أنا حيرانة أرشدوني ؟

[مشكلتي]

السلام عليكم ورحمة الله وبركاته


أولا أشكر إدارة الموقع اللتي فتحت لنا فضاءً نعبر به عما يختلجنا دون شعور بالخجل ..


أنا فتاة الشرق الجزائري,عمري 23 سنة .. من عائلة محافظة ومعروفة
عندي أشهر تعرفت على واحد يسكن في ولاية أخرى غير ولايتي،هذا الشخص رائع بكل ماتحمله الكلمة من معنى ورجل تتمناه اي فتاة يقدرني,يحترمني،يحبني,يخاف عليَآ ويعاملني كي السلطانة وماللي تعرفت عليه جامي شفت منو حاجة عيانة ..
المهم من البداية قالي على نيتو واللي هي الإرتباط بي على سنة الله ورسوله وهذا اللي حصل فتح الموضوع مع عائلته وحكالهم القصة ووافقو ..
المشكلة فيا أنا موضوع الزواج بأكمله يثير بداخلي الخوف وكل شخص يحاول يجي يتقدملي تحكمني الرجفة والخلعة واعاني من ألام في البطن واحيانا قىء وتنقطع شهيتي للأكل تماما و نولي كامل منرقدش وتصبح حالتي حالة نحكم الفراش حتى اني نروح للطبيب ويقولي مابيك والو حتى هو يحير من سبب الآلام !
وبمجرد مانرفض هاذاك الإنسان من غير أسباب .. ويروح لسبيله نرجع لحالتي الطبيعية وكأن شىء لم يكن
حتى هذا الإنسان اللي انا على علاقة بيه .. شحال من خطرة يقولي راني حاب نجي نخطبك وتولي علاقتنا رسمية وفي الحلال نغيرلو الموضوع وننسيه فيه بصح لوقتاش .. أكثر من 7 خطاب رفضتهم أمي تقولي دايما انو لوكان نبقى على هاذي الحالة نكمل حياتي بايرة ..
مافهمتش علاه تجيني هاذيك الحالة,قالولي عندك الخلعة والعين والله اعلم
مافهمتش واش ندير حتى هذا الشخص راني نفكر أني نتخلى عليه رغم اني نحبو ..
انا انسانة نعرف ربي الحمد لله نصلي صلواتي في اوقاتها مداومة على الاذكار وصليت صلاة الإستخارة بشأن هذا الشخص وفي كل مرة يقرب ليا اكثر ويزيد إلحاله على انو يجي لدارنا
راني بين نارين مالقيتش لروحي حل ... أدعولي معاكم ربي يستركم وانصحوني وارشدوني بارك الله فيكم