السلام عليكم
لا حياة بدون مشاكل، حتى الأسر الصغيرة تنشا بينهم مشاكل رغم أنهم ولدو وكبرو مع بعض
فما بالك بامرأة جديدة تدخل إلى أسرة، لا هي تعرف نمط تفكيرهم، ولاهم يعرفون أسلوب حياتها سابقا
فأكيد راح يوقع مشاكل صغيرة، اختلافات بسيطة... في هذه الحالة يجب عدم تضخيم الامور، والتنازل في بعض الأحيان
ولكن الطامة الكبري عندما يصبح هناك افتراءات وكذب واختلاق قصص، هنا لا يعرف الزوج من يصدق و من يكذب
ملاحظة للمراة: إذا كنت رايحة تعيشي مع أهل زوجك، اعرفي بلي راكي داخلة لأسرة عندها مبادئ وقوانين واسلوب حياة كانو عايشين بيها هذي عشرات السنين، حتى وإن كانت ضد مبادءك ماتحاوليش تغيريها، يعني واش دخلك إذا أخو راجلك رمى تقاشيره مسخين في الصالون، ماكان ما دخلك، ما رماهاش في شمبرتك، فمتلعبيهاش نقية عليهم، وهذي تجي هنا وهذي ما تجيش هنا...
ملاحظة للرجل: أنت أدرى بطبيعة أختك (يعني كبرت معاها فراح يكون علابالك بلي واعرة وكذابة) وأيضا بطبيعة الوالدة، فما تظلمش زوجة المستقبل وتسكنها معاهم، فبعض الرجال علابالهم بانو الوالدة أو الاخت تاعهم ما تنعشرش، ولطالما سمعها تفتري على زوجات أخواله واعمامه، ثم يجيب زوجته تعيش معاها ويقولها اصبري، حقا هي أمك وواجب عليك تبرها، ولكن زوجتك ماشي واجب عليها تصبر على أذاها
لو كل طرف يقف عند حدوده، ويعرف حقوقه وواجباته، فراح تنقص المشاكل