وعليكم السلام ورحمة الله تعالى وبركاته
أول حاجة الطفل كي يسأل هذا دليل على الذكاء وسرعة البديهة لي عندو ... وهي طريقة يعبر بيها على رغبته في اكتشاف العالم من حوله ... يعني إذا ماجاوبناش الطفل كي يسأل ولا تهربنا من السؤال ولا تعاملنا معاه بقسوة هنا راح نخلقو ضرر كبير في شخصية الطفل و ينقص عندو عامل الإبداع والإبتكار وبالتالي راح يفقد الثقة في نفسو و فينا ...
تقولي بلي الطفل يسأل أسئلة تعحيزية و مامقدروش نجاوبوه و لوكان نجاوبوه ماراحش يفهم علينا و راح يبقا يسأل و و و ... ! أكيد الطفل إذا هدرنا معاه شغل عبد كبير موحال راح يفهم علينا ... يسما لازم نهبطولو و نجاوبوه على حساب عقلو الصغير ...
مثلا السؤال التعجيزي لي ماكانش طفل في العالم ماسألوش هو " من هو الله " ... كي يسقسيك الطفل هكا ماشي تروح تجاوبو الجواب البديهي نتاع الله موجود في كل مكان ... و نقدرو نشعرو بإبداع خلقه و قدرته العظيمة و كذا .... "هاذي الهدرة قادر تقولها لواحد كبير مايفهمهاش عليك فما بالك بطفل صغير " ....
الطفل مازال مايستوعبش الأمور الغيبية و مايحسش بيها ... يسما في عوض تهدرلو على الذات الإلهية اهدرلو عل الصفات الإلهية ... قال مثلا ربي رزاق كريم ... شوف كيفاه مدلك عينين باهيين ... و مدلنا دار مليحة ... و هو رحيم لطيف ... شوف كيفاه خلق الطيور و الأزهار والسماء و لحوايج لملاح في الدنيا هاذي ... يعني بالمختصر الطفل يفهم بالملموس ماشي بالمحسوس ...
و بالاك ترسخلو الفكرة نتاع الله شديد العقاب "كيما يديرو أغلب الأولياء" كي يدير حاجة ماشي مليحة يقولو ربي يعاقبك و يعلقك من عينيك و مانعرف واش ... !!! هكا تولي تتحول العبادة من طاقة خير مطلق و تسامح إلى طاقة خوف و رعب عند الطفل ...
و تبقى الحاجة الأهم في هذا الكل هي الصدق ... جامي تكذب على طفل صغير مهما كان السؤال ... كي ماتقدرش تجاوب قولو خليني نحوسلك على جواب في الانترنات و ماتكذبش عليه و تخلطلو كاش حطاية من راسك ... خاطر راح تبقا في بالو و يجي النهار لي يفيقلك بلي كذبت عليه ... و مايخفاش بلي لولاد يهزو و يقلدو كلشي على لكبار ...