سفنج .. واش رايكم ..

[قطعة ذهب]

مساء الخير

اليوم درت سفنج .. نتمنى يعجبكم ..

هو نورمالمو نطيبهم اكثر من هاك .. مي كنت حاصلة بين كسرة خميرة خمرت ولازم تطيب .. ومابين سفنج تاني طلعو عليها ما حمرتهمش مليح ..

المقادير ماهيش بالتدقيق لانها وصفة صاحبتي وهي قالتلي كل شي نديرو بالتقريب وانا رح نحط المقادير الي درت انا ..

رطل فرينة - شوي دقيق - 2 مغارف صغار خميرة خبز - ملح - شوي سكر - مغرفة تاع ماكلة ماغارين طرية وماش ذايبة -

خلطي جميع المقادير مع بعض وبلي بماء دافي او ماء زهر دافي وحدو او شوي ماء وماء زهر دافيين .. لك حرية الاختيار ديري ماء الزهر اولا ..

اعجني مليح وتكون العجينة كيما تاع كسرة خميرة ماهي يابسة ماهي جارية بزاف ولوزيها لوزات صغاااار باش ما يجيوكش الحبات كبار ومعجنين بزاف ..

انا دارولي حوالي 25 واحدة .. كي تكملي غطيهم وخليهم يخمرو حوالي ساعه او اقل او اكثر بقليل .. كيما انا اليوم خليتهم حوالي ساعه ..

سخني الزيت مليح وقبل ما تلوحي واحدة في الزيت ديري الثقبة بيدك .. انا تاني ماعرفتش نثقبها مليح ..ههه

ومبعد لوحيها تطيب ولوحي عليها زيت من فوق باش تتنفخ مليح وتحمار .. وكي طيب اغطسيها في عسل سخون مع شوي ماء الزهر .. وراهي ما تديش بزاف من العسل .. والي تحب تذر فوقها سكر ..

واي سؤال انا موجودة للاجابة ان شاء الله ..