للترفيه~~~(قيمة الفلسفة)

[achiever.x]

قيمة الفلسفة يا بابا حكايتها حكاية
شووووفوا معايا 😘😘😘
الفلسفة بكري بكري بكري خلااااه كانت هي كل شيء كانوا يقولوها mama بصح ام شكون ؟؟ انعم اسيدي ام العلوم .
هاذي عند شكون عند اليونان🎅🎅 + فلاسفة المسلمين.😻😻
ايا سيدي بدا العلم يتطور📈📈📈📈 و ظهر شيء سمو المنهج التجريبي و بوووووم تقلبت الحالة
مسكينة طاطا الفلسفة كاامل ولادها خلاوها وراحوا و حطوها في دار العجزة 😭😭😭 وولات Solitair
ايا سيدي من هنا خرج لي يقول ماما فلسفة بححح و معندها حتى فايدة و لا قيمة و الجماعة لخرين يقلك الا و الف لا ماما فلسفة عندها فايدة
اوكي بب هاذي لي لفوق مقدمة 😎

ايا نبداو ،،حل وذنيك و عينيك 👂👀
اولا : الفلسفة عندها قيمة 💪💪💪
شكون قال هكذا : عندها ربع ذكورا قالوا هكذا هاذوا احفادها يحبوها و هوما : ديكااارت
كارل ياسبريس (كي شغل بسباس ) ، مارتن هيجلر(مارتن و هاجر) ، برغسون (كي شغل كرواسون)
و البرهنة هي
1 بوجود الفلسفة نضمن صحة التفكير و استمراريته : بيها حنا منفكروا ما وال (تشفاو على اذاكا الاشهار نتاع اوبي ههههه مليح للرجيم مليح لكلشي..)
2نضمن مناقشة العلم كي شغل هي الشاف تراجع كلشي خدمتها كي الشياب غير تعلاق
3هي لي تخلينا نتأكدو من صحة المواضيع 👼👼
4 آولادي الفلسفة مهيش غير ميتافيزيقا كيما يقولوا ولاد لحرام مسكينة هي تهتم بدراسة حياة الانسان ووجوده عكس لبيولوجيا و التجريب ( يعني الفلسفة هي الام الحنون اللي تهتم بحياة ولادهم مشاعرهم احاسيسهم تفكيرهم مش كيما مرت باباهم البيولوجيا و التجريب لي همهم غير الدراهم و الشهرة )
و من هنا نخرجو بشي انو الفلسفة ام العلوم بلا جدهم كااامل اوكي بب واحد مايغلطك هوما كذابين شد في ماماك و جامي تخليها وحدها

النقد : بصح ياعمري زدتي فيها رجعتيها تقول من الاولياء الصالحين (بصح هنا تدل على النقد = لكن)
اوووو كيفها كيف لخرين ،،ملاحظتيش بلي هي بعقليتها لقديمة اخرت تقدم الانسان بمئات السنين ابابابابا
شوف كفاااه 👳👳 لا يا حليش 😹😹😹

الموقف الزاوج : هاذي الفلسفة والووووو هي والو افهمها اوكي bb والو لاقيمة لاخوها نقلك علاه شوف معاي
1 تحصيل حاااصل راك دور في نفس النقطة لاتقدم لاوال كي شغل تقول اماني بنت فريد /فريد بنتوا اماني
2 ميتافيزيقا واش معناها : يعني داخلة في علم الغيب ،،الغيبيات (اتفكروا درس العقل في الاسلامية من حدوده عدم التفكير في ذات الله و الغيبيات اوكي بب متنساهاش ) شفتي هذيك نتاع لي يروحوا عند سحار باه يزوجوا هكذاااك و هاذوك لي يحبوا يبدلوا القدر و الجماعة لي دخلت فالتفلسيف نتاع العام الجاي تفناء هكذاااك آكم شاطرين و ووصل الميساج مديروش vu و تخلوني اوكي
3 الفلسفة تعقد حياة الانسان خدمتها غير تعلاق و تحب تشوف مع الصغيرة و لكبيرة هاذي غالطة هاذي صحيحة هاذي هك هاذي مش هك ياجدك قلقتني (يا ماما كون جات حماة كاش واحد فيكم ننذب وجهي بالقرداش )
4 عملها سوى طرح الاسئلة كي شغل طوڨوموري(كونان ههه) متجاوب على والو هي تعرف غير دخلك (الانسان) في مواضيع معقدة تخليه مسكين مقتول بالقنطة

يا ماما شوي ونسيت ولادك اللي ميسواوش وقالو عليك هاذ الشي الخايب كامل دركا نبيع بيهم هوما : غوبلو (ههه تقولشي من الفضاء)،، اوجست كونت (ممم اكونت حساب اوجست كي شغل حساب فيسبوك خاص ب اوجست هههه كونت تاع اوجست ) هذا ماكان شدوا هاذوا لي مصالحينش وخلاه خلينا من ولاد الشر

النقد : بصح والله غير حرام عليكم مسكينة حطيتوا فيها لعيوب السبع ،،،هي مخصها والو بالعكس راها سعت جاهدا باه متخليش العلم يستغل الانسان و يبلعطوا بزوج كلمات حلوين
التركيب : شوفي ماما فلسفة انا قررت نصارحك انا اللي نخمم فيه نقولو انت فيك و عليك 😱😱😱
و ها ننذب تعودي تموتي
انعم فيك و عليك صح انت فووور و تعرفيلها و منعرف واش (زيدوا من عندكم شوي مدح و تبلعيط ) بصح يا ماما علاه تعلقي بزاااف ملاحظتيش بلي هبلتي خوتي علاه عليك (😭😭😭هبلونا بيك في هاذ الباك و هااااا اهأ اهأ اهأ)
قالهم وحد السيد اسموا امام عبد الفتاح ماما الفلسفة و زوجة ابي الكريمة العلم راهم كي السمنة على العسل مترابطين و متفاهمين و يكملوا بعضاهم و بابا راضي عليهم و علينا
و ربي يرضا علي و عليكم وان شاء الله يوفقنا
(منقولة)