[اسمهان79]

السلام عليكم ورحمة الله وبركاته
ليوم عندنا مقبلة بيتزاااا شاوارمة كيما تحبو تسموها سموها
بصح واش نقولكم على اللذة راهي بنينة فوق ما تتصورو الحشو نتاعها جد لذيذ



من الداااااااخل






نقولو بسم الله
اول شيئ نعمل العجينة
انا معتمدة هاذ العجينة في كل معجناتي نضن هي للاخت نينا فرات
نشكرها بزاف على خاطر صح تصلح لكلش
نفرغ كاس حليب دافئ كأس نتاع اينوكس ونضيفلو ربع الكوب اللي كيلنا بيه الحليب زيت ملح 1 م ك سكر 3 م ك لحظة 1 م ك خميرة نتاع الخبز كاس فرينة نخلط كلشي مع بعض راهي تكون جارية عادي نغطيها ونخليها تخمر 10د من بعد نزيد نضيفلها الفرينة حتى تتلم
وتصبح عجينة لينة نغطيها ونخليها تخمر
الحشوة
ناخذ شوية صدر دجاج نقطعو طراف صغار نتبلو في التتبيلة المتكونة من
1 م ك كرام فراش ثقيلة ماشي سائلة 1 م ص موطارد ملح فلفل اسود القليل من الزنجبيل مرحي عصير حبة قارص 1 م ك خل 1 م ك زيت طرف صغير زبدة طرية





نرحيهم مليح بالبرا ميكسور ثم نحط فيهم الدجاج مدة 3 او 4 ساعات او اكثر كيما تحبي



ثم حمري الدجاج في مقلا مليح نحي من على النار






وجدي صوص الطماطم وهي حبة كبيرة طماطم مقشرة ومقطعة مكعبات زيديلها 2 سنات ثوم مرحي 1 م ك بصل مرحي ملح ماتكثريش ثم فلفل اسود 1 م ص افاح 1 م ك زيت ودبشة مقطعة 1م ص هريسة و1م ص كمون



طيبيها وحاولي ما تعبزيهاش نشفيها مليح من الماء نتاعها



ثم اضيفيها للدجاج وزيدي معاهم شوية دبشة وخلطي غي بالشوية


وذوقي ورجعيلي الخبر راهي بزاف بنينة
اطرحي العجينة ثم اعملي دوائر على قيس طبسي صغير
طبسي نتاع فنجان القهوة



حطي شوية حشوة في الوسط وطرف فرماج بربار راهو طري وبنين



ثم حاولي تلمي العجينة على الحشوة بلا ما الجوانب يقيسو الحشوة على خاطر ما تحكمش الا قاستهم لاصوص لمي مليح واغلقي وحاولي تنقصي من العجينة في لبلاصة اللي غلقتي فيها على خاطر تجي شوية خشينة وفي القليان ما طيبش وتجي معجنة



ثم لفيهم في البيض ثم في لا شابلير



سخني الزيت ويكون شوي بزيادة ثم نقصي شوية للنار ولوحيهم يتقلاو خليهم يطيبو على مهلهم مع التقليب المستمر حمريهم مليح باه يطيبو مليح وما يعجنوش



نحيهم ثم على ورق ماص للزيت زينيهم بالشي اللي حبيتي




قدميهم لعايلتك بالصحة والهناء
نتمنى يعجبوكم ونكون عند حسن ظنكم
في امان الله