حابة نفسخ الخطوبة مي غايضني خطيبي

[مشكلتي]

السلام عليكم

انا فتاة عندي 20 سنة تخطبت منذ حوالي 8 اشهر جا خطبني انسان في الحقيقة منعرفوش مليح فقط دلوه صحاب خويا عليا بطبيعة الحال قبلت بارادتي بعد ماقالي خويا انهم ناس ترونكيل وهو عاقل بزاف وحد ما ضغط عني واتخذت قراري بارادتي وصح في هدي المدة نتواصل معاه هووالله محترم وجامي جرحني ولا قالي كلمة قاسية عشت معاه اسعد ايامي بعد ماكنت غير كئيبة قلبلي شخصيتي وحياتي وكامل لاحظو هذا الشي غير نقلو الو يعرف اسكو اني فرحانة ولا مديقوتيا ديما يضحكني ونحس بالراحة معاه لكن المشكلة ان خطيبي قصير بزااف هذا الامر احرجني انا طولي 160 وهو اقل مني ب 5 سم يعني بزااف قصير ولكم ان تتصورو نحشم كي نوقف معاه خاصتا صحباتي قالولي راه قصير عليك هدا الامر احرجني لكني مكنتش مهتمة خاصة ان شخطيتو طيبة وهو انسان متفهم واهلو قمة بالروعة عرفني عليهم اناس طيبين بزااف المهم منذ حوالي شهرقاتلي صحبتي انو خوها حاب يقول عليا وانها قالتلو بلي مخطوبة في الحقيقة هو مصر عليا شافني مع اختو عجبتو بزاف وهو ثاني الله يبارك شباب وعجبني بزاف ومخصو والو فتحت فيس بوك مع انو كنت مواعدة خطيبي بلي كل شي نديرو بمشورتو ونبهني على هذي الامور لانو ميحبش الفيس ومواقع تواصل ويخاف منها بزاف قالي ياما دمرت بيوت واسر هدي المواقع المهم اصبحت ندخل لبروفيل خو صحبتي على الفيس بوك والله اصبحت غير نشوف فيه لازم يوميا نشوف ونشوف تصاورو يوميا حتى في المنام نشوفو قررت اني ننفصل على خطيبي ونرتبط بيه مي مش حابة نجرح خطيبي لانو ميستحقش حبيت نخلقلو مشاكل ونتخاصم معاه كان صبور معايا وتحملني هذا الشي زاد قاسني بزاف حبة نقولو على سبب مي خايفة ناذيه هو اصلا مقيوس من هذا الباب ويتظاهر انو عادي منيش حابة نقلو انو هذا هو السبب مي مخلالي حتى طريقة ربي يحفضكم انصحوني

[ع.عيسى]

ما يغيضك ما والو قومي بفسخ الخطبة بأسرع وقت ولا تحتاجي الى اي تبرير اعلميه انه لا يوجد مكتوب والسلام ... لانه ببساطة لا يستحق وحدة خاينة مثلك.. قبلتي بيه من الاول وبعد أشهر على جال 5 سنتيم عينك ولات تزغد وفي الاخير خنتيه...

[tassnim5]

بغض النظر عن فعلتك المهينة فكل ما يمكنني ان انصحك به هو الابتعاد عن كل تلك الصديقات السوء اللواتي يحطن بك سواء تلكن اللواتي قلن لك بأن خطيبك أقصر منك ب 5 سنتيم أو تلك التي عرضت عليك خطبة اخيها و هي تعلم انك مخطوبة و فتحت لك باب الفايسبوك و باب الشيطان. انت لا زلت مراهقة و أفكارك غير ناضجة حاولي ان تحسني اختيار الصديقات و الا فانهن سوف يجعلن حياتك خرابا.
لن أنصحك لا بفسخ الخطبة ولا بالاستمرار فالقرار يرجع اليك و حدك ولا تطلبي النصيحة من أية صديقة من صديقاتك.

[المانجيكيو]

/

لا شيء أجمل في هذه الحياة من قول الصراحة منذ البداية
و أيضا أختي السائلة لم أفهم كيف وافقتِ على الخطوبة بدون معايير و شروط
تريدينها في زوج المستقبل // من المفروض هذه الأمور تقال منذ البداية
و لا ينتظر الإنسان حتى تتطور العلاقة و تترتب الأمور و من ثم يهدم ما يبني

الآن وضعك صعب و تحتاجين إلى مصارحته و الاعتذار إليه و تقدّمي له تعويضات مادية
عن الضرر المعنوي إن هو أراد ذلك /

و الله الموفق .

[3ab2ou]

الله يبعدنا عل العيباد لي كيفك

[مراد سابقا10]

يا لطيف انت راكي مخطوبة وتحوس على شباب اخرين

انت تقولي السيد الجديد شباب على خطيبك الأول وديما تشوفي التصاور يعني مقنعكش خطيبك الأول

كوني قوية وافصلي في الأمر وحبسي الخطبة وديري اي سبب نورمالموا راكي مقبلتيش الخطبة النهار الأول كي مرتحتيلوش .

