كعك تركي باللبن وصفة جديدة اسهل منها ماكانش

[oum radja]

بما انو اللبن راه داير حالة هاذ الايام
انا تاني قلت نجرب وصفة كانت عندي من مدة و قلت نغير فيها و نستعمل اللبن ههههههه
ما نطولش عليكم
المقادير سهلة جدا
6كيسان فرينة
مغرف كبيرة خمارة تاع الخبز
3مغارف سكر
مغرف صغيرة فاني
مغرف صغيرة ملح
حبة بيض
كاس زيت
كاس لبن
كاس ماء دافئ


ما تعبيش روحك بالزاف ديري كل المقادير في خطرة وحدة و خلطي رايحة تتلم العجينة تاعك بهاذ المقادير المضبوطة


اعجنيها شوية برك باش تتداخل المكونات مليح و خليها تخمر
ومن بعد شكلي الكعك تاعك بالطريقة لي تعودنا عليها وهي اناك تقسمي العجين الي كويرات و كل كويرة الى زوج حرابيش رقاق ورققيهم قد ما تقدري و روليهم على بعضهم
ديري الكعك في صينية الفرن مدهونة ومرشوشة بالفرينة

و هنا نجو للمفيد موالفين ندهنو الكعك بالبيض
هاذ المرة جيبو 2مغارف عسل ثقيل






ونحلوه في نصف كاس ماء
وندهنو بيه الكعك تاعنا و نرشوه بكمية مليحة تاع الجلجلان


نسخنو الفرن و ندخلوه يطيب بعد ما يرتاح مدة 10 دقايق
كي يطيب من تحت نحمروه
هاذا العسل رايح يعطيه لون راااااااااااااااائع و يعطيه قرمشة هايلة
وهاهو بعد ما طاب راه عاد سخون






نتمنى تكون عجبتكم الوصفة
تقبلو تحياتي