خرجو من الدار اسيدي
خرجو من الدار
يوم الجمعة في البرد و المطر
وغواشي على مد البصر
من كل الأعمار
والشرطة خاوتنا حاضرة
اشعب اتحضر اسيدي
سلمية بالورد والزهر
عند العالم قاع يفتخر
خاطيه التكسار
تحيا الجزائر حرة
الشعب الجبار اسيدي
مرفوع الراس وشامخ الصدر
وعلامو مربوط في الظهر
في يدو شعار
والمسيرة ماهي مأطرة
أحنا أحرار سيدي
الراية بيضا بالخضر
نجمة وهلال بالحمر
حتى الإنتصار
العصابة تضحى خاسرة
خرجو من الدار اسيدي
خرجو من الدار
يوم الجمعة في البرد و المطر
وغواشي على مد البصر
من كل الأعمار
والشرطة خاوتنا حاضرة
سلال وطليبة بالشكارة
عمار بالغش والزور
بوشوارب حداد وعمارة
غير لي يهدر و يدور
مع ولد عباس والهدارة
كي أويحيا المسعور
لا عيب وعار سيدي
عيب وعار
الكرش الخضرا والكبر
ما ينجم يقرا شي سطر
والحناك كبار
كلي ما تعلم ما قرا
القلب معمر اسيدي
الرايس سينين ما ظهر
يحمنا من داخل القبر
ولا من السبيطار
وبراوات شكون يا درا
يا خي حقار سيدي
ما بقاتلك قيمة ولا قدر
أنتايا و وجوه الشر
لي باعو دزاير
الرجلة موحال تنشرى
خرجو من الدار اسيدي
خرجو من الدار
يوم الجمعة في البرد و المطر
وغواشي على مد البصر
من كل الأعمار
والشرطة خاوتنا حاضرة
البيب يفهم الإشارة
والباطل ما عليه نور
يا لعاملين فينا زكارة
لا حال يدوم يا ذكور
الدنيا راهي دوارة
واليوم صحا الجمهور
ألف مليار اسيدي
تبنيلك طرقان في البحر
وأنتايا فرحان بالحفر
في الطريق السيار
الفاتورة بالزور طايرة
يونامار اسيدي
عشرين عام يا عرة البشر
السرقة والغش والغدر
وهبوط الدينار
السياحة بقات لخرة
وشراك تصدر يا سيدي
خلاف قريعات الخمر
وشويا دقلات والتمر
والباقي تعصار
من ثورة أرضنا الطاهرة
خرجو من الدار اسيدي
خرجو من الدار
يوم الجمعة في البرد و المطر
وغواشي على مد البصر
من كل الأعمار
والشرطة خاوتنا حاضرة
خنتو لبلاد بالجهارة
نكشف قاع المستور
زفر بابوركم قارا
بيكم في وسط البحور
قصيدة الحراك الشعبي
جاكم شعب الحضارة
يالي خربتو الدستور
الشعب يقرر
ثمنية وعشرين في الشهر
تخرج من باب القصر
لتاريخ العار
حساباتك راهي بايرة
الإستحمار اسيدي
وجوهكم اصحاح كي الحجر
مستواكم دون الصفر
مونطاج الأخبار
مخدومة للعميان ظاهرة
تمت لقدار اسيدي
ما بقالكم مكتوب في العمر
الجزايري ما بقالو صبر
ضد الباطل ثار
كل جمعة تلقاه برا
خرجو من الدار اسيدي
خرجو من الدار
يوم الجمعة في البرد و المطر
وغواشي على مد البصر
من كل الأعمار
والشرطة خاوتنا حاضرة
قهوة موح