مشكلتي هو

[مشكلتي]

السلام عليكم
راح احكيلك مشكلتي او بالاحرى الحرقة الي انا فيها انا بنت عندي 30 سنة من عائلة محترمة ومحافظة وانا اتربية على هذا الشيء والحمد لله بصح ربي مكاتبليش اني ارتبط وراضية بهذا الشيء والحمد لله لكن قبل مدة اتعرفت بشخص على النت كان اكبر مني ب10 سنوات ولما حكينا مع بعض ابدى اعجابه بيا وبشخصيتي وبالادب وصدقوني والله العظيم غير كنا نحكو بكل احترام وهو ثاني بعدها قلت ليه انا نرفض اني نبقى نحكي معاك بهادي الطريقة قالي حتى انا حابة تكون علاقة شرعية قالي احكي مع داركم نجي نديرو الشوفة الشرعية لانه مش شايفني ولازم يكون معاك محرم يعني قالي راح يجيب امه واخته وهو باش يشوفني في دارنا قالي احكي مع باباك وماماك انا بابا في الوقت الي كنت نحكي معاه كان يحضر في نفسه للسفر للحج ماما استأذنت من بابا قالت ليه راه جايني ناس يشوفو بنتك بعد ما انت تسافر وقالت ليه راح يجي خويا المتزوج ويستقبلهم المهم بابا وافق مدام غير رؤيةوفي حضور خويا .......المهم انا حكيت مع خويا والي ولامرة رفعت عيني فيه من الحشمة ومع زوجته و كل عائلتي عرفو بالموضوع ........المهم كنت كل مانحكي معاه صدقوني والله العظيم غير كان معايا بمنتهى الادب والاحترام وكان ناوي فيا صح وكان يقولي باغيك زوجة ليا ......
المهم اتفقنا هاد الاسبوع يجي للدار مع دارهم وكنت انا نحضر في روحي شريت لبسة والقاطو ووجدت كلشي والليلة الي قبل مايجو كنت نحكي معاه عادي ووصفتلو الدار لانو مش من ولايتي .........هذاك النهار الموعدو نضت عادي مشيت للحفافة ووجدت انا الغدا كلش كان على ايدي اختي شوية عاونتني وماما لبست حوايجها وخويا جا مع زوجته واولادهم المهم بيقت نستنى نستنى نستنى وااااااااااالو والمشكل انو ماكنش عندي رقم تليفونه وهو ثاني ماعندوش رقمي لانو كان يقولي مانديش رقمك حتى تصير علاقتنا شرعية .........المهم بقيت نستنى حتى كرهت من بعد خويالي ا راح لداره مع عائلته وانا بقيت نستنى فيه يفتح النت قلت ممكن كشما صار فيه او صار ليه مشكل .........بعثت ليه رسالة قلت ليه وش صار .........الغدوا من ذاك لقيته قرى رسالتي وماردش عليا وحذفني من قائمة الاصدقاء ...صدقوني حسيت روحي على حافة الانهيار اولا الصدمة ووصدمة ماما المسكينة الي نشوف فيها قدامي ............حرقلي قلبي وخلاني نحرق قلب ماما وبهدلني مع خويا ودارنا ..........غير لوكان قالي مزال مانجيش ولا اصبري عليا لالا.........قالي راني جاي غدوة وحكى معايا عادي ...............والله مانستاهل وش صار معايا مشيت معاه بنيتي ووالله ماغلطت معاه ولا حتى غلطت مع نفسي ولا ارتكبت جريمة بالعكس كنت نخاف من ربي معاه وتعارفنا كان في مدة عشرين يوم فقط يعني قلت ليه نرفض اني نبقى معاك بدون شيء شرعي وهو قبل هذا الشيء وشجعني بصح شوفو اش دار ليا .........ادعولي ربي يفرج عليا ويهنيني ........وحسبي الله ونعم الوكيل فيه وفي الحرقة الي دارها ليا ولماما

[نجمة المستقبل]

مجرد علآقة في النت لعشرين يومْ فقط و جاي يخطب ؟؟

نظنوا يتمسخرْ برك و كنتي مجرد ضحية و عقب بيك الوقتْ باسك راكيْ قلتي ألغاكي من الآصدقاء و راح يحوس على اخرى يلعب معاها نفس اللعبة
ربي يهديه

المهم انتي خليهآ درس ليك باش متزيديش تحكي و تأمني أي شآب و خاصة على النت ، متعرفيه ميعرفك

و ان شاء الله ربي يرزقك بولد الحلآل ، خلي ايمآنك كبير بربي سبحآنوا

و يبقى مجرد رأي ~

ربي يسهلك
سلآم

[ana-howa]

كان يتمسر و اغلب اراء و علاقات النت تمسخير
انسي الموضوع و عيشي حياتك عادي الوقت كفيل انو ينسيك
ربي يوفقك

[مناع]

انت الغالطة 100 / 100
لومي روحك برك خمي مليح تعرفي واش هي غلطتك

[bellaluna]

حسبنا الله و نعم الوكيل..
هذا شخص حقير و نصيحة لك من هنا فصاعدا لا تثقي في أيّ أحد لا فتاة و لا شاب و ربي يرزقك ما خير يا رب..

