كلماتي الأخيرة ⁦❤️⁩

[~ هبة الله ~]

دخلت للمنتدى اليوم ، لقيت بزاف رسائل يسقسو عليا ( هبة مابنتيش. وش عطاوك ..الخ ) سمحولي ماقدرتش نجاوبكم
للأسف مالحقتش ، عطاوني حاجة ماشي باغيتها كامل
بزاف ناس يعرفوني هنا و علابالهم راني عضوة هنا من 2015 و خاصة مترشحي 2016 و 2018 يعرفوني مليح مليح ، بيناتنا ذكريات شابة بزاف
و الله شحال صعيبة من 2015 و أنا نكافح باه نلحق غير 16
و الحمد لله لحقت 16 في 2020 و يا فرحة ما تمت ، انصدمت البارح اختياراتي باللون الأحمر
بكيت حتى نشفو دموعي والله غاضتني عمري عمرها مالحقت طب 16 و لكن قدر الله العام لي تحصلت فيه على 16 فاقت هذا المعدل و غلطتي أنه ماخليتش نسبة مايقبلونيش بالعكس تماما كنت متأكدة نروح طب حتى أنه بديت نقرى قبل ما ندخل نقرى
تخيلو نجيب 16 و نعاود الباك باه نجيب 16 فاصل
المهم أنا غير الباك لي مستحيل نعاوده موليتش نآمن بهذا الكلمة خلاص

راني غير ندعي في ربي يعطيني القوة نوقف من جديد في حياتي و نتخذ أفضل قرار لي لأنه من جهة مانقدرش نكمل في التخصص لي راني فيه حاليا مع أنه عامي الأخير و من جهة مانقدرش نقرى بالباك الجديد لأنه مانعاودش نغلط نفس الغلطة و نقرى تخصص ماشي راضية به
أصلا قلبي برد تماما على حاجة اسمها القراية

شكرا لي كامل سقساو عليا ، شكرا من القلب
سعيدة بمعرفة كل شخص هنا في المنتدى ، كنتم و لازلتم عائلتي الثانية لي شاركتهم أحلى اللحظات و الذكريات من 2015 إلى عامنا هذا
إلا أنه أشعر قد حان الوقت لمغادرتي هذا المنتدى
لي غلطت معاه يسمحلي أو تسمحلي
نلتقي في ساعة خير ان شاء الله
بالتوفيق لدفعة 2021
و تحيتي لكل طالب عنده إرادة و قوة يعاود الباك

[اللهم ارزقني عفةمريم]

ربي معاك حبيبتي والله نتي صح تعبتي وصلتي لمعدل ملييح الله يبارك بصح بلاك ربي ماشفلكش لخير في هذا تخصص

[اكرام براءة]

فيها خير إن شاء الله
ماتفشليش أختي
ربي يوفقك في واش بقى
و لعله خير ,, تفاءلي

[الطالبة للعلم]

الخير فيما اختاره الله
ربي يرزقك الصبر و يوفقك في حياتك
.
.
.
....... لكن اذا كانت اخر سنة في تخصصك فانا لو كنت مكانك راح نعاود الباك و نكمل اخر سنة تخصص و يكون هاذا اخر باك نعاودوا
بمعنى اقراي لاخر السنة فالتخصص تاعك و في نفس الوقت عاودي و قولي بلي هذا اخر باك بعدوا مكانش و مش تقراي و لكن راجعي وش قريتي كي يكون عندك وقت فراغ و حل سوجيات و حاولي اكثر و فوتي الباك و النتيجة اما تلحقي هدفك و طموحك و اما تكوني تخرجتي و لقيتي خدمة لي انت اصلا اكيد متناسبكش و راح تكملي حياتك في حاجة فوق طاقتك و محبيتيهاش و تضيع حياتك و قادر اصلا متلقايش خدمة و تقعدي فالدار و ما الى ذلك من مشاكل غير محدودة .....الخ

عاودي ثم عاودي ثم عاودي افضل من تخسري حياتك في حاجة انت محبيتيهاش و انساي المستحيل نعرف بنات عاودوا 8 مرات لاجل الطب و وصلوا و انت وين ....مزال طريق طويلة ربي يوفقك في حياتك و توصلي وين حابة و سلاااام

