بركوكس قبايلي بالقديد ... طبق من عند الجدات الطيبات بايدي زيكا

[انا هي رزيقة]

بمناسبة حلول السنة الهجرية جعلها الله سنة خيرات و مسرات علينا كاااامل يا رحمان يا رحيم جبتلكم البركوكس بالبقول الجافة و البطاطا و القديد لي هو اللحم العيد لي ملحاتو يما ربي يحفظها كاين لي يقولولو خليع على ما اضن و حنا بالقبايلية نقولو" اشذلوح" قراوها كيفاه راهي مكتوبة بالضبط ........ خخخخخخ وصفة من مخاميخ الجدات القبايليات الطيبات مناسبتية بامتياز و تنفع للجمايع و اللمات ... مشبعة و صحية و اقتصادية ككل أكلات أناس الجبال الطيبون ... غالبا ما تحضر في الأعياد الدينية او كي يحفف الطفل لأول مرة او يسنن لأول مرة و في نهارات الشتاء القارص ايضا ...علميا اضافة البطاطا مع البقول الجافة يسهل من عملية هضمها ..... ياخاوتي حرت منين الجدات الطيبات جابو هذ المعلومة من غير قراية و لا يحزنون ........ خخخخخخ بعد هذه اللمحة التاريخية نمرو الى الوصفة على بركة الله

اولا صورة تشويقية ..... خخخخخخخ

مقادير الوصفة ساهلة ماهلة نحتاج كمية من الحمص و اللوبيا البيضاء منقوعين ليلة كاملة و مقدار من اللوبيا الصغيورة امو عيون سوداء هكذا يقولولها على ما اضن .....خخخخخ كمية مليحة من البصل هذي ضروري جدا اولا يزيد للطبق بنة على بنة و ثانيا يخثر المرقة و يجعل قوامها ثقيل و يسهل من امتصاصها من طرف البركوكس .... و طماطم و لحم القديد منقوع ليلة كاملة ثم نقوم بغسله و غليه لمدة حوالي 5 دقائق للتخلص من اكبر قدر من الملح الذي فيه ما يساعد على الحصول على مرقة لذيذة بذوق القديد من غير ملوحة زائدة و بطاطا و بركوكس طبعا ... انا استعملت 2 كلغ الله ابارك تلاقينا كامل في دارنا ...لمة كبيرة يعني ...... خخخخخ

اولا نحطو فوق النار قدر مملوء بالماء الى النصف كي يبدا بالغليان نفرغو فيه البصل مع الطماطم مقطعين مربعات مشي مرابييين مهم جدا و معاهم هذاك اللحم ثم نزيدو ملعقة كبيرة راس الحانوت ، حنا نحطو وحد لعقاقر نسموهم "لعقاقر نتمورث" بما معناه "عقاقر لبلاد" فيهم كمية لا باس بها من الكسبر اليابس المطحون و عقاقر اخرى متنوعة المهم لازم كسبر يابس مطحون و نصف ملعقة فلفل عكري (احمر يعني) و نصف مكلعقة صغيرة كمون و نزيدو اللوبيا و الحمص و نزيدو الملح و نخلو كلشي يطيب على مهله... هنا رانا كملنا نصف الوصفة تقريبا .... شفتو السهالة....... خخخخخ

من جهة اخرى تاخذي البركوكس تاعك و تشلليه كيما نديرو مع الطعام او السكسو و تحطيه يستقطر في كسكاس و تكوني ثاني حطيتي اللوبيا الصغيورة تاعك امو عيون سوداء في طنجرة تاخذ غلوة لمدة حوالي 5 دقائق باه تتخلصي من هذاك اللون الاسود تاعها باه ميفسدلكش لون المرقة تاعك و تكوني ثاني قطعتي البطاطا تاعك مربعات و تخليها في الماء لحين وضعها في القدرة . على فكرة انا كي قطعت البطاطا ظهرتلي قليلة زدت 2 كبار لانو كمية البركوكس تاعي كبيرة الله ابارك .

