دائما مع لمبرجة

[oum rahma19]

دائما مع لمبرجة بصح هذه المرة بالطبقات
كي تخلاص لمبرجة نزيد نطيب مبرجة

صباح الخير لبنات اسمحولي على التاخير

صراحة لمبرجة هذه ما فيها حتى حاجة زايدة في المقادير تاع لمبرجة التقليدية
فقط الشكل متغير و يمكن اجمل

يعني كيما موالفة ديري لمبرجة تاعك ديري هذه

٣ كيلات سميد متوسط + نفس الكيلة زبدة ذايبة و باردة ولا مخلطة بالزيت + شوية ملح + لميه باماء و ماء الزهر

الغرس على حساب الكيلة تاعك

ما تنسايش تنحي شوية سميد مبسس قبل ما تبلليه بالماء و خليه بجيه باه تحرشي بيه

ماتعجنيش السميد شمخيه و لميه باطراف الاصابع

الغرس انا خدمت بالزبدة و الجلجلان محمص بودرة و القرفة و الطيب

ما قدرتش نصور كل المراحل للاسف كنت وحدي و مع بيبي تاع عااااااااام على بالكم شحال يحب يفرزووووووو
ھههههههههههههه
بلاك المرة الجاية انشاء الله كي نعاود نديرها نصور المراحل

كيم تديرو قاطو الطبقات رايحين ديرو هذا

العجين قسميه على ٣ اقسام ، زوج اقسام متساوين و القسم الاخر يكون اقل منهم شوية هو لي ديريه في الوسط

الغرس اقسميه الى قسمين متساويين

يعني طبقة الاولى عجين و الثانية غرس و الثاثة العجين الصغير و الرابعة غرس و الاخيرة العجين



السميد لي خليتيه بجيه تحرشي بيه الطبقة الاولى و الاخيرة باه تطيب حمراء و تذوب في الفم

الحجم انت لي تتحكمي فيه على حساب كيفاه يحبوها في البيت

انا يحبوها رقيقة و كاين لي يحبوها خشينا

لازم كي تحلليها اضغطي بنفس القدر في كل الاتجاهات باه تجي متساوية في الارتفاع

قطعيها كيما تحبي

انا قطعتها كيما نقطع سنيوة البقلاوة



الطاجين لازم يكون سخون و النار ما لازمش تكون ناقصة باه ما تيبسلكش

انشاء الله انكون افدت و لي ما فهمتش حاجة تقولي
كي نعاود نديرها انشاء الله نصور المراحل