منتديات الجلفة لكل الجزائريين و العرب - عرض مشاركة واحدة

إلهام07 · 2018-07-31, 21:44

مساء الخير بطبوطات راني زعفاااااانة منكم بزااااااااااااااااااااااااف ............... حطيتلكم وصفة كاب كايك الباونتي وانتظرت دعوات خير كاشما يجيني

واقيلا مادعيتوش مليح ولا ماشي من صماصيم قلوبكم ..................

زعمة رجعت بقووووووووووة

.... قريب طارت عيني

............ اليوم جاتني الفحالة نضت طول الصباح ( نستغل زعمة في العطلة ) قلت ندير الميناج مدام طهارة زكرياء قربت ياسيدي وأنا نحك في الكوزينة بكل ضمير

طارلي "لاسيد" دخل في عيني قريب لا راحت

..... ضرك راني نكتب في الموضوع وانا مغمضة عين وفاتحة عين تقول نغمز

... ملي كنت نديرفي الميناج عشيت ندير في التراتمون نتاع العينين

المهم ، رايحة نزيد نحطلكم وصفة لذييييييييييذة جدا نتاع قراتان بما أنو فصل الصيف موسم الاكلات الخفيفة ..... بصح بلاكو هذي المرة ماتدعيوش مليح أهاااااااه راني نهز شنافتي ونحرمكم من الميراث ( الوصفات )

للأمانة الوصفة راني هزيتها من عند وحدة جازاها الله خيرا حطت مجموعة كبيرة من الوصفات المصورة في الفايس

.... انا طبعا حرفت وغيرت فيها ودرتلها الماكياج تبدلت شوية على هذي حبيت نحطلكم طريقتي .....

الوصفة والطعم أكثر من رااااااائع وخاصة أنو مايجيش ناشف كأنو كريمي من داخل وطبعا الاسكالوب مع الجبن وشوية الصوص والتوابل طعم ولا ألذ وبحر على الريجيم ههههه خلي الحريرات يزيدو ..... تحيا لاطاي الجزائرية

ننصحكم جربوه مع انو الدجاج هذو ليامات راهو سعرو غالي جدا تقول الدجاجة تهدر لغات ولاّ متخرجة من جامعة "السوربون"

..... بصح على بالي بيكم فحلات كي يرخس الجاج تشريو وتخبيو في المجمد

شعارنا .... " كولي وماتخليهاش في قلب ... ماكانش خير من التكلبيز "

أترككم مع الطريقة وصور المراحل :

قراتان البطاطا والدجاج

المقادير:
بطاطا مقطعة شرائح ومقلية ، قطعة اسكالوب مقطعة مكعبات، حبة بصل مقطعة مكعبات صغار، 2 حبات طماطم مرحية، 3 بيضات، نصف كأس كرام فراش، هريسة (اختياري)، جبن مبشور

التوابل : ملح- فلفل أسود- بودرة ثوم- توابل الدجاج

الطريقة :

- نقطع البطاطا شرائح رقيقة ونقليها بدون ما تتحمر .
- في مقلاة نحط شوية زيت ونقلي الاسكالوب حتى يأخذ اللون الذهبي ثم نضيف البصل ونقلي حتى يذبل مليح ويأخذ اللون الذهبي ثم نضيف الملح والتوابل ونقلي شوية ثم نضيف الطماطم المرحية ونقص للنار ونخليها تطهى على مهل وما نشفهاش بزاف .
- في صحن نخلط جيدا البيض مع الكرام فراش و شوية ملح ورشة فلفل أسود وثوم بودرة .
- في صينية الفرن نضع البطاطا ونصب عليها القليل من خليط البيض ثم نضع الدجاج ونصب باقي خليط البيض
- ونضيف كمية مليحة من الجبن المبشور .
- ندخلها للفرن في الرف الوسطاني على 180° مدة 10د – 15د فقط حتى ينشف البيض ونخرجها مانخليهاش طوّل باش مايتحرقش ومانشفش بزاف .
- تقدم مع سلطة خضراء .
- ممكن نعملها في غامكان بشكل وجبات فردية مثل الصور في الأسفل ... انا هنا عملتها في الصينية اللي تتفتح من الجنب وحبيت نعملها بديكور مميز مثل صاحبة الوصفة وأنتوما كيما حبيتو .

وهذو الصور :

وللامانة هذي الوصفة الأصلية مانديروش كيما الناس اللي تسرق الوصفات وتنسبها لنفسها بكل صحانية وجه

ماتنساوش هذي البطبوطة اللي كتبت الوصفة بدعوات خير" عيد وعواشر " كيما يقولوها العجايز

تحياتي ............ انا لهلوبة