مشكلتي مع خطيبي

مشكلتي · 2012-09-05, 13:38

في حياتي الجامعية تعرفت على شاب مدة 3 سنوات كان يحبني لدرجة كبيرة قمة في الاخلاق قمة في التربية.كان لي نعم الأخ و نعم الصديق .بعدما أنهيت الدراسة مباشرة اجتزت مسابقة توظيف و تحصلت على و ظيفة مهندس دولة رغم أن سني لم يتجاوز 23 سنة,و عند إلتحاقي بالمنصب طلبت منه التقدم لخطبتي فوافق و قطع مسافة 1000 كلم لكونه من الشرق و أنا من الغرب لكنه اشترط علي أن أـوقف عن العمل بعد العرس لكونه إطار سامي بالجيش و ظروفه المادية جيدة جدا و بطبيعة الحال وافقت و أقنعت أهلي لكوني أحبه ,لكن المشكل أنه بعد الخطبة تغيرت معاملته لي جذريا لم يعد يتصل بي كما كان,

نلقاه يحكي في الهاتف في الليل على 22.30 كي نقلو معامن كنت تحكي يقولي الخدمة ,نزعف مانزعفش مايحوسش علي.

وحد النهار قتلو راني ظحيت بالخدمة التاعي و بالبعد على دارنا عل جال باش نعيش معاك قالي إذا ماعجبكش الحال مانيش دايرلك الموس في الرقبة تقدري تبطلي.و كي يزعفني مايستسمحش مني,و دايمن يقلي الخدمة هي اللي راهي شادتني عليك و ماما كي نحكيلها تقولي هادو هوما العسكرو لوكان مايحبكش ما يجيش يخطبك.

مانيش نزوخ عليكم بصح و الله أنا غير فائقة الجمال و صغيرة و خدامة و بنت عائلة و الخطابة راهم عليا بزاف,و ضحيت بكلش باش نعيش معاه مالجري علابالي راه نتميزر معاه لأنه في الجيش و البعد على دارنا

دي فوا نحس راهو ندمان كي خطبني و راه يكرهلي في حياتي باش نبطل و العيب يخرج مني و نقول نبطل و نتهنى لكن المشكل دارنا ماكنوش قابلين بيه من ألأول و أنا أقنعتهم و مبعد نقلهم بطلت,

رايو علي واش ندير نزيد نصبر و نخليها تجي من عندو باش مانندمش و لا نبطل و نتهنى منو و أكيد مع الوقت ننساه,

و راهي غايدتني الخدمة التاعي خصوصا أنو طول حياتي كنت من المتفوقات و دائما الأولى,

aihemsara · 2012-09-05, 19:58

اممممممممممممممممممممممممم
اسمحيلي بصح و الله ماراكي تحوسي على النصيحة اختي العزيزة
نزيد نصبر و نخليها تجي من عندو باش مانندمش و لا نبطل و نتهنى منو و أكيد مع الوقت ننساه
ديجا راكي ناوية تحبسي و مقررة و كلشي الله يهديكي
انا نقولك انو حياتك تاع الصح مع راجلك راهي تبدا نهار تكوني في دارو
ماش في التيليفون.. و على حاب وا هدرتي ما عندكم حتى مشاكل.. و باش نصارحك اكتر حاساتك انتي لي بدلتي رايك فيه و تحوسي على سبة باش تحبسي و ما تزعفيش مني اختي
و ما تنسايش المسافة لي بيناتكم هاديك تاني عندها دور كبييييييييييير
علاش ما تصبريش عليه و تسايسيه و تبينيلو انتي بلي راكي حابة تعيشي معاه حياتك
احسن من انك تنفري منو و تنفريه منك
احمدي ربي لي عطاكي راجل كيفو راهم كاين بنات مساكن يحلمو يجو يخطبوهم
زيدي ديري استخارة .. و ربي يجيبلك لي فيه الخير

ps: في الليل كي تلقايه يهدر ماش شرط تكون مراة.. انا خطيبي يهدر معى صحابو حتى على 23 تاع الليل..و الثقة هي كلشي,, امالا غمضي عينيك شوي و ماتحاسبيهوش بزاف و ربي يجيبلك لي فيه الخييييير

yasmina31 · 2012-09-05, 23:38

اكثري من صلاة الاستخارة ولي فيها خير يقدمهالك ربي انشاء الله ربي يهنيك

rozy911 · 2012-09-06, 12:17

ديري في بالك انو هدا الرجل راح تعيشي معاه أكثر من اللي عشتيه مع أهلك ........

