السلام عليكم لبنات حبيت نحط هادي الورشة باش المبتدئات يعرفو كيفاش يخيطو قفطان لوحدهم سيرتو مين الخياطة راهي غالية شوية لمهم نحتاجو كتان قطيفة القفاطن هدي مولاتها شراتها 160 الف للمترة وكاين تاع 115 الف للمترة كانتي لي تجي دوبل لاغج نشرو غير 2 مترات ونص وكاين لي مجيش دوبل لاغج لازم 3 مترات نحتاجو قالون حوالي 8 مترات ونص نحتاجو زويتنات شريت 3 كبات محزمة القفطان راهم يتباعو واجدين بالمترة لصقة القالون باش ميعواجش القالون ليزابليك شراتهم مولاتهم 35 الف للوحدة نبداو على بركة الله نجيبو الكتان نطووه على 2 ومن بعد على ربعة نروحو للجهة لي فيها جهة مفتوحة وجهة مغلوقة باش نفصلو عليها العنق والرقبة كيما راني موضحة بيدي فالصورة نخلو الجهة المغلوقة بعيدة على الجهة المفتوحة حوالي 2 سم خاطرش رايحة تتخيط ونفصلو العنق نفصلو اولا العنق على حساب واش تحبو اذا كان مفتوح بزاف ولا شوية كيما تحبو https://www6.0zz0.com/2016/03/06/13/147960339.jpg من بعد نفصلو الكتف دايمن نخلو حوالي 12 ولا 13 سم ومع الخياطة تولو تنقصو ومن بعد نديرو فتحة الابط نديرو حوالي شبر ومن بعد نرسو الفتحو نروحو نفصلو من تحت لاطاي انا دايمن نجيب قندورة تاع لي رايحة نخيطلها ونعبر كيما هنا جبت قفطان قديم وزيدتلها عليه حوالي 2 سم من كل الجانبين نتحصلو على هدا نعدلو من تحت نقصو الزائدة باش يجي من تحت شكر دائري نفصلو جهة العنق كيما تحبو دائري ولا مربعة ولا كيما تحبو انا خيرت هكدا شوفو ضروك تحصلنا على جهة الظهر مغلوقة وجهة الامام مفتوحة جهة الامام مفتوحة خاطرش رايحين نخيطوها ونركبو فوقها القالون من بعد نجيبو جهات الامام ونلاقوهم مع بعض والخياطة تكون على الوجه الحقيقي تاع الكتان خاطرش رايحين نركبو عليهم القالون ومن بعد نديرو قلبة رقيقة من جهة العنق وجميع الجوانب لي يركب عليها القالون وتكون لوجه الحقيقي تاع الكتان كيما راني موضحة يعني من تحت من بعد نجيبو القالون واللصقة نديرو اللصقة اولا ثم القالون ونفوتو بالمكواة تاع البخار باش يلصق وميعذبناش كي نكونو نخيطو هنا لي تخاف تخسر تحكم بلبرة والخيط ومن بعد تفوت بالمكواة وحاذري تحرقي الكتان ..كل ما تحطي المكواة على الكتان اضغطي على زر البخار باش يلصق مليح نروحو للاكمام نفصلوهم عادي وتاني نديرولهم قلبة من تحت باش نديرولهم القالون ونزيدو نركبولهم الزويتنات قبل منلاقو جهة الامام والظهر نروحو نركبو الزويتنات بلبرة والخيط ونركبو ليزابليك بعدها باش نحكمو الجهتين مع بعض وفالاخير هاهو القفطان واجد والمحزمة شريتها واجدة تتباع بالمترة 35 الف للمترة ديري حساب المحيط تاع جسمك وشريها وركبتلها ليزابليك والكروشيات باش تتقفل لي مفهمتش حاجة تقلي نعاود نفهمها وادعولي يا اخواتاتي