السلام عليكم و رحمة الله صحى فطوركم ورمضانكم كريم رمضان شهر الخير و العبادة و ايضا شهر الطبخ و التلباز في المطبخ ههه البارح درت لي كورني صالي كمقبلة للافطار مع الشربة و طاجين الزيتون و جاوني روعة في المذاق و الشكل و حطيت الصور في الكوزينة و طلبت مني بعض الاخوات الوصفة فكتبتها موضوع باش ماتضيعش بين الصفحات لكي تعم الفائدة على الجميع و نتبادل الافكار و الخبرات انا خبرتي بسيطة في الطبخ و راني نتعلم من مبدعات المنتدى ربي يحفظهم حبيباتي اللي طلبوا مني الوصفة ام اسلام ام هدول قمر اتفضلوا بسم الله المقادير كاس فرينة نضيفلو ملعقة كبيرة خميرة الخبز و ملعقة سكر و ملعقة لحظة و 3 ملاعق زيت ملعقة صغيرة ملح و نضيفلو كاس ماء و نخلط كل شيىء بيدي مليح ثم نضيف الفرينة تدريجيا حتى نتحصل على عجينة طرية ندلكها بيدي مليح و نحطها في اناء و نغطيها بنيلو و نخليها تخمر 10 الى 12 دقيقة و نقسم كريات صغيرة و نشكلها حرابيش رقيقة نلفها على مول نتاع لي كورني و نحطهم في بلاطو مذهون بالزيت نخليها تخمر 5 دقائق لان المطبخ سخون مع الحرارة و نذهنها بصفار بيضة ممزوج بملعقة زيت صغيرة و نذرر عليها جلجلان و الى الفرن اسفة ماصورتش كلش ماكنتش علابالي نديهم موضوع و هذه الصورة لحبيبتي عازفة الناي توضح طريقة العمل الحشو اختياري انا درت صفار بيضتين و بيضة كاملة طبعا البيض مسلوق شوية ماييس ذرة مصبرة و 2 علب طون زيت صفيه من الزيت و ملعقة كبيرة مايوناز احشيهم براس ملعقة صغيرة و اذهنيهم بالمايوناز و مرغيهم في بياض البيض المسلوق رابي نتمنى نكون فدتكم ولو بقليل خاصة المبتدئات الللي اول مرة يجربوا لي كورني جربوهم راهم هايلين خفاف و بنان خاصة لرمضان و كي بقاولي اليوم درتهم في صحن و حطيتهم في صينية الفور و سخنتهم من فوق جاو طيبين مابانوش تاع البارح العجينة تخمر بسرعة انا درتهم كبار باش نخلص مع المغرب و مانقعدش نعمر فيهم هههههه و العجينة جاتني بزاف درت منها ايضا الكروكي المالح و ميني كيش هذا الكروكي المالح طرحت العجينة مربع و طليتها بجبن طري و احشيتها بكفتة مداوية و شوية زيتون رابي و قطع جبن و لفيتها و هذو ميني كيش درتلهم لحم مفروم شحطتو مع شوية زبدة و بصل و ثوم و توابل و ملح و عملتلها من فوق صوص بيشاميل و هذه بعتها ذواقة لولد سلفي اول مرة يصوم باش نشجعوهههههههه و هذو ايضا درتهم بنفس العجينة مرة اخرى السوفلي بوعوينات هههه ميني بيتزا نتمنى يعجبكم الموضوع و اللي يعجبها تدعيلي دعوة خير و اللى مايعجبهاش ثاني تدعيلي دعوة خير ههه صحى صحوركم وفي الامان