وادا تحسي نفسك انك تقدري تتحمليه تزوجي بيه

وادا لا انهي العلاقة .........

dina.labelle · 2012-09-06, 14:10

mon avie akhtik mennou khir rahom l3askar kamel nta3 nssa
sur kachma lga wa7da badlatou 3lik
stakhiri rabbi w choufi w mech 3la jal hadret nass walla 3yat w tbahdil darkom tdamri 7yatek
hadi rahi 3echra mech nhar w 3agab
wzid ra7 toskni b3id 3la darkom wallah takrhi 7yatek
w men ba3 telgay fat l7al lkhedma ra7et
w lmotalla9a makach li yediha loukane t3oud malikat jamal

ميميتا87 · 2012-09-06, 14:28

الظاهر يا اختي انك انت اللي ندمت وحابة سبة باه تبطلي ماهوش هو وفي هاد الحالة ننصحك بالاستخارة وربي راح يوجهك للي فيه الخير صدقيني.واش نقلك اذا شفتي روحك متقدريش تكملي معاه بطلي باسكو هادي حياتك ماشي حياة الناس.ربي يكون معاك اختي استخيري وعاودي وخبرينا وش درتي.وان شاء الله مايكون غير الخير.

aminahassiba · 2012-09-06, 15:37

اختي الكريمة ما دامك في الشط كيما نقولوا خمي مليح مليح هادي حياة او مستقبل ما تغامريش بروووحك مادامك صغيرة او شابة علاش تقمري برووحك مع راجل ما يعرفش قيمتك

ندرومة49 · 2012-09-06, 18:45

تريثي جيّدا
وأدرسيه كيف كان يتعامل معك

لكي لا تندمي مستقبلا

المهم استخيري واتخذ القرار المناسب لك

شهد حنان · 2012-09-06, 19:19

اياك ان تتسرعي
حاولي التريث ..وحاولي معرفة سبب تغيره
لا يتغير الانسان فجأة الا لوجود شيء ما..

المهم توكلي على الله واستخيره

سميحة.لد · 2012-09-06, 20:38

احكي معاه وحاولي تعرفي اسباب تغيرو ممكن كاين حوايج متعرفيهاش ويدا لقيتو منو نفس الاسلوب وطريقه الكلام ........الخيار لكي

dina.labelle · 2012-09-06, 21:03

حذاري ثم حذاري ثم حذري لا طيشي روحك
نصيحة اخوية

abdel02 · 2012-09-06, 21:34

99 بالمئة من العسكر عيونهم غدارة لانهم صغار في السن ومحرومون إلا من رحم ربي...أولا.
ثانيا...عقلية الغرب مع الشرق متباعدة جدا وصعيب بزاف عليك التاقلم.
ثالثا...صاحبنا عندو ميلينيوم أو 61 ويحكي بالساعات في نص الليل لا يعني بالضرورة أنو هو اللي راه يحكي مرات يسلفها لأصدقاؤو باش يحكو
ولكن كان من الافضل عليه أن يحترم مشاعرك وغيرتك عليه...
خلاصة القول..ومن خلال الاسطر اللي كتبتيها...تراجعي درجة من السلم خير من أنك تسقطي أرضا...
والله ولي التوفيق.

lilou f lilou a · 2012-09-06, 21:35

ربي معاك أختي لكن إحذري جيدا فاعندها لا ينفع الندم
ربي يبارلك نشالله

أحبك أمي · 2012-09-06, 21:41

يا ختي أنا نقولك لي ماراه ليك يعييك وأنت إدكان متأكدة بلي هو حب يخليك اخطيك منو راكي صغيرة كيما راكي تقولي و 1000 واحد يتمناك و مع تحياتي لك

الملهمة · 2012-09-06, 21:51

الرجال ديما يتبدلو كي ترجع العلاقة رسمية كيما قالوها ناس بكري الخطاب رطاب من بعد يتبدلو خلاص وكي راهو من الجيش لازم تتعودي ولا تغيري ...اذا تغير بزاف ؟ اجبدي روحك واذا مزال كيما كان اكيد يفهمك واذا تبدل تفهمي من ظوكا خيرمن من بعد .... ثاني نقلك حاجة ؟ البعد ياثر بزاف في العلاقات