خطيبي يستغلنى فما الحل

[مسلمة وافتخر17]

السلام عليكم
ضاق بيا الحال وماصبتش لمن نحكى كل يوم يزيد عدابي حاسة بشعور الاهانة وماصبتش حل يواسينى ويسهلى اموري

عندي عامين وشهر مخطوبة لشاب فالحقيقة هو من عائلة جد محترمة وحنونة وطيبة لكن كيما قالو ماكاش فينا ليدي كل شيء كامل مكمل وكيما يحب الخاطر الحق هو انسان فيه صفات مليحة وعلاقتى معاه جد جد محترمة وهدا الشيء لي كان مريحنى
فالحق العام الاول صراولي مشاكل كبيرة معاه والحمد لله قدرت نحل مشاكلي بتسهيلات من الله سبحانه ومشات الامور على احسن مايرام بعد مدة صرالى انا مرض نفسي من المشكل لمريت بيه سابقا وخلقلى اعراض وهمية واصبحت من مستشفى لمستشفى والحق يتقال صبتو هو في دراعى كان مساندنى معنويا بزاااف لدرجة انو كان المستشفى لنبات فيه ويجى هو ليه ويرقد برا بمساعدته وقدرة ربي على شفائي تشافيت ورجعت ثيقتى في نفسي وثيقتى فيه زادت كبرت خاصة بعد مافقدت الثقة فيه
المهم بعد مرور من ايام شفائى والحمد لله توفات اخته هو بطريقة بشعة بدات تتبدل تصرفاتو معايا وعاد انسان عدوانى ولايطاق لكن انا تفهمت الامر وكنت نساعفه ونرضي بكل شيء يجئ منه لخاطر كنت علبالي نفسيته كانت تاعبة بزاف
وبعد مرور الايام والايام جاتو هو خدمة في نواحي منطقة لنعيش انا فيها فالحق انا فرحت ومافرحتش فرحت لامو يكون قريب منى ومافرحتش لخاطر منطقة ليراح يخدم فيها ناسها ماهومش ملاح خاصة عائلة ليراح يشرك معاهم
من 10 ايام ملى بدا خدمة هناك وسيد حسيتو بدا يتغير تدريجيا كلامه صار قاسي وجارح
صبرت وقلت بلاك شدة وتزول لدرجة انو صار يتجاهلنى نتخد قرارات في حقو ونقول ملازمش نجكى معاه ونغيب عليه تجيه هو على 100و16
وبداو يصراو مشاكل بلا اسباب واحيانا باسباب تافهة والنتيجة لهدو الاسباب ليصراو بلا سبة نسمع منه كلمة خلاص ليبينى وبينك وانا كرهت ومانيش حاب نتزوج وغيرها............................................ .
للبارح خياتى خاوتى صدمة كانت اكبر وقبل مانحكى وش صار نفهمكم بلي هدا الانسان عامين وهو خاطب داير غير خاتم وعقد مدنى يعنى صداق والفاتحة مزال والحق تاع ربي الغلطة فيا لخاطر انا كنت معاه بنت فاميليا بزاف عمري ماشرطت عليه راضية بعيشته قابلة بحياته كنت نقلو انا طالبة منك تفرحنى وتهنينى بلا الامور المادية وللاسف هو استغل طيبتى وحنيتى
للبارح فالليل صرا مشكل وكان هو غالط عوض مايطلب سماح وليت انا نستسمحت غير باش مانكبرش الموضوع وعوض لهو يفهمنى ويستسمح منى قالى .................... يابنت الناس كل واحد يشوف طريقه
صباح حكيت مع يماه وفهمتها قاتلي ملتخافيش درك نحكى معاه والا مافهمش نغضب عليه دنيا واخرة
الله الله عليكم قولي وين الحل

[leila ben]

