الرجاء الدخول نساء ورجال عاونوني

[مشكلتي]

كنت في البكالوريا نقرى عادي عايشة لباس والحمد في العائلة مثالية كيما يلزم من كلش ام ماكثة في بيت الاب يعمل عمل محترم وراقي جدااا

المهم انا محبوبة من طرف الجميع يعني قداه من مرة يتقدمو لخطبتي بزاف بزاف وانا نرفض ومبعد ضربتلي في راسي قلت واش فيها ممكن نزوج يعني حبيت نزوج
المهم في يوم من الايام رايحة نقرى وقفني واحد وتعرفت عليه وعجبني وعجبتو وقالي يابنت الناس انا راني جربت كلشي في هدي الدنيا شربت دعت خالطت بنات بزاف بصح لقيت الطريق ماتوصلش وخلاص تغيرت تغيير جذري وحاب نبدا حياتي صفحة بيضا

المهم قعدنا على اتصال مدة شهر جا خطبني شوية اهلي ماوافقوش سمعو على الماضي تاعو وبلي كان يشرب ..............الخ بلعقل بلعقل قنعهم وانا قنعتهم ثاني
تمت الخطبة على اكمل وجه العائلة تاعو في القمة ونعمة الام ونعمة الاب المهم كلشي هايل وحتى خطيبي ظريف وكبير في العمر اكبر مني ب 10 سنين

المهم فترة الخطوبة بديت نلاحظ خاطيبي مايعيطليش بزاف خلاص وديما اوكيبي وانا نحلم ونخمم فيه في المقابل هو عمرو ماعبرلي ديما نحسو واقعي

المهم بديت نتحسس ونحير علاه ؟؟؟؟؟بقيت ساكتة وصابرة قلت بلاك الخدمة ضك بشوية يتفكرني ويهتم بيا كيما يلزم ............... والو لاحياة لمن تنادي فوت الباك وديت الباك وفرحة وهو فرح ووصل العرس وهو ماهو عندو حتى فكرة واش الاخبار ولا ..........مازال ميشي مهتم ديما راني مشغول راني مشغول ................وصل العرس حتى خاتم العرس ماخيرناهش كيف كيف شراوه تاع دارهم اخر لحظة وانا كنت زعفانة انو مميشي مهتم بادق التفاصيل


وصل اسبوع العرس قبل العرس بيومين كنت عند الحفافة دخلو عليا زوج بنات قاتلي راجلك لرايحة تتزوج به كان عاقد عليا وراهو خماج وميشي ناس ملاح واش داك ليه وهددتني بالقتل انا انهرت وطحت ثمة وتحطمت نفسيا مع اني علبالي بلي راهي تكدب محال يكون كان مزوج بها ابداااا
واتصلت به جا ثمة وحكالي قالي هدي كنت نعرفها عندي عامين ولا وكنت حاب نتزوج بها ودارنا ماقبلوش لخاطر مطلقة وعندها طفلة وضك كي سمعت بيا رايحة نتزوج راهي ظهرت في حياتي وقطعت يدها توالي و اليوم وصلت ليك المهم زاد حضر ابي وسمع وقالي بلاك صح ماضي وراح وهي غارت برك قالي تصرا بزاف بنات يحبو يفسدو
المهم دمرت بزاف هكداك وفات العرس عادي وكيما يلزم رحنا فواياج دونونس كنت قاعدة قتلو اعطيني دقيقة تليفونك كنت رايحة نشوف الساعة باش نريقل تليفوني لقيت الفايس محلول دخلت لقيتها دزتلو تصويرتها وهو دزلها 444444444444
تشوكيت حرت قتلو واش هدا ؟؟؟؟؟؟؟؟؟؟؟؟؟قالي انا خاطي هي هي
المهم فاتت الايام وهي كل يوم دز ميساجات في تليفون واكتشفت انو يحكي معاها في الهاتف وفي النات حكيت معاها قلتلها واش كاين واش تسحقي عندو قاتلي نعرفو 7 سنين وانا وهو من نهار طلقت نحبو ويحبني ويعاشرني معاشرة الازواج وخدعني وماقليش بلي تزوج +....+........المهم اكتشفت بلي فترة الخطوبة كان معاها وانا لا خبر بحكم اني ماعنديش خبرة مافتلوش وهو كزوج قايم بكل واجباتو معايا بصح كل خطرة يقولي خلاص ونزيد نفيق بلي عندو علاقة معاها ومرة طليت على الهاتف تاعو لقيت فيديوات خماج وحرام ......... ومكالمات منو ومنها
المهم كي نواجهو يولي عصبي وضربني
وايام يجي عينيه حومر بزاف بزاف نحير علاه ضك راني شاكة فيه يشرب او شبه متاكدة
راني حامل ومانيش عارفة واش ندير فقدت الثقة فيه وكرهت الكدب تاعو اكتشفت بلي الحكاياتو كامل كذب وخداع
صبرت صبرت كرهت من اول يوم ماشفت الربح بسبابها وبسباب الكدب تاعو عليا في كلش
وزيد اكتشفت انو هي عاهرة تخدم في البارات ومافيا
وانا عمري ماخلطت ولا جربت سواق كيما هدووووووو راني رايحة نهبل اعصابي نبات مع الكوابيس وضك راني في تفكير نطلق ولالا
اعطيوني الحل وتاع دارنا راهم ضك سمعو بكلش وحتى تاع دارهم كانو يعرفو وخباو علينا
ندمت على الزواج منو خدعني وانا لي كنت وردة وهو ضك يقولي ديتك كي عدتي عفيفة وشريفة وخاطيك

