تارت بلاكريم باتيسيار حاجة جديدة من عند مونية ك

ام ملاك. · 2013-02-02, 21:03

جبتلكم قاطو جديد ان شالله يعجبكم خدمتو وماعنديش بزاف مكونات في الدار وراجلي كي مايحبش القاطو مايشريش قع حوايج القاطو هههه
وكي نخرج نبروفيتي نشري نشري وهكذاك نسى دايما كاش مكون ولا زوج
وكنت حابة قاطو وخلاص المهم حاجة حلوة وهذا اللي لقيتو في الدار
المهم درت هاد التارت ان شالله تعجبكم
راجلي مايحبش القاطو هذا عجبو وبقالي مورصو كبير منو جاتني ضيفة عجبها حتان خلاص قاتلي هايلة كيفاش درتيها ههههه وماعلابالهاش بللي انا اللي اخترعتها هههههه

المهم نخليكم مع المقادير
درت فرينة تقريب 2 كيسان ونص كاس زيت و2 مغارف كبار سكر ومغرفة كبيرة كاكاو وقطراما زهر على جال البنة برك يتخلطو مليح ماتخافوش ماتجيش لابات مشمخة مام يابسة ماعليش المهم تكون مبسسة
تفرشوها في البلاطو وتدخلوها للفرن تطيب حتان تنشف مليح وتشوفيهاطابت ولات حمرا قع في الجوانب ويابسة خرجوها ودقدقوها وخلوها تبرد من بعد ارحوها بالروبو
اسمحولي ماصورتش المرحلة هادي خاطرش ماكنتش ناوية نصورها قلت حتان نشوف اذا تنجحلي ولا لا ومن بعد قلت اذا نجحت على الاقل تبقى التصاور رحت نجري جبت لاباراي وبديت التصاور اذا مليحة نحطها واذا لا نمحيها

المهم سلامات جات هايلة
هنا اول صورة كي خرجتها من الفرن سخونة فتتها بالفارشيطة

وهنا رحيتها بالروبو ولميتها بشوية زبدة ذايبة وبواطة نتاع دانيت ومغرفة كبيرة نتاع لافاني وشوية حلوة الترك كانت بقاتلي من المولود ماشي شرط اللي ماعندهاش ولات كي شغل لابات بريزي كيما في الفوطو

هذي الدانيت ولافاني

هنا شديت سينية وغلفتها قع بالنيلون اليمونتار وحطيت لابات فوقها وفتحتها بيدي مليح

من بعد عاودت غطيتها بالنيلون خاطرش لازم تدخل للفريجيدار تبرد مليح وتشد روحها
وبيانسور بنتي حطت يديها للبركة ههه

وهنا كي غلفتها قع باش تدخل للفريجيدار كيما قلتلكم

وفي الوقت اللي كانت فيه في الفريجيدار وجدت لاكريم باتيسيير اسمحولي ماصورتش هاد المرحلة
هي نص لتر حليب و5 مغارف سكر و2 صفار بيض ولافاني 4 مغارف فرينة وتخلطي كلشي عالبارد من بعد تحطيه على النار وكملي خلطي حتان تعقاد وتولي كريمة
نحيها من النار وخليها تبرد مليح من بعد شدي الباتور وضربيها مليح خاطرش تلقايها جمدت نورمال ماتتقلقوش زيديلها عصير حبة قارص وحبة برتقال
وفرغيها فوق لاتارت نتاعك وعاودي غطيها ودخليها للفريجيدار

من بعد وجدت عصير ' برتقالات كبار او اكثر كل واحدة شحال تحب وسكر حسب الذوق وكاس ماء و 3 مغارف مايزينة واللي ماعندهاش تدير فرنة في بلاصتها نفس النتيجة تخلطيهم مليح من بعد تحطيهم فوق النار وتبداي تخلطي حتان تعقاد مليح وتنحيها وكملي خلطي مليح باش ماتتحببش وتبقى رطبة وفرغيها فوق لاتارت نتاعك
كيما الصورة

وتعاودي تغطيها بالبلاستيك وتدخليها للفريجيدار تبرد مليح وكي تبرد اجبديها وديكوريها كل واحد كيفاش يحب
انا ذوبت شوية شوكولا ورسمت وزينت شوية بتشينة خاطرش نتاع تشينة
وتقدري تديري ميرانغ فوقها ولا كريم شانتيي كل واحدة وكيفاش تحب تديكوري
انا هذا اللي كان واجد عندي غير الشوكولا

