ماقدرتش نتأقلم

[مشكلتي]

انا خدام في الدولة، لقيت روحي في حياة اجتماعية فرضها العمل، عندي شهرين ملي كنت رايح نمضي عقد الخروج بصح صحابي ڨالولي غير هذي ماديرهاش ..الحياة صعيبة، انت مازال ماعطاتكش الدنيا طريحة، غلطة حياتك راك رايح ديرها _حقيقة انا ماعنديش تجارب فالحياة مالقراية للخدمة_ ...وآخر لحظة مسؤول العمل ڨلي اخطيك ..مالا عاودت العقد بصح من فوڨ الڨلب ..راني نحاول نتأقلم بصح والو بالرغم عندي 07 سنين فالعمل ...صحابي يحسبوني نورمال بصح انا م الداخل حرب نفسية...
السب والتطياح تبانلهم شيئ عادي ف العمل وفي أغلب الكلام ..
كل يوم نسمع الكلام الفاحش .. الصباح، ف الليل ..ف المطعم..
العمل هذا يتطلب الحياة الجماعية لازم اندماج واحتكاك بصح لقيت روحي كي شغل نستخدم المداهنة والمجاملة. باه نتعايش معاهم.
...راني نشوف التفكير و العقلية تاعي ماتناسبش البيئة اللي راني فيها...
النفسية تاعي ماعييت نضغط عليها باه توالف والو....
حاس روحي في بلاصة خطأ...هذا يخليني أحيانا نزعف من روحي....غضب داخلي
المشكل ماقدرتش نصارح الاب وهذا خلاني نعاود العقد...
خطرة هدرت _في غياب الوالد_ على الخرجة [وكنت عارف ردة الفعل] خاصة الوالدة...تخاف بزاف...راني مقدّر الشعور تاعها..أي أم تخمم على وليدها...

[الأيمان]

السلام عليكم أخيا .. قدمت استقالتي مرة نعم كان هناك ضغوط و حرب علي و محاولة ايذائي لكي أخرج من عندي كان مرتبي 9000دج و كنت ننضال وعاجبني عملي ...المهم سبب تقديم استقالتي هو تغيير الإقامة و مدرتش تحويل ...المهم في العام الثاني زادولهم لاباي 15000 دج و بعد سنتين رسموهم بالكونكور بلاك يسلكو درك 30000دج و بكامل حقوقهم ...
حكيتلك حكايتي لي في الحقيقة بكيت الدم بسببها و محكيتهالكش كل ..و الجماعة لي كانت معايا شفت زادوهم وترقاو ...يعني الحياة هكا ....تتعب و منبعد ربي يوفقك ...
المهم عاهدني تصبر بصح كي ترجع للدار اقرى كتب لتحبها و الله تريحك و شوف الاشياء لتميل ليها خاصة في القراية باش تطور روحك ...و نزيدك ابحث عن عمل آخر خفية ......هكا كل ماقريت اكثر تزيد قيمتك وتقدر تلقى منصب أوخر ...بصح عمرك ماتخرج روحك حتان تحط رجلك في خدمة أخرى ....
نقطة أخيرة تخيل نفسك رب اسرة ,,,شكون راح يوكلهم ويشربهم ...كي تستقيل ...ونزيدك وين تروح تلقى المشاكل ...يقول المثل اصبر على مشموك على يجيك مشوم أكثر منو ...الحياة كلها مشاكل ...

[بـــيِسَة]

.السلام عليكم

يا اخي مكاش خدمة ساهلة في هذا الوقت خمم في والديك
قلت بلي ميقبلوش تحبس خدمة نتاعك لازم تصبر كي تحبس
الحياة تغبنك اكتر صدقني و الله اعلم بحياتك

[قدور بن عاشور]

مادام مكان العمل غير محترم و الزملاء غير محترمين و زيد الضغط النفسي أنصحك بترك هذا العمل في أقرب فرصة، و إلا يموت قلبك و تصير مثلهم.

