أخيتي والديك ماشي حابين يجبروك على العمل ماحبوش برك
كي قريتي وتعبتي وفي الاخير راكي قاعدة ماتديري والو
التعليم رسالة نبيلة ولازم الواحد يحبه باش يقدر يأديه باتقان ويعطي للتلاميذ ومايظلمهمش لذلك ماحبيتيهش ماتديريهش هي مسؤولية أمام الله
أما بخصوص العمل بصفة عامة فأظن أن مشكلتك مع الخروج من البيت والاحتكاك مع الناس وما يصادفك من مشاكل نتيجة ذلك يعني ماتحبيش تكسار الراس وقلتي ماشي محتاجاته يعني كاين اللي ينفق عليك لأنك لو كنت مضطرة ماراحش تشوفي إذا تحبيه ولا لالا ، أنت حرة في ذلك وراحتك النفسية أولى من كل شيء
المهم انك عندك شهادة والحمد لله ممكن يجي وقت تستحقيها
الحل حسب رأيي
شوفي انت مع نفسك مجال تحبيه أو صنعة (وكل ميسر لما خلق له) تنفعي به نفسك وغيرك فيما يرضي الله وممكن يكون لك من خلاله مدخول بلا ماتخرجي، كاين بزاف اللي كملوا قرايتهم وداروا مشاريع خاصة بهم خارج قرايتهم ونجحوا فيهم، راح ترضي والديك وتشغلي نفسك لأن الفراغ قاتل ويجيب غير الأمراض النفسية
أما بخصوص حياتك الخاصة وطبعا بعد الاستخارة اياك أن تقبلي وأنت غير مرتاحة أو غير راضية ، واضح أن شخصيتك لاتتعايش في شيء تكرهه وتبقاي تلومي في اللي أجبرك إذا ماساعدكش الحال، المهم رفضك يكون بالرفق واللين
وحاولي دائما توضحي الاسباب وتفهميهم وادعي ربي سبحانه وألحي أن يعينك في ذلك إنه سميع قريب مجيب
ربي يفتح عليك عن قريب ويريح بالك ويسعدك ويسعد والديك معك، آمين