شورو عليا ياخاوتي كرهت والله كرهت تبهديلة قدام الناس واش يقولو عليا ؟؟؟؟؟؟؟ اعطيوني ال

[مراد سابقا]

سبحان الله من مجموع كامل ولاد الفاميليا لي خطبوك خيرتي واحد رخيص دمرلك حياتك

انا هذي الظاهرة لا حظتها مع اغلب بنات الجزائر

يكرهوا وليد الفاميليا ويحبوا الصعلوك باذن الله سازوج اجنبية

[مياسم الصمت]

واش نقولك يا اختي
الغلطة فيك من الاول
ماكان لازم تقبلي بانسان مثل هذا
انت حطيتي الزواج غير عاطفة و امور مادية
الزواج قبل هو استقرار وسكن
انت نظرت للامور بايجابية لهذا الشخص ونسيت انه هناك الجانب السيء الذي يمكن ان يطغى عليه ويدمر حياتك

وللاسف هذا ما حدث وغلب الطبع التطبع

اختي انسان من النوع هذا ما ينصلح حاله
ففري بما بقي منك من شتات وحاولي لملمة نفسك من جديد وان كان صعبا لكنه ليس مستحيل

الاحسن ان تكوني مطلقة على ان تكوني زوجة سكير زان

ثم فكري في ابنك ان قدر الله له ان يجيء الى الدنيا كيف سيكون حاله مع أب كهذا

هو نتاج القرارات العشوائية وقبل ذلك قدر الله
وما عليك الا الصبر
فرج الله همك وعوضك خيرا

[fella111]

الله يفرج عليك يا اختي غلطتي كي كملتي رغم علمك السابق بلي ما هوش على اخلاق لن اقول لك تطلقي لكن خليه اخر حل .

[ayouta202]

نا نقولك الله يهديه و الله يفرج عليك
ان شاء الله مين يجي الولد يحمد ربي وبالاك يغيرل من طبعو
اكثري من الدعاء

[إسلام الفاروق]

فكري جيدا الزواج خطوة كبيرة تاكدي اذا كان يشرب واللا
اسال الله ان يرزقك الزوج الصالح
سلام

[toulay]

سلام عليكم
يا اختي مزالك تفكر في الطلاق طيش عليك الهم هذا وطلقوا عندك داركم واخطييييييييييك من هذا العبد
كون تبقى معاه يجيك غير وجع الراس مالا من درك فكك منو وربي ان شاء الله يعوضك
يا اختي الهدرة تاع الناس فيها فيها اربح صحتك وهني راسك وخلي الناس تهدر حتى تشبع خمم في روحك
بالتوفيق

[مـحمد 88]

كيما يولد ابنه درك يتغير اتجاهك و يصبح يحبك
و احمدي ربي و اشكريه ، بلي انك عرفت كل شيء و هذه اشياء بسيطة جدا و يمكن ان يتحل مشاكلها
ربي يهديه و درك يتوب ربي يهديه

[ام رضوان]

السلام عليكم
كان الله في عونك فحالتك يرثى لها ولامجال للومك او عتابك لانو فات اللي فات
اختي نصيحتي لك
ابتعدي عن هذا الانسان قدر الامكان
اختي المطلقة ليست ملعونة او خارجة من رحمة ربي
الطلاق ابتلاء
انت قلت البنت خارجة الطريق وتاع ملاهي وهو يعاشر فيها مثل الازواج شكون يضمن بلي ماهيش حاملة لمرض خبيث ويقدر ينقلولك هذا الزاني.
انفصلى عنه لانو الزاني لا ينكح الا زانية.
ماتخليش الخوف يسيطر عليك
خلي ابنك او بنتك يعيشو في بيئة نظيفة.
وكملي قرايتك وما تدريش يمكن ربي يرزقك بخير منو.
ربي يفرج كربك امييييييين