[❣سڪڕ❣]

وعلاش راكم تقولولها خااينة شا دارت ذنبها انها مرضاتش بخطيبها ؟؟؟
ختيتو راكي على صواب انك قررتي تفسخي خطوبتك قبل فوات الاوان خطيبك موش معمرلك عينك صاي
ونتي صغيرة وعندك لي شوا علاه تروحي لانسان ماهوش عاجبك ومبعد كي تتزوجوا تولو في مشاكل
عادي استخيري وافسخي هكا خير من يتعلق بيك بعد الزواج وتحصلي فيه وتما لي تخافي تخونيه
وسقسي صحبتك ادا خوها صح ناوي فيك ماشي يتمسخر وتزوجي بلي تحبي افضل من دمري حياتك..

[نينو]

ربي يهديك
علاش تلعبي بولد الناس .
اراهن انه لو فسختي الخطبة و كما لعبتي به . سوف يلعب بك الاخر.
فقط لاتنسي تديري موضوع هنا في المنتدى. بعد ان يخونك الاخر.
المهم افسخي الخطبة ان لم يشبع عيناك . وهو ربي يجيبلو وحدة بنت اصل وتحبه.

[ing.Youcef]

من باب الأمانة لازم تحبسي هذه الخطبة،
الراجل حاسبك متربية ومحترمة وحاب يدخلك لدارهم وتولي بإسمهم وأنت قاعدة تبعي في رجال آخرين!!
لوكان رجل عمل واش عملتي نقولوا عليه رخيس وجايح وماشي راجل...!! أما فتاة والله ما راني عارف واش نقولوا عليها..!!
والله غير الواحد كي يشوف حالة كيما هذي غير يتمنى لوكان مات وصار تراب!!!
حسبنا الله ونعم الوكيل.

[بـــيِسَة]

السلام عليكم

الفتاة هي الي تختار زوجها المستقبلي عندك الحق مئة بالمئة باش متندمش
بصح ماشي لبسة تخيري و الي قصيرة اعليك ترديها هاذا بنادم حسيها في روحك
بصح بما انك اعجبت في اخ صحبتك الي قاتلك انت اطول من خطيبك و عيب باش برك تقبلي بخوها
هنا رلازم تفسخي الخطبة و كل واحد في طريقو هيه وفتحتي فيس باش تشوفيه كل يوم ربي يهديك نورمالمون مجرد راكي مخطوبة تشدي عينيك
و متسمعي حتى هدرة ــــــــ أتخيلي انت قالك يا روح في تريقك لقيت وحدة خير منك واش اديري ؟ هنا لازم تسييها في روحك باش تتوقعي الجواب نتاعو
معليه شوفي واش يخرج اعليك و موفقة في الاختيار صلي الاستخارة
و خليك من الصحبة الي دبر بزاف نصيحة

[Elwawy]

الرجولة لا تقاس بالسنتمتر و حتى لو كانت كذلك المطلوب قياس شيء أخر و ليس القامة.

الحقيقة أن قصة القامة مجرد عذر أقبح من ذنب, و ما تبحثين عنه شيء أخر ظهر بعد أن فتحت أعينكي و تخلصتي من الكأبة, لا ألومكي هو شيء فطري في الأنثى.

أنتي مسؤولة -هذا كل ما في الأمر- سواءا واصلتي أو فسختي.

[❣سڪڕ❣]

كفا تجريحا طلبت نصيحة وليس تجريح

[sohaibdz]

افسخي قبل متخونيه بعد الزواج واصلا ميتهلش وحدة كيفك

[بشرئ عاشقة العلم]

قرات المشكلة و شفت المشاركات الاغلبية يقولو عليها خائنة فهموني برك وين رهي الخيانة يا جماعة الفناة لم تتحدث اصلا مع الشخص الاخر في الواقع او الفيسبوك فاين الخيانة هنا و لكن لو كان صاحب المشكلة رجل و خطيبته اطول منه او قصيرة جدا كنتم ستنصحونه فورا بفسخ الخطبة و خطبة فتاة اجمل لا اعرف لمادا دائما الرجال في هدا المنتدى يهجمون على النساء بهاته الطريقة في مكل مشكلة و كان كل النساء خلقن للمكر و الخديعة
عادي جدا معجبكش اختي بطلي عليه كل شخص يدي لي يرتاحلبو سواء كان رجل او امراة

[بسمة ღ]

السلام عليكم و رحمة الله

طاب يومكِ أختي الغالية

يا لها من مشكلة /

لن أتحدث عن تصرفك و لا عن أعذارك

أنتِ المسؤولة عن نفسك و القرارات بيدك ،

فهذهِ حياتكِ أنتِ ، مهما كان السبب و العذر

لكن ، كأختٍ لك أود نُصحك

صارحي خطيبك و أعتذري له

و لا تحكمي على الناس من العنوان و الشكل ، فهناك مضمون لم يُوجد عبثا

و لا تسمح للاخريات بتحديد حياتكِ و التدخل فيها فهذا تطفل

لن أنصحكِ بالفسخ و لا بالمواصلة

لكن ابحثي داخلك ، ماذا تريدي تحديدًا

أكيد ستجدين الجواب

و فقكِ الله