غاضوني والديها وماعرفتش واش ندير

[مشكلتي]

لسلام عليكم ورحمة الله وبركاته


انا فتاة عندي 19 سنة حابة نحكيلكم علا مشكلة ماتخصنيش انا مي والله راهي مقلقتني بالبزاف انا راني دوكا اولى جامعي نقرا في ولاية خاطية دارنا تعرفت علا فتاة درت معاها شمبرة من لول كانت ناس ملاح عاقلة مي دوكا تبلدت بزاف عادت تخالط البنات ماشي ملاح عادت دير المكياج تهدر مع دراري راهي غايضتني بزاف نضل ننصح فيها ياطفلة باعتينا والدينا نقراو ماش نتمسخرو مي هيا تقول ايه ايه عندك الحق مي ماديرش علا كلامي كامل دوكا راهي عادت ماتصليش البورطابل كامل مايحبسش والله صدقوني غايضني باباها باسكو نهار لول كي تلاقينا انا وابي وهيا باباها الراااجل ناس ملاح بزاف والله مايستاهل هكدا وامها تاني دايرتها غير علا تحواس وتمسخير ماتقراش كامل وكي يكلموها دارهم تقلهم لقراية جاتني صعيبة وتبدا تبكيلهم يتقلقو هوما يقلولها نورمال الا ماجبتيش العام ماتتقلقيش واللله راهم غايضين وماعرفتش واش ندير باباها ماهو منقصها والوا يمدلها ساعات بل مليون يقلها المهم تقراي تالمو هوما عائلة ميسورة الحال ماعندهم بزاف يقلها المهم بنتي تقراي وكامل
وهيا دايرة هاديك الدراهم علا الفلكيسي والهدرة وتشري الفيزاوات وتخرج بيهم قوقوولي ياخاوتي كيفاه ندير معاها حابتها ترجع كيما كانت وماقدرتش نرجعها والله غايضيني والديها ساعات نلقاها تبكي تقولي حابة نولي كيما انتيا قولولي كيفاه ندير نقلها شوفي انا كي نجي دير حاجة نتفكر ابي اللي تعب عليا ووصلني لهنا باه نقرا ماشي نتمسخر قتلها ابي دار فيا ثقة وبعتني نقرا مانخونش ثقتو فيا تقولي ايه ومبعدا غير يجوها لبنات تقول ماشي هاديكا الطفلة الللي كنت نهدر معاها صح صروالي بروبلام معها علا جال هاد لبنات مارتحتلهمش قتلها يرحم والديك ماتزيديش تجيبهوملي للشمبرة ماارتحتلهمش قلت بلاك هكدا تبعد عليهم شويا ايا هيا عادت تروحلهم وساعات تقولي ياطفلة عيشي صغرك راهو مايدومش ومانعرف واله مافهمت عليها كامل وحاجة اخرا قاتلي راهو ولد خالتي حاب يخطبني قتلها مليح مالا بطلي الهدرة مع دراري هكدا مبعد بناتك مايجيش اللي يتمسخر بيهم تقولي هوا ماحبش يهدر معايا انا نهدر مع لوخرين باسكو هوا كي تهدر معاه يعود يعيط عليها يقلها اشغلي بقرايتك و وكي تكملي راني نجي للدار والله عجبني قتلها نورمالمو تشدي فيه راهو خايف عليك وماحبكش تهدري معاه باسكو خايف لاماتقريش مليح ويكون هوا السبة قاتلي لالا هوا باين راهو داير رايو انا تاني ندير رايي ماحبتش تفهم عليا وانا مافهمتهاش زادا كل مرة تقولي حاجة ساعات تقولي راكي عاجبتني انتيا خاتمة القران وجامي درتي علاقات وساعات تقولي يالجايحة عيشي صغرك وصغر مايدوملكش ادي تجارب قولولي كيفاه ندير ارجوكم ساعات دور في بالي نقول نكلم امها نقلها علا بنتها وساعات نقول ماندير المشاكل لا ليها لا ليا انا راني حااااايرة والله كيفاه ندير معاها دبرو عليا