كيف يكون مصير خطبتي

[مشكلتي]

السلام عليكم
ربي يتقبل منا و منكم صالح الاعمال ان شاء الله
الا كتب ربي ان شاء الله بعد العيد يجو يخطبوني ناس تعرفت على بنتهم غير فالنت نتكلمو عادي انا و هي مرة عرضت عليا الفكرة انا قلت راهي تقصر خليتها و بعد اصرار قاتلي مديلي رقم نتاع ام تاعك ماما راهي حابة تهدر عليك انا مدرتش عليها مديتلها رقم تاعي انا قلت راهي تتمسخر يوم 5 من رمضان عيطولي على اساس انا الام قتلها سمحيلي راني برا شوية و عاوديلي
روحت انا لماما هدرتلها فليل عاودو قتلها الا كتب ربي رانا جاين بعد رمصان هدرت جداتو يماه
المشكل 1
هو من ولاية و انا من ولاية بعيدو مشيا نتاع 6 سوايع
المشكل 2
انا من عايلة معروفة و صراحة اب تاعي باه يزوجني يشوف ل 100 حاجة
المشكل 3 كيفاش عرفتو كيفاه جا اب نتاعي متعجبوش الفكرة
المشكل3
انسان هدا خدام غير وين صاب و عندو طاكسي
وكيما قلتلكم نخاف بابا ميبغيش و انا راني مقتانعا بيه انا الحمد الله راني عايشة فالدراهم علابلي مشي هوما كلش انسان المهم يقدر و كلك و وفرلك شورطك

طولت عليكم والله راني حايرة كيفاش ندير نخلوهم يجو و لا نقلها لا راني خايفة رايكم و ربي يجازيكم
الخدمة هي المشكل الكير دوك و راني خايفة نقول ايه و كي روح الا كتبلي ربي ننصدم بواقع اخر و نلقاها طفرت و الاب نتاعي ميرحمنيش
والله لا عيت انا راني حابة ندير دار و دراري و الاب نتاعي لي يجي يقولو لالة مفهمت هدي مصلاحتي ولا راه يورط فيا
ادعولي ري يخليكم

[مراد سابقا6]

سؤال جوهري

لم أفهمه في قضيتك

؟؟؟؟؟؟؟؟؟؟

أنت لا تعرفين هذا الخشص وتريدين الزواج منه

بدون أن تسالي عنه

لربما هو مجنون أو مريض أو به علة أو ما شابه

أنتبهي لهذه الأمور

[marwa255]

Rabi yjibelek eli fih el khire nchalah

[نورسين.داية]

لا اعلم لكن أرى القصة غرييبة نوعا ما ......................

[naamane3]

الاستخارة ثم الاستخارة ثم الاستخارة

[bellaluna]

نصيحة أخت لأختها..غير أخطاك من الحكاية من أساسها..

[7anine 87]

وضحي اختى الكريمة الحكاية مش مفهمومة مى نقولك ربي يقدم لفيه الخير

[*أمة الله*]

استخيري الله و ان شاء الله لي فيها الخير ربي يجبها و لا تتعجلي في اتخاد القرار و لا تنسي أن تسألي عنه و عن دين فشاب يخاف الله سوف لن يؤديكي

[Seo Hyun Unnie]

ma soeur tu ne dois pa accepter le premier-venu, sa9si 3lih w choufi ra2ye waldik en fin de conte homa ya3arfou sla7ek

[feuilleblanche17]

الحكاية غريبة
مازال مشفتيش الشخص و تحوسي تتزوجي بيه
انا نقول لي فايتك بليلة فايتك بحيلة خليها لباباك و هو يشوف

[knives66]

شويا حكاتك معقدة

عرفته من نت وحاب يجي يخطبك هذا واش فهمت

ناقشي موضوع معاه مليح وشوفي انت قلبك واش يقول

اذا حاب ok وإذا لا قوللي وكلاه ولي موضوع

[بنت لبحر]

مفهمتش حكايتك مليح

انت تعرفي الراجل او لا

على العموم لي فيه خير يقدمهولك ربي

[bouchra hakerz]

الاستخارة و الدعاااء استخيري اكثر من 7 مرات عاى الاقل 10 و ربي راه يسوقك لي فيها الخير

[bellaluna]

المشاركة الأصلية كتبت بواسطة bouchra hakerz

الاستخارة و الدعاااء استخيري اكثر من 7 مرات عاى الاقل 10 و ربي راه يسوقك لي فيها الخير

لا تتم الإستخارة أكثر من 3 مرّات متتالية و لا فائدة من إعادتها في إنتظار رؤيا أو غيرها من الدلائل لأنّ الإستخارة في حدّ ذاتها تقديم الخير و تسهيله أو إبعاد الشرّ و أيّ من الحدثين تمّ يعني تحقق مبتغى الإستخارة.

[امينة النايلية]

ياختي

تبعي احساسك نتي وضروفك يعني

اذا ماتخافيش من باباك وخاوتك كي يجو هاذو يخطبوك وش تقوليلهم كفاش جاو

<خاصة اذا صراو مشاكل منبعد فالخطبة او العرس راكي تغامري بروحك>

وزيد راه بن لبلاد وتعرفيه مليح وماتقدريش تعرفي وش يقدر يخرجلك منو .

بصح اذا باباك مايقلك والو خليه هو يروح يسقسي عليهم مليح .