجيش بقول نحشم مافيهاش حشمة حتى انا نحشم في هاد الصوالح لكن اذا زاد الحد عند حده
اخبر اخي وبالتفاصيل .....لانز الزمن الذي اصبحنا فيه صعب ويجب اخذ الحذر
هاد الناس ربي وكيلهم
++
اما بخصوص الشخص المتقدم لكي فحاولي فتح حوار من اجل التراضي والاتفاق على بعض الاولويات كالعمل مثلا
واستشيري والدتك واستخيري واكثري الاستخارة

[samsouma...]

يا اختي واش نقلك كاين ناس الله غالب عليهم مهمش متربيين، شوفي الا كثر قولي لداركم خليهم يفهموه بعقلية لي توالمو بلاك يحشم على روحو و الخطيب صلي صلاة الاستخارة و لي فيها الخير يقدمها ربي