يا أختي ربي يكون في عونك بصح لازم كل حاجة تصرالك أعلمي فيها داركم لاتتخدي القرارات بنفسك من بعد تندمي نحيي فيك صبرك بصح جا الوقت اللي تحط فيها النقاط على الحروف شوفي الرد تاع الوالدة تاعو بلاكط تحل هي الأمور بطريقتها وإن رفض أحكي لداركم يتصرفو زواج الدل غير أخطيك منو الزواج ماشي لعبة باش يساومك كل يوم ويقولك كل واحد في طريقو راكم مخطوبين ورايحين تتزوجو ماشي صحاب تاع الشارع حلي أمورك الأن أفضل من المشاكل بعد الزواج
ديري في بالك أن الخطبة هي المرحلة اللي لازم تكتشفي فيها بعض الأمور ماشي كي تخطبتو معنتها صايي رايحة تتحمليه فوق طاقتك إستخيري الله وإدا شفت روحك مترتاحيش معاه خليك منو وربي يرزقك ماخير منو
ربي يوجهك للقرار الصائب ويفتحها في وجهك وتنتهي أحزانك

[عطر الدنيا]

لالسلام عليكم
اختي العزيزه انتي مغلطيش فيه وطلبت السماح وهذا كرم منك هو ما هداهش ربي خليه يبقى مع روحو شويه بالاك حوايج اخرى مقلقاتوا بالاك الخدمه الجديده ماوالماتوش بالاك بالاك بالاك التمس لاخيك الف عذر
ذرك واش نقول لاختي ماتكثريش عليه التليفونات و التعياط و و و
حاولي تصبري وتفكري المثل الي يقول
كل ممنوع مرغوب وكل ميذول مملول

[dala3 dalou3a]

السلام عليكم اختي انت ما غلطتيش معاه بالعكس طلبتي منو السماح مي هو ما نعرفش علاه راهو يدير معاك هكدا مي انتيا لازم تقولي لاهلك على كل شيء لانو غلط انك تأخذي القرارات بنفسك و الزواج مش لعبة و اخطيك من زواج الذل لانك انت الف واحد يتمناك المهم انت خبري اهلك و صلي الاستخارة و ربي يجيب الي فيه الخير

[محمد...عبد النور]

السلام عليكم أختي الكريمة
حيث انه يوجد بينكما عقد مدني فأنت امام القانون زوجته و لك كل الحقوق
حاولي تحلي المشاكل مع الوالدة نتاعه و عجلي في امر الزواج فالقعود من غير زواج و العلاقة قبله تخلق الكثير من المشاكل التي قد لا تكون حين تكون مدة الخطوبة قصيرة
و امر اخر لازم تحددي الخطوط العريضة بينك و بين هذا الزوج المستقبلي لكي لا تظلميه و لا يظلمك و الاحترام خير من كل شيئ
ربيي ييسر لك امر الزواج و يجمعكما في خير عن قريب
بارك الله فيك و جزيتي كل خير
ســـــــــــــــــــــــــــــــــلام

[مسلمة وافتخر17]

المشاركة الأصلية كتبت بواسطة لذريق

السلام عليكم أختي الكريمة
حيث انه يوجد بينكما عقد مدني فأنت امام القانون زوجته و لك كل الحقوق
حاولي تحلي المشاكل مع الوالدة نتاعه و عجلي في امر الزواج فالقعود من غير زواج و العلاقة قبله تخلق الكثير من المشاكل التي قد لا تكون حين تكون مدة الخطوبة قصيرة
و امر اخر لازم تحددي الخطوط العريضة بينك و بين هذا الزوج المستقبلي لكي لا تظلميه و لا يظلمك و الاحترام خير من كل شيئ
ربيي ييسر لك امر الزواج و يجمعكما في خير عن قريب
بارك الله فيك و جزيتي كل خير
ســـــــــــــــــــــــــــــــــلام

