شكون غالط انا ولا هي

[مشكلتي]

السلام عليكم
....اختصارا اخوتي في مسيرة البحث عن النصف الاخر تعرفت مؤخرا على فتاة عن طريق بعض الاهل فتم الاتصال باهل الفتاة
الذين طلبوا ان تتعرف علي ابنتهم قبل الموافقة النهائية والخطبة .قلت ماعليش كاش ما كاين. و التقيت بها و كانت الموافقة من الفتاة و الاهل
بعدها عرفت بلي تقدم لها اكثر من شخص واحد و رفضتهم .سار الامر عادي لـ 07 ايام كنا على اتصال لكن بعدها تفاجات قبل يومين لقيتها في مقرعملي مع موظفة تقرب ليها؟ وقبلها كانت تخبرني وين رايحة ومنين جاية ؟ هذاك اليوم ما تكلمناش خلاص .و اليوم صدفة تلاقيتها في الشارع ...سلام ...سلام عندما سالتها على الانقطاع ...قالتلي واش علاقتك مع فلانة ...وكل ما سقسيت وحدة قالتلي بلي راك خاطب هاذيك الفلانة؟؟؟؟؟ وبعد ساعة عاود تلاقينا بدلت كامل الهدرة و قالتلي بلي لـ portable راه عند يماها و تكلمنا 02 دقيق و قلتلها من بعد.
خاوتي هذيك الدقيقة طاحت كامل من عيني . خاطر كان بغات تعرف حاجة تجي تسألني ونجاوبها ماشي تدي كلام من الناس و تصدقوا.... وين شخصيتها.
...في الخدمة الحمد لله ما نداسرش . وكاين موظفات بزاف وكاين منهم من كانوا يتسناو نتقدم ليهم.و راكم عرفين الحقد.تجي ورايا ودير enquête بواش راح تخرج؟.

خاوتي قررت باش نقطع العلاقة و نبطل الخطبة واش رايكم الله يخليكم انصحوني
ناوي الحلال والله شاهد لكن الامر خاوتي ما بانليش هين .

[sali-sali]

السلام عليكم

ادا مزال عينك في البنت روح ليها و هدر معاها اخر مرة
كيما نقولو حط النقاط على الحروف
احسن مايجي نهار وممكن تندم

[ايمان نور الجزائر]

السؤال لا يكون بهذه الطريقة....المفروض تخلي اهلها يسقسو
اما هي فتطلب منها التفسير
في راي انها موسوسة

[يسمينة الزهور]

اخي صلي الاستخارة فهي افضل حل

[كاميلا]

دير استخارة وعلاش قلقتك كي سقسات يخي نتوما تسقسيو وتبعو وديروا تاست وديروا كل شيء ؟
فسخ لسبب كيما هكد غير طبيعي حقا ؟
عليك بالاستخارة

[kamel76]

رأيي ألا تفسخ الخطوبة ، و لكن إلتزم بتعاليم الدين في هذا الأمر أي فيما يخص علاقة الخاطب بالمخطوبة و هو ألا تكلمها نهائيا في الهاتف أو الإختلاء بها أو الإلتقاء في الشارع أو في أي مكان إلا مع ذي محرم لها . أخبرها بذلك و بحرمة الإتصالات التي تتم بينكم ، و أنك تريد أن تؤسس أسرة على الحلال بأتم معنى الكلمة ، بعد اتخاذ هذا القرار ، اترك الأمور تمشي على حالها و انتظر ما سيبدو منها و بعدها لكل حادث حديث .

[AMINA.Z]

اولا لست بزوجها لتطلعك على كل تحركاتها

ثانيا ما فعلته امر طبيعي حابة تشوف اخلاقك في معاملاتك مع الزميلات

و ماكانتش متوقعة تحكمها اكيد تبهدلت و بدات تكذب

النساء ماهمش ملايكة و عمرهم ما يغلطو

من المفروض تساعف و توضح الامور

[عبد الله 22]

السلام عليكم ياخي من حقها تسال على أخلاقك بطريقتها ( ليطمئن قلبها ) لان في الاخير هي من تتحمل مسؤلية قرار الزوج منك أما لماذا لم تسالك مباشرة ياخي كلنا نعتقد اننا اخلاقنا عاليا على الاقل في مثل هذه الامور .

