🌺🌺المقطعة🌺🌺

[أم يوسف2]

البسملة1السلام عليكم خواتاتي ان شاء الله تكونوا ملاح وبخير
جيت وجبتلكم طبق قديم كاين لي يعرفوا وكاين لي لالا
انا وحدة ماكنتش نعرفوا في الحقيقة تعلمتوا من عند عجوزتي ربي يجازيها
للاسف مانقدرش نحط الصور لكن ان شاء الله تفهموني
هذا الطبق اسمو 🎁🎁المقطعة🎁🎁
فيه عجينة وفيه صوص
بالنسبة للصوص ##نحط بصلة مقطعة$$ثوم$$فلفل عكري حار وحلو$$طماطم مصبرة وزيت وراس حار ولي تحب تدير الخضر تقطعها مكعبات صغيرة وتخلي الكل يتقلى مليح ونمرق بعدها بالماء ونقصلها ونخليها تطيب.
العجينة ساهلة
نحط سميد ونضيفلوا ملح وماء ونبدا نعجن مانيبسها مانطلقها بزاف وتحب تتدلك مليح وادا كنتوا مشغولين حطوها في كيس بلاستيكي مثل المسمن ونخلوها ترتاح.
بعدها نحكم طاولة العمل ونرشها بالفرينة وكاين لي يديرلها السميد وعلى مااظن بالفرينة احسن
ونحط العجينة تحبوا تحكموا كويرات صغار وتحلوها وكل وحدة نحلها مليح ونروليها وماننساوش نرشها بالفرينة دايمن وبعدما يولي عندنا حربوش نحكم السكين ونبدا نقطع بالعرض بسمك رقيق تخرجلنا كيما الرشتة وليحبها خشينة شوية يزيدلها ي والا تحبوا حلوا العجينة الكل امبعد قطعوا شرائح طوال وروليوها بنفس الخطوات
وبعدها نحكم غربال ونحط فيها كل مانقطع وكي نكمل نغربلها مليح من الفرينة ولما تبدا تخثار الصوص نحطوا المقطعة فيها نحركها غير بلعقل نغطيها ونخليها تطيب وكي تحطوها زينوا بمعدونس.
انا نخدمها بيدي ولي تحب تكسلها بالة التوريق.
ان شاء الله تكونوا استفدتوا معايا ونتمنى نلقى تفاعل واي تساؤل اختكم راهي هنا.
والشكر موصول لعجوزتي ربي يحفظها.