وعليكم السلام اخى المحترم
فالحق انا عارفا ظروفه المادية ماتسمحش خاصة بعد عمله الجديد لي راه فيه يعنى يطلبلو دراهم كبار على هديك مابغيتش نزيروا وخليتو على راحتو لخاطر دايرا في حسابي بلي هو دراعى ليمن متكلة عليه في كل شيء
صدقنى انا من نوع لي احلامه محددة خاصة في احلام مستقبلية نحب كل شيء بالرزانة ويكون قليل وحلو
بصح بعد ما ولا كل مرة يهددنى بافراق اول امس طلبت منه يعطينى كل حقوقي وفهمته انه بسبب طيبتى ورزانتى هو استغلنى وفهمته انه لو كنت من لبنات لي فالحق عندهم الحق انهم يزيرو ازواجهم خاصة فالامور المادية لما كنت نسمع منه كل الكلام لي يمس بكرامتى ونولى نشوف روحى منوية بزاف ونيتى سباب هلاكى
اقسم بالله غير نهار ليجى يزورنى فالمناسبات يعطينى دراهم علي نعرف بلي معندوش وراه محتاج منديهمش وادا شفتو زعف نقسمهم معاه حتى تولي ماما وخياتى يزقو عليا يقولولي راكى تولفى فيه خطرا اخري يولي مايقيمكش نرد عليهم ديما بكلمة مسكين معندوش وانا رانى مرتو لازم نوقف معاه بصح صح هو والف على هدى عقليا وشافنى بهلولة عاد كي يكون عندو دراهم فالتليفون مايعيطش بدراهمه يبيبي وانا نعاودلو
صح انا نستعرف بلي صح انا بهلولة كان عمبالي رجال يحبو صنف لي يقدر ظروف وعقلية تكون كبيرة بصح درك شفت مولات العين الحمرة هى لي راها تحترم ويزيد يفتخر بيها......

[مسلمة وافتخر17]

مشكورات حبيباتى
والله راه راسي تقلب مافهمت والو وقلبي زايد غير يتزير خايفا بزااااااااف مش خايفا نخسرو يروح هو يجى 1000 ماخير منو
بصح مش باغيا نحط من قيمة والديا خاصة بعد ماعطاولو مكانت الابن مشي نسيب

[عطر الدنيا]

هو الي من المفروض يحشم على روحو ويدير حساب نسابو الي مقادرينو ودايرينو كيما ولدهم موش انتي
بانتلي يدلل عليك اقطعي عليه الاتصالات خلي يرجع لعقلو

[مسلمة وافتخر17]

مشكوراااااااات

[هدى الجيجلية]

السلام عليكم
اختي
مسلمة
فعلا هي مشكلة
لازم تخبري اهلك
باه ايشفولك حل
أنا الصراحة
لو جيت مكانك وقالي خطيبي
أنتي في طريق وانا في طريق
راح ابطل الخطبة
الإنسان عنده كرامة
ولا يقبل على نفسه هذا الشيء
المهم القرار الاول والأخير
يرجع لشخصك

[sali-sali]

السلام عليك

اختي لانو طالت مدة الخطوبة كثرت المشاكل
حاولي التفاهم معه و التحاور حتى تصلوا الى الحل الدي يرضي الطرفين
لانو ادا استمريتم هكدا ستكثر المشاكل
و ربي يسهلك اختي

[loulou02]

ربي يفرج عليك و ينورلك طريقك

[مسلمة وافتخر17]

ربي يستر الحال وينور طريق كل مغبون
الحمد لله على كل حال الحمد لله انى مظلومة مشي ظالمة وهدا الشيء مريحنى

[مريم الصابرة]

السلام عليكم اختي
أولا نحييك لأنو فعلا راكي بنت اصل ومتربية وربي راح يجازيك على نيتك
وهذا راه زوجك مادام راكم عاقدين يعني تحمليه هذا واجبك كيما هو تحمل ووقف معاك معليش خليه يزعف ويتقلق ويولي العقلو وفي نفس الوقت ما تظليش طيحي من قدرك من راي احكي معاه وتفاهمو بالعقل معليش طلبت السماح يجي وقت يقدّر اللي راكي ديري فيها واكيد راه مقدّر كل علاقة فيها مشاكل تحملي وساعفيه ربي يوفق بيناتكم

[مسلمة وافتخر17]

شكرا لكم والله افدتونى جزاكم الله خيرا