[كمال 16]

ما تتقلقش يا خونا أصبر كيما انت خايف هي تاني خايفة ومن حقها تدي اراء كل من تثق فيهم وكل شيئ بالمكتوب
اخطيك من التوسويس و ماهوش عيب السؤال ، انا تبانلي هدي بنت فاميلا بزاف و حابة تدي الطالع الصحيح و انت تاني من حقك تسقسي عليها و المثل يقول انا فولي طياب تقدم ليها والله يبارك في زواجكم

[قمر السلام]

ياخويا الانسان الي ميثيقش فيك ؟؟؟؟؟

انا خطيبي خلاني لخاطر سمع كلام الناس ومجاش ليا ولا لاهلي وسقسانا

هو صدق كلام الناس مكانس راجل ومعملش شي تاع رجال

نتا تاني يعني اولا باش يسقسوا عنك هاذي مهمة ابوها واخواتها الرجال يسقسوا عنك

وانت حر

[hodahodahoda]

اخي
اذا كانت هذه البنت انسانة محترمة ذات اخلاق صاحبة سمعة طيبة و اهلها عائلة طيبة
لا تتسرع
لعلها لم تحسن التصرف
اعطها فرصة
فهمها
قل لها اذا اردت ان تسالي عن شيئ انا موجود و ساجيبك بكا صدق

كلام الناس ليس سهلا
مقاومته امر صعب
الناس تحب تفسد

[محمد جديدي التبسي]

سبحان الله هذي جاتك هي للخدمة و7 ايام خطبة صايي ولت التيلفونات ما تحبسش وتحب تعرف وين تروح وين تكون؟؟؟؟!!!!
وين راكم عايشين سبحان الله واش من عقلية طفلة تسقسي على خطيبها في مكان العمل نتاعو
راجع نفسك أخي ولا تتكلم بالهاتف مع الفتاة التي خطبتها حتى يتم العقد
وزيد خطبة 7 ايام تبد ا المشاكل يعني اخطاك احسن شوف وحدة ماكثة في البيت ما تشوفهاش غير نهار العرس ولا في الاعياد

[مريم الصابرة]

السلام عليكم اخي
من حقها تسأل عادي ما نعرف علاه شفت الامر إنو حاجة كبيرة وطاحت من عينيك اما تسالك هي حرة ضرك لأنو ماكانش رابط بيناتكم ممكن لو هي حبت برك من باب التربية تسالك ولكن ممكن سمعوها هدرة قلقتها ما سقساتكش لو اخي مثلا تجي صحبتي تقولي نخدم فالمكان الفلاني وانا نقولها خطبني واحد مناك من حقي نعرف منها اخبارو وعقليتو مع العاملات ها امر عادي لأانو لو يخدم معاك واحد يخدم معاها اكيد كنت راح تسقسيه عليها
اما غنك تفسخ الخطبة انا نشوف راح تلقى مشاكل اكبر عند فتيات غيرها وراح ايضا تفسخ لا ما تهربش من كل مشكلة اهدر معاها وإستفسر منها وراحا هي تقدم أسبابها بعدها كان ما تفاهمتوش تلاقيتو بالمعروف تتفارقو بالمعروف موفق

[imene12]

أرى أنه من حقها السؤال عنك.. ألم تسأل عنها أنت أيضا؟؟ لو وجدت زملاء لها في العمل أو الدراسة لن تتردد في السؤال عنها...
أظنها لم تفعل ما يجعلها تسقط من عينك كما قلت... فقط أجبها عن تساؤلاتها و أخبرها أنك لم تحب فكرة أن تأتيك لمقر عملك على أن لا تعيدها ثانية...
و ربي يهنيكم إذا كان في نصيب.

[doba]

خمم مليخ أخي