وهنا اقرب

وخليتها تبرد مليح حتى الغدوة من داك باش قطعتها يعني شدت روحها مليح

وهذي لاول واحدة ترد

وهذي للي تمدلي رايها بصراحة

ان شالله تكون عجبتكم اسمحولي على المراحل اللي ماصورتهمش

wissem173 · 2013-02-02, 21:16

جات تهبل يعطيك الصحة...
راني نتخيل في الذوق تاع البرتقال مع الكاكاو و الدانيت...روعة...
سلمت يداك اختي...

ام رويدة · 2013-02-02, 21:22

القطع الاخيرة في زوج ليا...بصراحة روعة....راكي مبتكرة تان...يعطيك الصحة وبصحتكم
وربي يحفظلك هذيك الامورة ماشاء الله عليها حبت تعاون

meriama13 · 2013-02-02, 21:34

مممممممممممممممم مونية يعجبوني وصفاتك ماشاء الله عليك راكي مخترعة
عجبتني لاتارت

نايليةوافتخر · 2013-02-02, 21:36

الله الله عليك يعطيك الصحة فحلة خليتي راجلك يشتي القاطو 20/20

sarra5 · 2013-02-02, 22:00

بلا مانذوقها راهي بنيييييييييينة

جربتها في رمضان ماخالاو فيها والو تجي تهبل لكن انا بحكم كانت الصيف زيتنها بفواكه الصيف رووووعة

ام ملاك. · 2013-02-02, 22:04

اقتباس:

المشاركة الأصلية كتبت بواسطة wissem173

جات تهبل يعطيك الصحة...
راني نتخيل في الذوق تاع البرتقال مع الكاكاو و الدانيت...روعة...
سلمت يداك اختي...

الله يسلمك اختي صح بنينة واللي حبت تبدل هداك تكسار الراس نتاع الفرينى تخدمها بالبيمو بنفس الطريقة

kakinova · 2013-02-02, 22:08

يعطيك الصحة انا مالفة نجربها بصح اختصارا للوقت و الخطوات نرحي علبة قاطو بيمو يجي ذوقها اممممممممممممممممممممممممممممممممممم

و في مكان الكريمة لي عملتي ندير مرات كريمة بالنشاء فقط او نعمل شوكولا ذايبة

natacabell · 2013-02-02, 22:09

yatik esaha mounia chahitini wana rani rayha norked tabn bnina mmmm yatik esaha liltak saiiida hanouna

رضاك ياربي · 2013-02-02, 22:12

امممممممممم يعطيك الصحة

ام ملاك. · 2013-02-02, 22:14

اقتباس:

المشاركة الأصلية كتبت بواسطة ام رويدة

القطع الاخيرة في زوج ليا...بصراحة روعة....راكي مبتكرة تان...يعطيك الصحة وبصحتكم
وربي يحفظلك هذيك الامورة ماشاء الله عليها حبت تعاون

الله يسلمك حنونة راهم ليك خسارة لوكان برك النترنت يفوت الماكلة:d
الله يسلمك شفتي حبت تبين روحها بللي هي اللي خدمتها هههه
ربي يخليك ان شالله

ام ملاك. · 2013-02-02, 22:21

اقتباس:

المشاركة الأصلية كتبت بواسطة meriama13

مممممممممممممممم مونية يعجبوني وصفاتك ماشاء الله عليك راكي مخترعة
عجبتني لاتارت

الله يسلمك حنونة حشمتيني

ربي يخليك ان شالله

ام ملاك. · 2013-02-02, 22:38

اقتباس:

المشاركة الأصلية كتبت بواسطة نايليةوافتخر

الله الله عليك يعطيك الصحة فحلة خليتي راجلك يشتي القاطو 20/20

شفتي كلا غير هذاك كيما عييت نحلل فيه باش ياكل معايا قاكوات واحداخرين مايحبش يقولي كوولي وحدك

حتان نكره نولي مانطيبش
الله يسلمك حنونة نورتيني

omaymen · 2013-02-02, 22:42

بارك الله فيك يا اختي مونية تشهيييييي

sassah · 2013-02-02, 22:43

allah ybarak jatak mliha 'bsahatkom

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري