[klodia26_dz]

البسملة1

السلام عليكم ورحمة


مساء النور بنات .. ان شاء الله تكونو كامل بألف خير وصحة وعافية



أعتذر عن طول الغياب والتأخر في الدورة كانت عندنا مناسبة زواج اختي ربي يهنيها وظرووف اكبرو اكبر وربي عالم

ولكن ان شاء الله رح نرجع ليكم بالدورة ونمشو بإنتظام

قبل ما ندخل في الموضوع حبيت نشكر كل المشاركات الي طبقو العجينة بالزاااف عجبتني تطبيقاتكم يعطيكم الصحة والله




اليوم الدرس الثاني من دورة عجينة السيراميك
والي رح يكون عن :

طريقة صنع قوالب السيليكون




وحبيت نعمللكم هاذ الدرس قبل لأنو رح نحتاجو قوالب السيليكون فيما بعد أثناء دروس التشكيل

نروحو للمكونات والطريقة

رح نحتاجو :

- سيليكون ( يباع عند الكنكيري سعرو 18 الف )
- مايزينة ( النشأ )
- وملون ( الوان زيتية )



رح تاخذو كمية من السيليكون في صحن تضيفو عليها ملون باللون الي حبيتوه نتوما تخلطوهم مليح حتى يتغير لون السيليكون ثم تضيفو المايزينة حتى تتحصلو على عجينة ماشي يابسة كثير ولا سائلة تلتصق في اليدين تكون عجينة متماسكة

توضعو العجينة على الطاولة وتجيبو الشكل الي حابين تصنعو منو القالب

تغطسو الشكل في الزيت ثم توضعوه مباشرة في السيليكون وخلو الشكل في العجينة حتى ساعة كاملة باش يجف وتكونو تحصلتو على قالب جاهز للإستعمال



كانت هاذي هي الطريقة سهلة وسريعة

وتقدرو تصنعو القوالب الي تحبو بالشكل الي تحبوه في المنزل احسن من تشتروه من المحلات بأسعار غالية

وتقدرو تستعملو القوالب هاذي لعجينة السيراميك وللحلويات ... وغيرها من الاستعمالات

ولكي تشوفو الطريقة بالتفصيل بالصوت والصورة ادخلو هنا لرابط الفيديو على قاناتي في اليوتــوب

https://cutt.us/klodiasilicone



وأي سؤال اكتبوه وان شاء الله رايحة نجاوبكم عليه

ما تنساوش تجربو الطريقة وتشاركونا تجاربكم


انتظروني قريب ان شاء الله









اختكم في الله klodia26_dz