ضحكو عليا شويه

[ترانيم الجنة]

البارح رحت للمشفى مع ثلاث صديقات من اجل شهادة طبيه الخاصه بمسابقة التعليم لما وصلنا لقينا 10 من ناس قبلنا يستناو دورهم يدخلو لعند الطبيبة ا

قعدنا نستناو حنا تاني ومن بعد دخلت امراه قالت سلام ردينا سلام ورجعنا لحكاياتنا نورمال وفجاه سمعنا يا لبنات مخطوبات؟؟؟؟؟
اه ماشي سمعت كلمة خطبه ولا راني غالطه خطبه يعني عريس يعني زواج ههههههههههههههه درنا عندها كامل وقلنا لااااااااااااااا بدات تحكي حابه نخطب لخاي ما زال ما لقيتش طفله و بقات ساعه هي تشكر فيه

قاتلي صاحبتي خلاص منها هذي باينه غير تكذب وراها حابه برك توصل تقولنا خلوني ندخل في بلاصتكم وهكذا صار صح في تالي قالتنا عندي شغالات وما عنديش وقت لو كان غير تخلوني ندخل. الحق صحاباتي ما حبوش مي اختكم القافزه قالت والله غير نوصل الكذاب للباب الدار وطلبتهم خلوها تفوت قبلنا

انا ماما عيطتلي في بورطابل بعدت شويه على دورنجمو وبديت نحكي الوقت لي درت نشوفها خارجه من الباب مشفى بديت نضحك مع صحاباتي ونقولهم عندكم شوفو هربت هربت قبضوها قبضوها ومن الصدفه 3 رجال واقفين عند الباب هذاك ما سمعوا قبضوها قبضوها وقبضوها صح وجابوها حتى لعندي وواحد فيهم يابنتي واش دارت واش خونت وانا ميته من الضحك ما عرفت ما نقول. وهي كي المخلوع ما عرفت باش تبلات .كامل ناس واقفه تتفرج قتله حاج ما سرقت والو برك كذبت عليا قاتلي خليني ندخل بلاصتك ونخطبك لخويا كي دخلت وخرجت راهي هاربه بلا ما سقسيني على دارنا ولا تدي من عندي نيميرو تليفون.

وبدات كامل الناس لي تتفرج تضحك عليا وهذاك الحاج يصبر فيا يابنتي مازالك صغيره وشابه تبارك الله احم احم علاش مقلقه على الزواج وانا يا الحاج مابياش الزواج بيا لي كذبت عليا. وبدات التعليقات واصبحت مشهوره في مشفى هههههههه وخرجت من تمه بنشعه جديده تضاف للنشعات وتبهديلات السابقه