[ايمان4]

تزوجتي صغيرة الحق كان لازم على الاقل تديري مستقبل على الاقل ليسانس و تخدمي باش ما تنتكليش عليه دركا نواجهو الواقع بنت مطلقة + طفل .... شوية صعيبة عليك داركم غادي ميبقاوش كما كانو + هدرة الناس ... لكان تخدمي انت تعيلي زوجك و تعيشي في ار باابك عادي و زيد زالديك مرايحينش يدومو ليك و ليانك
يعني الطلاق حل مستبعد ... قرار متسرع و الانسان كان خاطيء لكان وليد فاميلية كون راكي مهنية مصقصيتوش عليه مليح او لكان بطلتي قبل يومين من العرس احسن من لي وصلتي .... درك واجهيه بالامر ازعفي و خيريه يا يبطل هاد الافعال السيئة او مترجعيهش هدديديه و حسسيسسيه بلي راكي من نيتك ...و دخلي افراد العائلة نتاعك ف اللعب ... و ايلا التهديد منفعكش و قدرتي تصبري الله يسهل ايلا مقدرتيش راكي عادا صغيرة و ربي يجيبلك مكتوب اححسن منو ربي يفرج همك

[ayouta202]

الطلاق ابغض الحلال عندالله انشاء الله ربي يهديه ،قبل كل شيء استشيري والديك

[القائدة]

انتي الغالطة
كان المفروض نهار الحفافة كي صرا اللي صار راكي دخلتيه للحفافة و عطاولو كوبة زينة شابة تع العرايس و ماكياج لبناني و لبستيلو فستانك الأبيض و عيطتي للزرنة يجو يزفوه لدار باباه .
ما عندي وش نقلك كثر ربي يلطف

[مواطنة]

اختي الكريمة الله يعطيك الصبر و ما هو الا ابتلاء
نقترح عليك انك تعملي حاجتين الاولى انك تستخيري ربي سبحانو و الثانية تهدري مع امام مسجد مفتي بحضور الوالد ديالك او مرشدة بحضور الام ديالك ولا حياء في الدين
وخافي من حاجتين من الامراض المتنقلة و من ضروفك النفسية و حاولي متغفليش على تصرفات كوني فطنة و ادا لقيتي اي دليل ما تصارحيهش بيه خليه ليك لانو حتى الطلاق مشي سهل لازمك تكوني ذكية و متخليش مثلا صفحة المنتدى مفتوحة و الوعود ديالو بالتغيير يخليهم ليه و للمخلوقة ربي يهديها
يا اختي متمرضيش روحك انت تفائلتي خير و قلتي يمكن يصلح صح كان لي يكونو مشي ملاح و يتوبو مشاء الله لكن هدا ادا مصر و يستغباك متخليش وقت اخر يفوت وانت تخخمي عليه
وادا انت عندك صبر كبير و تتحملي بلا ما تمرضي هدا شي اخر

[نور لاتراه]

السلام عليكم
ذكرت جزئية قد تكون الحل إن شاء الله
في حالة إذا كانت العائلتين تعلمان وضعه الآن وحقيقة علاقته
وهذا ما فُهم من موضوعكم
فالأوجب بهما التدخل
أصلح الله حالكِ ووأراح بالكِ

[محارب الحمق]

انصحك بشيء واحد فقط, هذا ليس مكانا تحل فيه مشكلة بهذا الحجم, فواحد يقول لك طلقي والاخر لا وكأن الامر هين, نصيحتي هي ان تستفتي اماما موثوقا مشهود له بالعلم. الامر لا علاقة له بصغر سنك كما يتوهم البعض وما حدث لك قبل انهائك لدراستك كان يمكن ان يحدث لك بعد نهاية دراستك, بل الخطئ يكمن في ان زواجك مبني بالاساس على اساس هش دنيوي شهواتي بحت, كما ان قولك اوقفني في الشارع اعجبني واعجبته وتكلمنا تكفي لتلخص كل شيء, وكم من مرة قلنا ان الخاطب يأتي من الباب لا من النافدة وقلنا ان الدين اهم من وسامة الخاطب او منصبه او ماله او او او. ربي يسهل