مشكلتي

[مشكلتي]

دوك نبدلكم من اللول
بدات حكيتي مع واحد كان يخدم معانا .كي دخلت نخدم كان دخل يخدم قبلي وعوني بزاف هو لعلمني خدمة المهم كانت العلاقة بينوا بيني مميزة بزاف في حدود عمري ماكنت حطا في بالي توصل للحب لاني كنت ديما نحط حدود بيني وبين اي واحد سرتوا في الخدمة المهم كي خلصت الكنطرا تاعوا راح وواحد الخطرة عيط بالتليفون لواحد يخدم معانا و قالوا به يعقبني نهدر معاه هدرت معاه وقلي علاش ماركيش تسقسي عليا
و بحكم انوا خيروا سبق واحد الخطرا جبت النيمروا تاعوا وعيطتلوا وماكان في بالي حتى حاجة غير نسقسي على واحد ماشفت منوا غير الخير المهم ساعا على ساعا كان يعيط وانا تاني حتى جا واحد اليوم وسرحني بحبوا مع اللول حولت نتهرب بصح قلت هدا نعرفوا مستحيل يخدعني و لايتمسخر بيا مر علينا وقت ومن بعد ولا مايعيطش و مايسقسيش وواحد الخطرا عيتلوا ومحبش يهز عليا وبعد 5 شهور بعثلي ميساج يسقسي عليا قلبتلوا من هداك اليوم لدوك مازاد عيط ودوك فاتوا 3 اشهرو10 ايام
انا علابالي من داخل بلي رهوا صح يشتيني بصح علاش بركا ميسقسيش عليا
ساعا نقول كي عاد يشتيني بزاف قرر يقطع العلاقة خاطر مارهوش خدام
خاطر كان ديما يقلي نتي ماتستهلي غير الخير
بصح لعاد ماعينوش يكمل علاش بدا
تمنيت يعيط و يشرحلي
رني كل مايعيط التليفون نجري ومن بعد حطتلوا سنري خاصة بيه باه مانطمعش
ولاعاد نساني لاه مخلي نيمروا تاعي عندوا
حولت ننساه بصح ماقدرتش ونكرهوا بصح تاكدت بلي هدا مستحيل.جا واحد خطرا وحد يخدم معانا صوتوا يشبهلوا كل مانسمعوا نجري نشوف لعاد هو حتى زاد شويا و هبلت ومن بعد ديت كنجي باه منزيدش نسمع هداك الصوت
نتمنى بعد ما تبردولي قلبي تدعولي بلي يكون من نصيبي لانوا نهار هدرت معاها كانت نيتي صافية وهي الزواج خاطر من بكري وانا نكره العلاقات المصاحبة

[بلال الرومنسي]

شافك تتهربي جبد روحو ............... حتى انتي المفروض تساليه مادا يريد .......
لو قال لك اريد الحلال قوليلو يتفضل ........... اما لو يريد استغلالك لانه عمل فيك مزية تعرفي واش ديري معاه ... غيري رقم هاتفك وخلاص

[نجمة ساطعة]

المشكل دائما عند ما يبتلينا الله بالوهم نحاول ان نفسر لصالحنا كل الاشياء و نمنح الاعذار مهما كانت

يا اختي والله مش نتفلسف او نلعبها واعظة بصح نصيحتي انسيه تماما نحيه من راسك و عيشي متهنية

ربي يرزقك ولد حلال ينسيك .... الطفلة تحوس على السترة برك لذلك اي واحد ينسيها في اللي كان

[نورسين.داية]

شوفي عزيزتي أنا انصحكي أن تنسيه و السلام .....لأن لي حب إنسان يطرق بابه مباشرة ......انا أعتبر ان هذا هو الرجل الحقيقي...................... أما انه يبقى يتلاعب بيك ....بين مد و جزر .......هذا النوع ماعندك ماديري به ..........و غير يضيعك معاه .....و لو تضحين معه و تتخطين حدود معينة فلا يزيده دلك إلا إحتقارا لكي ..... بالمقابل ... ولو حدث الأمر مع اخته لا يقبلها ...بالتالي :
قوي عزيمتك .....و إنسييييييييييييييييييييييييه .......
و لو كان يحمل لكي ذرة الإحترام ......لطرق باب الحلال ..............فما يمنعه ؟؟؟؟؟

[ريمة89]

ياختي انا عمبلي راح تقولي جا خطبني
هدا حبك وحب من اول مرة ومابانش كي بان نورمالمون يجي يخطب ماشي يجي تسقسي وانت بصفة واش تسقسي عليه لوكان صبتيه فطريقك وماهدرتيش معاه ولا كاش حاجة بصح تعيطيلوا وتسقسي عليه ..................... خاصة وانوا علاقتكم كانت في حدود
القصة هدي نحيها كامل من بالك وانسايه
دار فيك خير ربي يعوضهولوا ان شاء اللهوانت ماديري والوا في بالك على خاطر اصلا ماكان والوا صارحك واختفى انت تاني ماتحوسيش كامل على هدالقصة

[رجاء الرحمة]

السلام عليكم أختي
أول خطوة امحي رقمه من هاتفك وإذا كان ممكن غيري رقمك ولاتتبعي قلبك أو هواك لأنه سيخلق له ألف عذر وتذكري أن عمارة الوهم لا يستند إلى جدارها لذا اختصري على نفسك الطريق وانسيه عسى الله يرزقك الزوج الصالح الذي يطرق الباب ولاينتظر منك أن تسألي عنه بالهاتف ثم يغيب
اللهم ارزق أختنا حبك وحب نبيك وحب كل عمل يقربها منك امين

[wafa kabylie]

الباب اللي يجي منو الريح سديه واستريحي اللي مكتوبة في الجبين لازم تشوفها العين

[- بصمة خير -]

ربي يوفقك و اذا كان الخير ليك ان شاء الله يكون من نصيبك

و لكن ماتزيديش تفكري فيه و عيشي حياتك عادي

و لكن لاه راهو يدير هكذا هذا السؤال أعتقد انه هو الوحيد اللي ممكن يجاوب عليه



اللهم صلي و سلم و بارك على سيدنا محمد

[بنت الحجاج]

مع الوقت

رايحا تنسايه


ربي و رحمتو

[mitrochka]

khtik mano okhti w chofi hayatek hada banatli mal3abch cache-cache qima kan sgir