تصرفات امي ستصيبني بالجنون

[مشكلتي]

السلام عليكم و رحمة الله تعالى و بركاته
بدون اطالة ساطرح المشكلة و ان شاء الله تعاونوني
انا فتاة مخطوبة وقريب عرسي ان شاء الله و انا الكبيرة في المنزل _عاملة والحمد لله
مشكلتي هي امي فهي دائما تشكي مني لابي و لاخوتي الصغار رغم اني والله منديرلها حاجة
على اتفه حاجة تسمع الجيران كامل عليا ولوكان خواتاتي اللي اقل مني يديرولها مشاكل كبار ولا تقارن ابدا مع تفاهاتي لا تغظب ولا تفعل لهن شيئا
تتجادل معي وتخاصمني على اتفه الاسباب حتى في جهازي رغم اني انا اللي نخلص كلشي و حاجة ماتعجبها تقعد غير تقولي انا في وقتي ماكناش نديرو هكدا و هادا بزاف و نفهمها بلي وقتنا و وقتهم ماشي كيف كيف
تستخسر فيا كلشي حتى خطيبي تقولي لوكان غير خطبني في اختك الاخرى باين عليه ناس ملاح
لوكان تشوف عندي حاجة مليحة تمدها لاخوتاتي بلا ادني و كي نقولها علاه تقولي يا خواتات و انا لوكان نهز حوايجهم مع موافقتهم تقولي علاه راكي خدامة اشري
كظمت غيظي بزاف و اثر هاد الشي على نفسيتي بزاف وليت عصبية فوق الحق وديما نرقد على البكاء
لوكان نديرلها الجنة في طبسي ماتعجبهاش و علابالي بلي البر بالوالدين هو كلشي ومالقيتش طريقة نتعامل بيها معاها
ماكانش نهار يفوت عليا الا و علقت على حاجة او تصرف حتى و لوكان نكون فرحانة تسمطلي الفرحة
نحسها تكرهني رغم اني نحبها و تهمني صحتها بزاااف وديما نديرلها هدايا ونخرجها ونديرلها على خاطرها بصح قلييييييييييييل وين نلقى كلمات شكر
مع العلم اني متخلقة و جامي واحد شكا مني و كنت ديما متفوقة في دراستي

تعبت يا خاوتي حابة نبرها ولكنها مصعبة عليا بزاف الامر هادا
دبرو عليا راهي نفسيتي تعبت تماما


ملاحظة, معنديش مشاكل مع حتى فرد في العائلة و ابي راضي عليا و الحمد لله
وووو بالاك تقولو بلي ممكن ماكيش بنتها الحقيقية لا لا انا بنتها

و في الاخير ادعيولي ربي يحنن قلبها عليا و يساعدني تعبت تعبت تعبت