راني مقلقة محتاجة رأيكم

[مريم الصابرة]

السلام عليكم جميعا
لأنو دائما نشوف ردودكم قيمة حبيت ندي رايكم في موضوع ودبرو عليا وقولولي شكون الغالط
الحكاية إنو خويا الكبير وطبعا ما يسكنش معانا ولا يجينا أبدا يعني مرات نتلاقى بيه فالطريق وعادي كإني ما رانيش ختو او يمى يماه عادي ربي يهديه والفنا وحتى وإنو راه يسكن قريب لينا
المشكل خويا متزوج للمرة الثانية ومطلق مرتو الاولى عندو 3 أطفال 12 و 11 و 3 سنوات ومع زوجتو الثانية عندو طفل 2 عامين
االمشكل طليقتو تحب دير فيه زكارة لكن تخيلو كيفاش في كل عطلة تبعث ولادو يقعدو عندو من حقهم يشوفو باباهم ويبقاو معاه لكن زوجتو الثانية ما تقبقلهمش مع العلم إنها هي من خربت دارو حتى طلق مرتو وتزوجها ولما ما تقبلهمش عندها وين يجو عندنا ويمى ما تقبلش عليهم يعني يقعدو كامل العطلة ويروحو
المشكل قولولي راني البارح شعلتها فالدار وقلت ليمى والله نخرج ونروح نهمل تتخيلو انا مريضة كيما تعرفو اغلبيتكم وراني حالية ما نوضش ما نمشيش ويمى تروح تخدم تقريبا ما تجيش مرات حتى بعد العصر هذو أطفال محتاجين رعاية محتاجين اللي يطيبلهم ويلبسهم وانا ما نقدرش انا اصلا ما نقدرش حتى نتحرك لما قلتلها دار باباهم كاينة ويماهم موجودة علاش رانا مجبورين بيهم كيفاش يماهم تبعثهم وباباهم مرتو ما قبلتهمش يجو هنا إنت تروحي تخدمي وانا كيفاش ندير علاش مجبورة نضيع حياتي على ولاد الناس ويا ريت راني بصحتي عادي نعتبرهم أيتام لأانهم فعلا ضحايا بين امهم وباباهم ولكن انا ما نقدرش جواب أمي كان ما نرميهمش وخليهم يقعدو وقت ما حبو وباباهم نهار كامل ما يحوسش عليهم نهائيا صدقوني في رمضان يستناوه فالشارع برا يقولهم أقعدو هنا ضرك نعيطلكم تدخلو تاكلو ويدخل ويقفل الباب حتى تروح يمى تحوس عليهم تجيبهم ويجو يعني باباهم ما عندوش قلب عليهم هو أصلا جافي قلبو حجر
الآن واش ندير انا راهم جاو البارح انا ما نقدرش وعلاش محتم عليا فوق مرضي نتحمل مسؤولية ولاد يماهم وباباهم حيين خبروني هل راني غالطة ؟ شكرا