هل أنا مخطئة

[مشكلتي]

السلام عليكم
خلاصة الأمر أني امرأة متزوجة و عاملة عندي 9 سنوات زواج أسكن في منطقة تبعد على إقامة أهل زوجي بحوالي ساعة و نصف بالسيارة
المهم اشتريت رفقة زوجي قطعة أرض من أجل البناء في منطقة سكن أهل زوجي و لما بدأنا البناء كل شي جانا صعيب و بسيف باش قدرنا نديرو بلات فورم و هذا بسبب البعد و منذ فترة قليلة لقينا قطعة أرض بسعر مغري جدا لأن صاحبها كان بحاجة للنقود فقررنا شراءها و بيع القطعة القديمة منها نستفيد من الفارق بين القطعتين و نكملو نبنيو بيه و من جهة أخرى نقربوا في السكن للعمل تاعنا لكن المشكلة في أم زوجي التي أقامت الدنيا و أقعدتها لما سمعت الخبر و اتهمتني أني أريد أخذ ابنها بعيدا عتها .
يعني سبحان الله هل أم زوجي عنها الحق تدخل في أمر مثل هذا مع العلم أن معظم ثمن القطعة و البناء هي نقودي الخاصة من دون زوجي لأن زوجي شهريتو كان يصرفها على الدار و داير مبلغ شهري يمدو لدارهم يعني ماكانش يوفر .
و مع العلم أن أم زوجي لديها أبناء آخرين غير زوجي متزوجين و يسكنو وحدهم و عنها بنات أيضا متزوجات و تقيم حاليا مع ابنتها الغير متزوجة و أب زوجي
يعني الحمد لله ماراهيش وحدها و إذا قعدت وحدها أنا مستعدة باش نرفدها و تجي تسكن معايا معليش لكن أن تقف في طريق مستقبلي و مستقبل أبنائي هذا الذي لا أتقبله مع العلم أن البناء صعب جدا و يتطلب ميزانية كبيرة صراحة ماقدرتش عليها مع متطلبات الحياة .
أنا انسانة نخاف ربي و ما نحبش العقوق و ربي شاهد أني عمري مالحقتها بكلمة و دايما نشجع زوجي باش يبر بيها و في أحيان كثيرة نعطي مبالغ مالية لزوجي يشريلها حوايج كي شغل من عندو و أنا نعتبرها صدقة من عندي على خاطر هي كي نمدلها الدراهم مباشرة تتشنف و ماتحبش تشد من عندي ماعلاباليش و علاش ؟
سؤالي فقط هل أخطأت فعلا في حقها و ديتلها وليدها ؟