كسرة أو فطير تاع الشعيــــر

سيرين 5 · 2016-03-29, 16:03

إن شاء الله المشرفات ما يعتبروهاش تكرار لأنو وصافاتي في موضوعي أدناه لكن للأسف ما كاش مشاركات بزاف لذالك قررت نخرج الوصفات لقسم الطبخ و المأكولات باش نفيدو و نستفادو

حبيت ناكل كسرة و في نفس الوقت ننقص في الميزان ؟ كاين البديل كل حاجة غير صحية عندها البديل تاعها ، شمري على ذراعيك فقط هههههههه

1- في قصعة حطي 2 كيلات فرينة تاع الشعير + نصف كيلة فرينة + ملح + سانوج

2- نخلط كلش مع بعض و نحط فنجان قهوة خليط بين زيت زيتون و زيت عادي

3- حكي الزيت مليح في الفرينة و ضيفي م ص معمرة مليح خميرة و أخرى سكر

4- و جمعيها بالماء الدافئ و عجنيها واحد 5 د بيدك و قسميها، أنا قسمتها على 4 عملت القرصات صغار باش نحتفظ بها في المجمد

5- قرصيها و حليها بالحلال

6- حطيها طيب في طاجين تاع الطين يكون مسخن من قبل و ممسوح بقطعة قماش و شويا زيت و تقبيها بالفرشيطة

7- كي طيب من جهة قلبيها للجهة الأخرى حتى تكمل طيب

8- هاي الخبزة الأولى طابت

9- و هنا كملت طياب القرصات الأربعة

10- و استمتعي أنت و العائلة الكريمة بكسرة سخونة الله الله صحية و بنينة السانوج زاد فيها البنة و خاصة زيت الزيتون مممممممم

و بنفس الطريقة الكسرة تاع القمح صحية أيضا و بنينة

ام الاشبال · 2016-03-29, 20:02

يعطيك الصحة اختي لكن حبيت اسءل هل تتركيها ترتاح ام تطيبها مباشرة وكيفاه تتلم لك لاني جربتها مرة لكن عندما اريد ان اضعها في الطجين تتفتح

رحمة2016 · 2016-03-29, 20:41

ممممم بنييينة يعطيك الصحة حبوبة

سيرين 5 · 2016-03-30, 09:49

اقتباس:

المشاركة الأصلية كتبت بواسطة رحمة2016

ممممم بنييينة يعطيك الصحة حبوبة

الله يسلمك رحمة شكرا

سيرين 5 · 2016-03-30, 09:52

اقتباس:

المشاركة الأصلية كتبت بواسطة ام الاشبال

يعطيك الصحة اختي لكن حبيت اسءل هل تتركيها ترتاح ام تطيبها مباشرة وكيفاه تتلم لك لاني جربتها مرة لكن عندما اريد ان اضعها في الطجين تتفتح

الله يسلمك أم الأشبال : نطيبها مباشرة نعجنها و نطيبها مباشرة
يا إما بسستيها بزاف يعني الزيت غلب الماء حتى عادت تتفتت و ما قدرتيش تتحكمي فيها
يا إما نشفت من الماء أي شربت و هذا ما لاحظته عندما كنت نعجن فيها الفرينة تاع الشعير تشرب لذلك كنت نزيد الماء باش ما تتفتتش و زربت طيبتها باش ما تزيدش تنشف و نضطر نزيدلها الماء علاجال كثرة العجين و إضافة الماء يقضي على التبساس و أنا أصلا ما حطيتلهاش بزاف الزيت :d