معقودة هايلة

[الاميرة سميرة]

صح رمضانكم جبتلكم طريقتي البسيطة
في صنع المعقودة فعلا تجي منفوخة و خفيفة
بشهادة كل من كلاها عندي نخليكم مع الصور
نتمنى تجربوها و تعجبكم نتوما تاني و صح فطوركم
1 اولا غلي البطاطا بقشورها و بعدما تطيب قشريها و مرسيها و هي سخونة
2 ثانيا زيديلها معدنوس مقطع و ثوم مرحي و ملح و زعفران و خلطيها
3 اضيفي البيض على حسب كمية البطاطا اللي درتيها المهم تكون طرية ماشي يابسة و ماشي جارية بزاف
4 باه ما تنفتحلكش فالمقلاة زيدي قيس مغرف صغيرة معمرة نشاء و خلطي كل المكونات مع بعض
5 غطيها و خليها ترتاح فالثلاجة من الاحسن 5 سوايع باه تتشرب البيض و تشد روحها
6 سخنني مقلاة فيها زيت مين يسخت زين مليح نقصي للنار خليها متوسطة و شكلي كويرات
من الخليط تلقايه يلصق فاليد عادي رفدي بملعقة و حطيهم فالفرينة رمديهم غاية و سقمي الشكل الدائري
7 حطيهم فالمقلاة متباعدين و ما تحركيهمش حتى تشوفيها شدت روحها و تحمرت من تحت قلبيها للجهة الاخرى
8 حطيهم فوق ورق ماص للزيت و قدميهم كمقبلة فعلا يجو خفاف و بنان بزاف