[اخلاق راقية]

متفشليش ختي صح وصلتي لمعدل الطب نرمالموو
الله غالب هذ لعام طلعوووا المعدلات بلاك خيرة ليك فارماسي تاني مليحة وفي مجال الطب خمي مليح الا تقبلي تقرايها استخيري لعله خير ان شاء الله وربي يوفقك ختي

[الجميلة انا]

لا تفشلي يا اختي افانت مثال في التحدي من اجل تحقيق حلمك وهو الطب لكن الانسان يحب حاجة بصح ديما نقولو بلي الخير فيما اختاره الله عدم وصولك الى الطب قادر يكون وراءه اسباب لا يعلمها الا الله قادر لا يصلح بك رغم انو انت محبتيه لا اقل لك عاودي الباك لانك كرهتي وانت تعاودي 4 مرات وهذا حقك بصح حتي الفارماسي مليحة وعندها مستقبل مليح فانا كنت اريد الفارماسي لكني لم اوفق فيها والمعدل موصلنيشي تبقى ديما اي شيء وراءه سب
والحمد لله على كل حال

[~عيون القلب~]

الخير فيما اختاره الله أخيتي الغالية
هناك بعض المرّات تأتينا اوقات لا نعرف حتى كيف نواجهها و كيف لنا ان نتخذ القرار الأنسب لنا لكي نمضي قدما نحو الصواب و الخير
حقا وضعك لا تحسدين عليه
لكن كل ما نواجهه يجب علينا ان نؤمن انه امر مقدر من عند الله سبحانه و تعالى و انه خير لنا في كل شيء
لكن لنحمد لله على كل حال

[اسماء تيارت]

ماشاءالله عليك هبة والله انت خير مثال في التحدي و الصمود و حتى الصبر .
الخير فيما اختاره الله عسى ان تكرهوا شيئا وهو خير لكم بلاك ربي في هاد ال5 سنوات مكانش باغيلك الطب وراه عارف شايمدلك ماتكرهيش من رحمة ربي بلاك الفارماسي تنجحي فيها وتتخرجي و تخدمي ربي كي يبلعلك باب يحلك ألف باب .استخيري حبيبة و شوفي الحالة

والله كيما يقولوا نرفعلك القبعة على شجاعتك و على مثابرتك 😘😇😇😇.

[~ هبة الله ~]

شكرا بارك الله فيكم
كلماتكم دواء كيما يقولو
ربي يجازيكم
الحمد لله اقتنعت صايي راح نقرى صيدلة و ان شاء الله ننجح فيها

[شمس الأمنيات]

اهلا هيبوش ليك وحشة
قدر الله وماشاء فعل لعل في ذلك خير
المهم لي عاودتي مخليتيهاش في قلبك
وبالنسبة لدموعك ربي يعوضك بكل دمعة فرحة لا تقنطي من رحمة الله

[~ هبة الله ~]

المشاركة الأصلية كتبت بواسطة شمس الأمنيات

اهلا هيبوش ليك وحشة
قدر الله وماشاء فعل لعل في ذلك خير
المهم لي عاودتي مخليتيهاش في قلبك
وبالنسبة لدموعك ربي يعوضك بكل دمعة فرحة لا تقنطي من رحمة الله

يا حبيبتي ، غيبتيها علينا و الله توحشتك
الحمد الله اقتنعت بما اختاره الله لي ، أصلا نظن أفضل تخصص بالنسبة لي أنا أصلا خلاص كرهت السبيطارات و كل ما يتعلق بهم مذابيا نبعد على هذا الميدان و في نفس الوقت نبقى في تخصص طبي و علمي
ان شاء الله يوفقني في باقي أهدافي

[اَشْرَفْ اَنيِسْ]

لو ارانا الله الغيب لاخترنا اقدارنا قد تحبين شيئا و هو شر لك و قد تكرهين شيئا هو خيرا لك كوني متأكدة ان الله يعلم بماتريدين و يعلم بما فيه الخير لك نتي درتي لي عليك الباقي لي كتبهالك ربي توصلك و حد ماينحيهالك
وفقك الله