و اجعل تركك له لوجه الله للإبتعاد عن الفحش،
و سيعوضك ربك عنه.
الدنيا ماهيش صوارد و قداه تسلك،

لازمك خدمة إذا ماحبيتهاش على الأقل ما تلعبلكش على الأعصاب.

[halim_auto]

اترك عنك هذا العمل مع الاوباش و الرزق على الله , انا كانت عندي قاعدة ان اي مكان عمل غير محترم او معاملة سيئة نخرج منه فكنت اتنقل من شركة الى اخرى حتى استقريت بمؤسسة محترمة , وكان المجتمع يخرج ضدي كلما اردت الاستقالة من شركة وبنفس الحجج الواهية انو " الوقت صعيب و الناس ملقاتش خدمة و غيرها"

لاتتالم لترضي ايا كان, رضا الله قبل كل شيء .من ترك شيئا لله عوضه الله خيرا منه

[yassefe]

الله هو الرزاق
الحل هو ابحث عن عمل خفية اي عمل يريحك ثم استقيل

ادا مقدرتش تحمل راحتك النفسية اولي

انا مستحيل اقبل بعمل بدون احترام وفيع لعياط وتطياح

[الملآذ]

ابحث عن عمل بديل ان وجدت مبروك عليك --اذا لم تجد اقعد في عملك --
ادعي الله ان يخلصك من هذا العمل ويبدلك خيرا منه ...

[Elwawy]

أرخي لحيتك ستختفي الكثير من المشاكل و يغيير الكثيير ممن حولك تصرفاتهم.

[ع.عيسى]

اترك العمل مادامك غير مرتاح ....ولكن قبل ترك العمل يجب ان يكون البديل متوفر ...جد عمل اخر ومن ثم اترك عملك الذي انت غير مرتاح فيه

[أَحمــد]

إن لم تستطع تغيير بيئتك فغيّر في بيئتك وان لم تسطع التغيير في بيئتك غيّر في نفسك بعدم تأثرها ببيئتك
وأنت أدرى بنفسك .. والله يوفقك

[Dhiaeddine Ben]

لم تذكر نوع العمل لكن حسب فهمي اعتقد انك تقصد ج.و.ش ... الحل أن تغير محيطك فحتما هناك الصالح وان لم تجد أو لم يتغير شيء في نفسيتك فقبل الخروج خمم فالمستقبل.... والاهم صلي صلاة الاستخارة

[ايمان4]

جد البديل و غير العمل ان كنت غير مرتاح فيه و ممكن حتى ان يكون البديل خارج البلد مثل هجرة كندا تحتاج خبرة +شهادة و انت تتوفر فيك الشروط او كاش عمل في الخليج ... هذا ان تعذر عليك وجود عمل بالجزائر

[اميرة الامواج]

بارك الله فيك
عاود عاود واش قلت
قلت نترك العمل
راك من نيتك
راك جايب خبر واش راح دير
وكي تترك العمل واش دير
عندك عمل ودخر تسترزق منوا
ولا تخرج وتقعد تقابل الحيوط
الناس تحوس على الخدمة بالضوء وانت تحوس تترك الخدمة .
شوف اقعد في خدمتك وبدل من عقليتك
حاول انت تأثر فيهم ماشي هما يأثروا فيك .....
ولا مقدرتش حاول افرض احترامك عندما يرونك .....
انا احس بك اخي الفاضل ....ربما أنا عانيت مثلك عندما ذهبت للدراسة ووجدت نفسي في محيط غير محيطي وعقلية غير عقليتي
ومحيط فاسد ولكن والله وفي مدة 4 سنوات وعند انتهائي من الدراسة الكل بكو عني ....
المهم لا تتأثر بيهم .....
وانا انسان صالح لا اسمع لا اتكلم لا أرى .
يدبروا ريسانهم المهم انت عاملهم بالحكمة والحسنة ....

سلام من قلب يحب السلام