أولا قبل الخوض في الموضوع....أقول للإخوة المترشحين و المترشحات....لا داعي للقلق ولا داعي أيضا لتهويل الأمور....فكل الأمر لا يعدو كونه مسابقة كباقي المسابقات و بالعربية ماش رايح تطلع صاروخ للفضاء و ماش رايح تصنع قنبلة ذرية....الإختبارات هي اسئلة عادية و ستكون في متناول الجميع و في حدود معارف كل مترشح...اللهم إذا كان المترشح حابس في راسو....هذيك الساعة ما عندنا ما رايحين نديرولو.
بالنسبة لي كمترشح في منصب أستاذ لغة فرنسية اخترت التعليم الإبتدائي مع أني متحصل على شهادة ماستر و ذلك لثلاثة أسباب : السبب الأول هو أنه في ولايتنا عدد المناصب في الطور الثانوي قليل لا يتعدى السبعة مناصب و عليه ستكون المنافسة شرسة و فرض النجاح ضئيلة، السبب الثاني هو كثرة المشاغبة و الهمجية عند تلاميذ الطور المتوسط و صعوبة السيطرة عليهم ضف إلى ذلك أنني على أعصابي و شديد التوتر لأتفه الأسباب و قادر نضرب واحد نقتلو و نكملها في الحبس المؤبد...السبب الثالث : أريحية التدريس في الطور الإبتدائي بالمقارنة مع باقي الأطوار و العدد المقبول من المناصب المتوفرة مما يرفح حظوظ النجاح.
أما بالنسبة للمراجعة و التحضير...مانكذبش على خاوتي...و الله إلى غاية كتابة هذه الأسطر ما هزيت ورقة أو راجعت كتاب...قررت أبدأ المراجعة يوم غد الخميس حتى تقعد المعلومات جديدة....الله غالب الذاكرة تعبت من كثرة مشاغل الحياة. على هاذي قلت للإخوة ماكان لاه تتقلقوا...مكان والو...الغاشي برك يكبر فيها...و اللي واثق من مستواه مايخافش على روحو.
يارحم باباكم قولولي...شكون اللي معندوش ثقافة عامة غير إنسان عمرو ما هز كتاب للمطالعة و لا بالاك جامي شاف شريط وثائقي في حياتو...مثلا شكون اللي ما يعرفش التصحر و البراكين و الزلازل و الطبيعة غير إنسان جاهل بمحيطه...هذي نقطة.....و النقطة الثانية هي للناس اللي راها خايفة من اللغة الفرنسية و من العلامة الإقصائية....بالاك تقولو بما أنه إختصاص فرنسية راه يدافع عليها.....و الله ربي شاهد ليس للإختصاص علاقة بهذا و لكن قلي بربك كيفاش واحد جامعي عندو شهادة مهما كان إختصاصو ما يقدرش يجيب 5 في الفرنسية c'est grave
زيد بالنسبة للناس اللي راها خايفة من تكنولوجيات الإعلام و الإتصال : شكون اللي ما راهش يستعمل في الحاسوب اليوم...شكون اللي ما راهش يكونيكتي بالبورطابل...شكون اللي ما يستعملش الجيل الثالث....شكون اللي ما يستعملش word و exel و خلي الملتيميديا...الشبكات الإجتماعية و غيرها كثير...بالعربية رانا نستعملو في التكنولوجيا كل يوم.
الأن ندخلو للموضوع اللي حبيت نشارك فيه أفكاري حول المسابقة مع الإخوة المترشحين....كيما راكم تعرفو...الوزارة دارت إجبارية الإمتحان في اللغة الفرنسية لجميع الشعب...حسب اعتقادي الدولة تاعنا علابالها واش راها تخدم...راهي عارفة بلي أغلبية المترشحين عندهم مشكل في اللغة الفرنسية و لا يتقنون أبجدياتها...و هذا طبعا دون الخوض في الأسباب اللي أنا متأكد من أنها نتيجة تراكمات لفشل مناهج و طرق التدريس السابقة...المهم خلينا من هاذ لحكاية....قولنا بلي الغالبية العظمى من المترشحين لا يتقنون الفرنسية و هذي ما جبتهاش أنا من عندي و لكن الإحصائيات و الواقع المعاش يؤكد هذا...و هذا ما سيؤدي (و الوزارة عارفة بهاذ الشيء) إلى تساقط الممتحنين كالذباب في اختبار الفرنسية و زيدلها اختبار الثقافة العامة اللي الكل يعلم أن جل المتخرجين من الجامعة و حتى أساتذة في الميدان تعودوا على ثقافة التلقين و الحفظ و أغلبهم لا يعرف حتى عدد كواكب المجموعة الشمسية مع احترامنا دائما للأكفاء المثابرين...الوزارة راهي عارفة بلي شبابنا خاطيه الثقافة العامة و عمرو ما طالع كتاب في حياتو و الأغلبية راهي لاهية بالملاعب و البارسا و الريال و حافظة تواريخ جميع المناسبات الكروية عن ظهر قلب....مالا وزارتنا المحترمة لعبت على هاذي الأوتار باش تقلص من نسب النجاح على قد ما تقدر و كاش احتجاج تجبدلكم كشوف نقاط المسابقة و تحملكم المسؤولية في عدم النجاح.
لكن في الجهة المقابلة....هاذ المسابقة راهي مليحة لبعض الناس المجتهدين و الأكفاء و اللذين يملكون المعلومات الغزيرة و اللي نجحوا بعرق جبينهم....هاذو الناس المسابقة ما تخلعهمش على خاطر متمكنين من جميع المواد و جاهزين للإجابة بلا مراجعة و بلا حفاظة....لكن فئة أخرى من الإنتهازيين راها خايفة حتى للركب من المسابقة على خاطر الأغلبية فيهم طلعو بالغش في الإمتحانات في الجامعة و جمعوا نقاطهم بالتحايل و الشيتة و النفاق و التودد إلى الأساتذة على أظهر الأكفاء...هؤلاء اللذين لا يعرفون هل الأرض كروية أم مسطحة سيتساقطون كما يتساقط البعوض عند رشه بالمبيد.
المهم علابالي طولت عليكم...راني شاركتكم برأيي في مسابقة هاذ العام...لأني رأيت بأن هاذ القسم أصابه الشلل و معظم مواضيعه أصبحت بلا طعم لذا ارتأيت أن أعطيه نفسا جديدا بالاك يعاود يتفاعل القسم كيما عوايدو....و في الإخير أتمنى للجميع بدون استثناء النجاح و الحصول على منصب عمل قار وحياة مستقرة و سعيدة.
( تقرير عن مشاركة سيئة )، و الموجودة أسفل كل مشاركة .
2016-04-27, 21:14
نقاط مهمة في مسابقة التوظيف لهذا العام من مترشح
العرض العادي