[عباس الجزائري]

و من يتق الله يجعل له مخرجا
أوصيك يا أخيتي بصيام الاثنين و الخميس وداومي عليه
و دائما قولي :" فيها خير "
أف لزواج من النت "مجرد رأي "

[عباس الجزائري]

[orchid violet]

غلطتي يا اختي كي حكيتي معاه ..و غلطت كي زدتي صدفتيه ..هو الله لا يردو ماكانش رجل ..الوفت كفيل باه ينسيك ..و ان شاء الله ربي يرزقك الزوج الصالح

[النجمة القطبية]

يا حبيبتى الغلطة غلطتك وانتى كيفاه صدقتى هذا الكائن الحى اللى عمرك ما شفتيه لمجرد كلمات ضهرت على شاشة الكمبيوتر
كونى منطقية قد يكون رجل مثلما توقعتى او صبي صغير او حتى امراة وما ادراك
عموما وكلى امرك لله هو حسيبك وربي يرزقك بالزوج الصالح ويعوضك كل خير
معليش متقلقيش روحك وماكان والوا

[اسعى لرضى الله]

مفهمتش برك حاجة علاه الاعضاء اللي يردو على المشاكل ديما يحطو رواحهم ملائكة وكي شغل هوما جامي غلطو ويبداو باللوم ووو

____

نرجع للاخت الفاضلة , معليش اختي وكلي ربي واصبري هذا ابتلاء من عند ربي

نصيحتي ليك كاختي قومي الليل وكثري من الدعاء وباذن الله ربي يرزقك زوج صالح على نيتك وتفرحي يارب

[نجمة المستقبل]

المشاركة الأصلية كتبت بواسطة اسعى لرضى الله

مفهمتش برك حاجة علاه الاعضاء اللي يردو على المشاكل ديما يحطو رواحهم ملائكة وكي شغل هوما جامي غلطو ويبداو باللوم ووو

____

اللوم من بآب النصح فقط ، و لآ حابتنا نقولولها روحي زيدي تعرفي على شاب اخر و آ خر و آخر و قضيهآ دردشة


و زيد قلنالها الله يصبرك و يرزقك بولد الحلآل ، و زيد على هدآ الآخت راهآ ثلآثين سنة و علآبالنا كامل نغلطوا مي الانسآن يكون منطقي شوية


هي طلبت النصيحة و نحن قلنآ وجهآت نظر و تختلف من عضو لآخر و حنا في هدا المنتدى نتقبلوا آرآء البعض بصدر رحب و كل واحد و حريتوا


و يبقى مجرد رأي

بالتوفيق
سلآم ~

[hamza touazi]

ختي متقلقيش روحك وماتمرظيش روحك علجال واحد مايستهلش قولي لداركم بلي دارو اكسيدون ومات ونساي جدو نورمال مافيهاش حشمة ربي مكتبش معليش مرة اخرى متامنيش ناس هاد الوقت بزاف رانا نتعلمو فدنيا والله وربي يفتح عليك ان شاء الله بالزوج الصالح

[نـور الإيمان]

صحيح ما قاله الاعضاء اغلب علاقات النت تمسخير لكن ليس معناه ان تزكو العلاقات في الواقع
النت وسيلة اتصال وراءها اشخاص واقعين منهم الطيب ومنهم الخب
حتى وان كان هذا الشخص عرفته في الواقع مخادع كان يحدث لك نفس الامر
اما وعرفته من النت هناك احتمالات اخرى مثل ما قال لك الاعضاء ممكن يكون طفل ممكن مرأة ممكن وممكن....الخ
باختصار لم يكن من كتبه الله لك
وكلى امرك لله وربي يرزقك بالزوج الصالح

[ماري نت]

السلام عليكم ،احمدي الله أنك لم تتورطي معه في أمر خطير ،وإذا ماجاش ربي هناك منو ،إذا كان يتمسخر والله الأمر عادي لأنك في دارك ،وهذي تصرا في عائلات كثيرة ،المهم أنت راك معززة مكرمة في دارك ومارحتيش أنت ليه ،ماتخافيش إذا كان يهزأ منك راه ربي لا يحب الظلم وأنت ربي يخلف عليك .

[life is life]

اختي كوني منطقية و عيشي الواقع

انسي النت هنا عالم افتراضي لا تصدقي هذا الكلام الفارغ
لا تنظري للانترنت على انها جنة و فيها الصالحين فقط

فالاغلبية الساحقة يتظاهرون
لا تنجرّي وراء عشق لكتيبة

النت فيه المجرمين و السراقين و القتالين و الفاسدين و المختلين عقليا

فيها كلش و نتي منين عرفتي هذا ؟؟؟؟

و عشرين يوم ؟؟؟ يااا لوكان عشرين عام في الانترنت و ماكانش ثيقة

المهم اختي كملي بعقلك

و ربي يرزقك الزوج الصالح

برك ما تعاوديش لهذا الخطأ

ديري فبالك كلش مكتووووب و ما تقلقيش روحك كامل