اقتباس:
المشاركة الأصلية كتبت بواسطة yacine-08
بارك الله فيك الاخت سطايفية
لدي بعض الاستفسارات :
هل يجب غلق كل مقياس عند 10 نقاط او اكتر ؟
الوحدة الدراسية الأساسية ، من المفروض يكون فيها اغلب المقاييس لانها تشمل مواد الاختصاص ، كيف يمكن متلا حساب نتائج هده الوحدة ، هل يتم ضرب النقطة في معامل المادة تم جمعهم جميعا تم تقسيمهم على عدد المعاملات .
امتلة ان امكن حول الوحدة الدراسية للإكتشاف ، توسيع طالب لبحته ونظرياته كيف ؟وهل تنقط ؟
وكيف يتم احتساب القرض او عدد القروض التي لديك ؟؟
ارجوا مساعدتي لانني درست الكلاسيك و هدا النظام الجديد محير جدا هههه
|
وفيك بركة اخي
+
بخصوص اسئلتك ابدها سوال بسوال
1)في نظام ال ل م د ليس شرط ان تخرج كل مقياس ب 10 لانو هدا النظام فيه سيستام الكومبونساسيون بين مقاييس الوحدة الواحدة وبين الوحدات في بعضهم
يعني بالمختص المفيد كي يكون عندك المعدل العام 10 يالوكان ديت 0 في كاش موديل تنجح ومتدخلش الراترباج
+
2)الوحدة الاساسية فيها المواد لي عندهم اكبر المعاملات ولي هم اساسيين فالتخصص تقريبا تكون فيها ثلاث او اربعو مواد ومتفوتش هدا الحد
معدل الوحدة
معدل الوحدة =مجموع معدلات المقاييس
لي عندك فيهم تيبيات وتيديات
معدل المقايس =((نقطة التيدي+نقطة التيبي)/2) 0,3x+نقطة الامتحان في 0,7)xالمعامل
لي عندك فيهم تيدي برك
معدل المقياس =(نقطة التيدي 0,3x+نقطة الامتحان في 0,7)xالمعامل
لي معندهمش لا تيدي ولا تيبي
معدل المقياس =نقطة الامتحان فالمعامل
المعاملات عموما متساوية فالوحدة الواحدة مي ساعات تلقاهم وحدة واحدة ومش متساويين وهداك 0,3 و0.7 خاصيين بمعهدنا قادريني يتبدلو في جامعتكم
ملاحظة اخرى كايين تيبيات ميتحسبوش فالمقياس ويتحسبو على اساسا انهم مقياس قائم بحد داته
على العموم علابالي الحسابات مخلطة شويةمن بعد نشرحها بمثال حي
+
نعطيك مثال حول الكومبونساسيون لاني نسيت ممديتولكش مقبيل
مثال فالوحدة داتها
مثلا فالوحدة كاينين ثلاث مواد هوما الرياضيات والكيمياء والفيزياء
نفتارضو اني جبت معدل الرياضيات 14 والكيمياء 8 والفيزياء 9
هنا عندي زوج مقاييس مش لاحقين ال10 نولي نكونبونسيهم بالرياضيات لانو عندي 4نقاط فوق 10 فيها
نغطي النقص لي الفيزياء وهي نقطة والنقص لي فالكيمياء وهي 2 وبالتالي نكون خرجت هدي الوحدة فوق 10
مثال اخر على الكومبونساسيزن تاع الوحدات في بعضاهم
نفترض انو الوحدة تاع الرياضيات والكيمياء والفيزياء مخرجتهاش لاني ديت 8 فالرياضيات و9 فالكيمياء و10 فالفيزياء
المهم معدل الوحدة خرجلي 9 فاصلة حاجة
وفي وحدة اخرى مثلا متكونة من انجليزية ورسم صناعي واعلام الي معدل الوحدة كاملة خرجلي 15
واش نولي نحسب
معدل الوحدة الاولى فالمعامل تاع الوحدة نفتارضو انو 6
كي نضربو 6 ف 9 نلقاو54 والوحدة باش تخرج لازمها 60
اد تخصنا 6 نقاط
فالوحدة الثانية نفرضو معاملها 2
2 فال15 تمدلنا 30 والوحدة تخرج ب 20 يعني 10 كاملة زايدة
نديو منها 6 نقاط ونخرجو بها الوحدة الاولى
ولي بقاو نخرجو بيهم وحدة اخرى
+
3)فيما يخص وحدة الاستكشاف تلقا فيها مادة او 2 تعرفك بالتخصص
مثلا انا قريت بصريات وميكانيك الضبط وحدة الاستكشاف تاعنا قرينا فيها وةج مواد
ديكوفارت 1 حول البصريات وديكوفارت 2 حول الميكانيك قرينا فيهم تاريخ العلم واش فيه يعني بالمختص انو بطاقة تعريفية للتخصص وهوما راهم مقياسين دير فيهم كونطرول عادي وعندهم معامل ضعيف 1 او 2 فقط
+
4)القرض كاين تاع الوحدة وكاين الاجمالي لي هو مجموع قروض الوحدات
من بعد نحكي عليه بالتفصيل
وشا نحبك تعرف اخي انو لما تخرج الوحدة ب10 يكون عندك كامل قروض الوحدة
ولما تخرج المعدل العام ب10 عندك اخي ثلاثين كريدي تاعك
محبيتش نديتاييلك اخي حتى تفهم الحسابات تاع المعدلات لاني علابالي بلي كثرت الهدرة وخفت تتخلطلك
على العموم انت اقرا ردي وحاول تفهمو وادا مفهمتش كاش حاجة قولي نعاود نههمهالك وكي تفهم بيان نولي نحكيلك على القروض
+
اي سوال اخر اطرحو عليا اخي لانو معظم الطلبة يعانون من عدم فهم ال ل م د ومهمش غير صحاب لكلاسيك راهم يقراو ل م د ومش فاهمينو
ونزيدلك ميزة يتميز بيها ل م د على الكلاسيك مكانش النقطة الاقصائية هديك لي عندكم كانت 5
حنا تجيب في موديل 0 نورمال المهم تضمن المعدل الاجمالي 10