Truffes au plraliné شكلاطة ذوق خيااااااااااال من مطبخي بالخطوات المصورة

[remadna]

بسم الله الرحمن الرحيم

السلام عليكم و رحمة الله



هذه الشكلاطة مذاقها خياااااااااااااال كل من ذاقها عجباتو و احتار في البنة تاعها
في الحقيقة هي وصفة فرنسية قديمة معروفة عندهم اما هنا قليل من يعرفها او ذاقها ، اسمها les truffes ، بالعربية الترفاس
هذه المرة الوصفة كوبي كولي على الكتاب ( نسخ لصق) ماكانش اختراع الا طريقة التزين في الكتاب الشكلاطة ممرغدة في الكاكاو ، اما انا زينتها مثلما موالفة نشوف الشكلاطة الفرنسية الأصيلة في النت.
و استبدلت la crème fleurette بغبرة الشانتي لأنها غير متوفرة في الجزائر



المكونات: 50 غ لوز، 45 غ بندق (نوازات) محمصين شوية، 160 غ سكر ارطب، 80 مل ماء، 250 شكلاطة (بريما أو مينة) ، 60 غ زبدة، 80 غ غبرة شانتي (ديم ويب)، 2 صفار بيض، 1 و نصف م ك كاكاو.

للتزين: 150 شكلاطة بريما ، 100غ شكلاطة ميزان، قليل من الماء و توضع على حمام مائي
اولا: تحضير البراليني
يوضع السكر و الماء على نار هادئة حتى يتلون السكر للون الذهبي، نضيف اللوز و البندق لخليط السكر،

نفرغها في بلاطو اينوكس لا يلصق، نتركها تبرد.

اهرسها بالمهراس حتى ترطب ثم ارحيها بالروبو حتى تصبح غبرة، اتركيها جانبا


ثانيا: خلطة الشكلاطة
في ايناء ذوبي الزبدة و الشكلاطة و الكاكاو على نار هادئة
اضيفي غبرة الشانتي و الصفار و حركي جيدا ثم انزعيها من النار و اتركيها تبرد

اضيفي البراليني المرحية و حركي جيد حتى تصبح مزيج متماسك ضعيه في الثلاجة حتى يبرد

اخرجيها من الثلاجة و كعبري كعابر هكذا ثم ضعيها في الفريز 1 سا حتى تتماسك


اخريجيها مرة اخرى من الفريز و اعيدي التكعبير حتى تصبح كروية الشكل اعيديها للفريز حتى تجمد و تصبح ساهلة ماهلة للتزين


ضعي حبة الترفاس على فرشيطة ثم اسكبي الشكلاطة بالملعقة في شكلاطة مذوبة في قليل من الماء على حمام مائي هكذا حتى تكون الخدمة متقنة


الشكلاطة التي تبقى اضيفي لها كاكاو او ملون اسود و تخطط الحبات بعد ان تجف تماما


تفضلن ذقن البنة الهايلة بالصحة و الهناء


ملاحظة: خطوات وضع الشكلاطة في الفريز ابتكرتها للمحافظة على شكل الدائري المتماسك و المساعدة على طليها. لأنه في الوصفة الأصلية تمرغد في الكاكاو عادي مباشرة بعد التكعبير.
نصائح: بياض البيض يوضع في الفريز يبقى جديد. يستعمل للميرانغ او اي حلوى.
لا تستعملي prima بريما وحدها لانها لا تجف ابدا (خبرتي) و لا تستعملي شكلاطة الميزان وحدها لأنها غير لذيذة.

دعواتكم بالنصر والفرج للأمة الإسلامية كافة