غاضتني دموع يما ...

[مشكلتي]

السلام عليكم
قد تكون كلامي غريب و لكني فضفضة و طلب دعاءكم

انا كان والديا كل حياتي كانت امنيتي والدي نهار يشوف تخرجي و شهادتي فقدت والدي و ما شافش فرحتي و خلاها حسرة بقلبي

و فاتت و الحمد الله قدرت نستمر

امي دايما تقولي نتهنى عليك هذا واش باغية من الدنيا خطبني رجل عادي قلت يما مسكينة راح تفرح و كانت فارحة و تبكي و دون اسباب قاللنا بطلت و عادي راح

انا رفضت بعدو عدة عرسان لاسباب نفسية خلفهالي الم الاول

اليوم انا في 34 امي تشوف مع العرايس و تبكي و تقولي يا رب يهنيك و يرزقك حسيت روحي ظلمتها مي و الله فوق يدي كنت تعبانة و مجروحة

خايفة امي تموت و ما يتحققش حلمها
ندعي ربي يفرحها هي بقدر ما بكات في ســبتي

نحس بحسرتها تحرقني
خوفها عليا حطمني

للاسف كاين اللي يتقدم و لما يعرف اني كنت مخطوبة يبطل
انا واش ذنبي هو راح و الله دون اسباب
امي واش ذنبها تتحسر و انا نتحرق بحسرتها

راني كل ما نشوف خوفها عليا نبكي و ندعي برك ربي سبحانه يفرحها
و يا ربي لا تحرمها من شوفة ولادي
يما رفدت ولاد ولادها بين يديها و امنيتها برك تتهنى عليا و امنتي يا رب نشوف ولادي رافدتهم يما

خايفة عليها خايفة ما نقدرش نفرحها و ان كان ماشي بيدي و ربي العالم شحال حاستها مكوية

ماشي على جال زوج ليا و خلاص لا يما تحرقت معايا لما ظلمني خطيبي الاول و خلاني حضرت كلشي للزفاف حتى الناس عرفو الموعد و حشمها و حشمني

يا ربي دموعها مازالو بين عينيا و كل ما تشوف عروسة نلقاها تنظر معايا بالسرقة و تتحسر

الحكاية ماشي حكاية زواج .. اليتم و زيد ليه الظلم و الحكاية اكبر و تفاصيلها كثيرة

يا ربي و ان كنت لا استحق ان يجاب لي دعاء فانت اعظم من ان ترد دعائي
ربي ارحم ضعف امي و دموعها و حسرتها
و فرحها فرحة تنسيها كل العذاب

يا الله ليس لي سواك
استغفرك ربي و اتوب
لا اله الا انت سبحانك اني كنت من الظالمين