كي يقطر البركوكس تاعك حليه ثم حطيه يفور مليح ثم فرغيه في جفنة و زيدي فيه ملح و حوالي فنجان صغير زيت (انا درت زيت زيتون) بصح تقدرو تديرو زيت عادية لانو في هذ المرحلة من الطياب مش مهم ... الهدف منها فقط يجينا البركوكس مفرز و حبة حبة ....و نزيدو ماء و هو هكذاك سخون اخدمي بالملعقة اذا متحمليه السخونية ... لازم تشوفي الماء باين في قاع الجفنة ثم غطيه و خليه يتشرب هذاك الماء ... بعد مرور حوالي 10 دقائق عاودي حطي البركوكس في الكسكاس و حطيه يفور ... على فكرة متنحيش البركوكس ثم ثم كي يبدا الفوران خليه يزيد يفور حوالي 10 دقائق .. ثم عاودي فرغيه في الجفنة و زيديلو الماء من المهم جدا تزيدي الماء مباشرة بعد متفرغيه ثم تغطيه مدة 10 دقائق به يتشرب هذاك الماء... هذه العملية تعاوديها بلاك 4 خطرات حتى تشوفي حبات البركوكس تاعك طراو و اصبح لونهم ابيض و تضاعف حجمهم بشكل كبير العملية تشبه تفوير التليتلي للي موالفين يديروه.. فقط حنا نكملو طهي البركوكس حتى يطيب تماما .... في اثناء طهي البركوكس متنسايش تحطي اللوبيا الصغيورة بعد حوالي 40 دقيقة من طهي المرقة.. اما البطاطا فخليها تقريبا لأخر تفويرة تع البركوكس باه متذوبلكش ...و ثاني حطي بيض يغلي العملية كلها على بعضها تاخذ حوالي ساعتين او اكثر على نار متوسطة لانه من الضروري ان نحصل على لحم طايب زبدة و بقول طايبين مليح من غير مايذوبو طبعا . ...

قبل متحطي البركوكس تاعك يفور اخر تفويرة نحي اللحم تاعك من المرقةو حطي االبركوس يفور ..

ثم فرغي البركوكس في الجفنة بعد متكوني تاكدتي انو طاب لازم تذوقي طبعا ... و هكذاك يفرفر فرغي فوقو المرقة بالمغرف شوية شوية باه يمتصها .. هذا قوام المرقة ثم نزيدو هذاك اللحم بعد مفتتناه و نخلطو و ندوقو اذا كان مسقي و يزحلق قي القرجومة ... خخخخخ نحبسو سينون زيدي الصوص لازم نتحصلو على قوام بركوكس مجمر و نحسوه طري بصح مشي مسقي كيما الطعام .....يعني تبان بنة المرقة و في نفس الوقت تحسي بالبركوكس معاها .. عموما كاين لي يحبوه مسقي مشي مشكل .. هي مسالة اذواق حنا في عائلتنا نحبوه ما بين و بين .....

بعد متحصلتي على القوام المطلوب تجي اللحظة الحاسمة لي تفرغي فيها عليه زيت الزيتون و بسخاء كبير لمساعدته كي يطرا اكثر فاكثر و يزحلق فعلا في القرجومة بزيادة نقطة فوق القاف ...... خخخخخ و هنا من الضروري ان اقول لك سيدتي لا مفر من زيت الزيتون و ليس لديك الخيار .... لانو هي الوحيدة التي يتلائم ذوقها مع ذوق القديد بصريح العبارة هذه الأكلة اخترعوها خصيصا لاستهلاك زيت الزيتون ...... خخخخخخ

هنا ماماتي على قول مريومتي البسكرية ربي يذكرها بالخير راهي تفرغلي الزيت و تزيد ......خخخخخخ

وشهية طيبة يا احلى فحلة لانك ساعفتيني و قريتي الموضوع الى اخره ... شكرا عزيزتي و فرجة ممتعة

ملاحظة هامة ... هذه الاكلة يمكن اعدادها بالدجاج عوض لحم القديد تجي خفيفة و بنينة و لذيذة بكل المقاييس ..فقط من المستحسن نزيدو شوية شحمة في المرقة و نحيوها في الاخير قبل منمرقو البركوكس صدقوني ذوقها مش راح يبان.. راح تمد فقط ذوق مميز للمرقة